រាជធានីភ្នំពេញ ៖ មន្ត្រីនគរបាលម្នាក់ ដែលមានចរិតឃោរឃៅឈ្មោះ សុន ពិសាល ដែលជាប់ចោទវាយដំយុវជនម្នាក់ឲ្យបែកមុខបែកមាត់យ៉ាងដំណំធ្វើឱ្យមានការភ្ញាក់ផ្អើលដល់សាធារណជនយ៉ាងខ្លាំងនោះ ត្រូវបានលោក តុប ឈុនហេង ចៅក្រមស៊ើបសួរសាលាដំបូងរាជធានី ភ្នំពេញចេញដីកាបង្គាប់ឲ្យឃុំខ្លួននៅពន្ធនាគារជាបណ្តោះអាសន្នហើយ ។ ដោយឡែក បក្សពួកម្នាក់ទៀតដែលបាននិងកំពុងរត់គេចខ្លួន ក៏សមត្ថ
កិច្ចកំពុងតាមចាប់ខ្លួនយកមកផ្តន្ទាទោសឱ្យខាងតែបានដែរ ព្រោះបានស្គាល់អត្តសញ្ញាណរួចហើយ ។
ស្របពេលដែលសមត្ថកិច្ចកំពុងតាមចាប់ខ្លួនជនម្នាក់ទៀតនោះ ឃ្លីបវីដេអូមួយស្ដីពីសកម្មភាពរបស់ជននេះ ក៏ត្រូវបានបង្ហោះលើបណ្តាញ ហ្វេសប៊ុក ពីការទារុណកម្មវាយទាត់ធាក់ទៅលើជនរងគ្រោះម្នាក់យ៉ាងសាហាវនៅក្នុងបន្ទប់ធ្វើការ ដោយនៅក្នុងដៃប្រដាប់ដោយកាំភ្លើងខ្លីទៀតផង ។ នៅពេលដែលមានការបែកធ្លាយ ឃ្លីបវីដេអូនេះ ក៏កាន់តែធ្វើឱ្យសាធារណជនដែលបានឃើញនាំគ្នាធ្វើការថ្កោលទោសកាន់តែខ្លាំងទៀត និងទាមទារឱ្យសមត្ថកិច្ចតាមចាប់ខ្លួនយកមកផ្តន្ទាទោសជាបន្ទាន់ ។
ក្នុងឃ្លីបវីដេអូដែលត្រូវបានបង្ហោះចែកចាយនៅតាមបណ្តាញសង្គមហ្វេសបុ៊ក នារសៀលថ្ងៃទី២៨ ខែឧសភា បង្ហាញឲ្យឃើញពីសកម្មភាពវាយទាត់ធាក់ទៅលើជនរងគ្រោះម្នាក់នៅក្នុងបន្ទប់ធ្វើការ ប៉ុន្តែមិនដឹងថាជនរងគ្រោះមានបញ្ហា និងប្រព្រឹត្តបទល្មើសអ្វីនោះឡើយ ។ទោះជាយ៉ាងណាក៏ដោយ គេមិនដឹងថា តើមន្ត្រីនគរបាលទំនើងម្នាក់ទៀតនោះឈ្មោះអ្វី និងបម្រើការងារនៅអង្គភាពណាឡើយ និងកំពុងត្រូវបានតាមចាប់ខ្លួនន ។ចំណែកជនឈ្មោះ សុន ពិសាល ត្រូវបានលោក ចែ សុង ព្រះរាជអាជ្ញាអមសាលាដំបូងរាជធានីភ្នំពេញ ក្រោយពីបញ្ចប់ការសាកសួរគឺបានចោទប្រកាន់ពីបទ «ប្រើហិង្សាដោយចេតនា មានស្ថានទម្ងន់ទោស» នៃក្រមព្រហ្មទណ្ឌ ។
មន្ត្រីនគរបាលឈ្មោះ សុន ពិសាល អត្តលេខ៧៤៨៤០ ឋានន្តរស័ក្តិព្រិន្ទបាលឯក មានតួនាទីជានាយរងផ្នែកបន្ទប់ពិសោធន៍នៃនាយកដ្ឋាននគរបាលបច្ចេសទេស និងវិទ្យាសាស្ត្រ។ចំណែកជនរងគ្រោះក្នុងហេតុការណ៍នេះ ឈ្មោះ អុឹម បញ្ញា ភេទប្រុស អាយុ២៤ឆ្នាំ ស្នាក់នៅផ្ទះលេខ៣៨៤ ផ្លូវលំ ភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ ៕
ចែករំលែកព័តមាននេះ