រាជធានីភ្នំពេញ ៖ គ្មានអ្នកណាមិនដឹងនោះទេថា ការប្រកួតរវាងកីឡាករ ឌុម កែវដា និងកីឡាករថៃ កាលពីថ្ងៃអាទិត្យថ្ងៃទី២៧ ឧសភា បានធ្វើឱ្យសង្វៀនទូរទស្សន៍អាស៊ីអាគ្នេយ៍កក្រើកខ្លាំងមិនធម្មតា ប៉ុន្តែលទ្ធផលចុងក្រោយកីឡាករជើងខ្លាំងកម្ពុជា មិនអាចរកឃើញពិន្ទុនាំមុខនោះទេ ដោយសារតែកីឡាករថៃក៏មានវិជ្ជាគុនខ្លាំងមិនធម្មតា។
ការប្រកួតនៅក្នុងថ្ងៃនោះ កីឡាករ ឌុម កែវដា ត្រូវគេកត់សម្គាល់ថាមានជំនឿចិត្តខ្លាំងថានឹងឈ្នះកីឡាករថៃPha Yaklekប៉ុន្តែមិនដូចការរំពឹងទុកនោះទេព្រោះគ្រាន់តែបើកឆាកក្នុងទឹកទី១ភ្លាម ក៏ត្រូវកីឡាករថៃវាយត្រូវផ្ទួនៗធ្វើឱ្យគ្រូបង្វឹក និងអ្នកឱ្យទឹកសម្ដែងការខកចិត្ត ជាពិសេសក្នុងពេលកីឡាករថៃកាន់តែវាយសម្រុកបានល្អធ្វើឱ្យកីឡាករកម្ពុជាចង់ទាល់ទីម្ដងៗ ។ ក្នុងទឹកទី២ កីឡាករកម្ពុជាបានកែស្ថានការណ៍ប្រកួតរបស់ខ្លួនដោយចាប់ផ្ដើមវាយបំបុកកីឡាករថៃវិញម្ដង បើទោះជាឱកាសវាយលុកនៅក្នុងពេលនោះ មិនទាន់មានប្រៀបខ្លាំងក្លាក្ដី ។ ក្នុងទឹកទី៣ កីឡាករកម្ពុជាហាក់បញ្ចេញថ្វីដៃកាន់តែល្អ ដោយកណ្ដាប់ដៃក្នុងការវាយលុក ក៏ត្រូវគោលដៅ ហើយការប្រើជើងទាត់លើក្រោមធ្វើឱ្យកីឡាករថៃពិបាកក្នុងការវាយលុក ។
ការប្រកួតរបស់កីឡាករទាំងពីរកាន់តែក្ដៅគគុកនៅលើសង្វៀន ដោយអ្នកគាំទ្រយ៉ាងហោច២ភាគ៣បានបង្ហាញការអបអរយ៉ាងខ្លាំងក្នុងពេលកីឡាករថៃក៏បញ្ចេញថ្វីដៃខ្លាំង ហើយកីឡាករកម្ពុជាក៏វាយវិញមិនដកដៃ ។ ក្នុងទឹកទី៤ កីឡាករថៃត្រូវគេកត់សម្គាល់ថាវាយកែងបានល្អ ប៉ុន្តែកីឡាករកម្ពុជាក៏ខ្លាំងណាស់ដែរក្នុងការវាយកែង និងម៉ាត់ ធ្វើឱ្យការប្រកួតទាំងមូលកាន់តែជក់ចិត្ត ។ ក្នុងទឹកទី៥ កីឡាករកម្ពុជាធ្វើឱ្យអ្នកទស្សនាពេញចិត្តយ៉ាងខ្លាំងជាមួយនឹងការវាយលុកទៅលើគូប្រកួតមិនដកដៃទោះបីទទួលការវាយបកវិញយ៉ាងចាស់ដៃពីកីឡាករថៃក៏គេមិនញញើតសូម្បីតែបន្តិច។ ទោះបីយ៉ាងណា កីឡាករកម្ពុជាមិនអាចធ្វើឱ្យកីឡាករថៃបាក់មុខបានទេ ដោយសារតែលទ្ធផលចុងក្រោយបានត្រឹមស្មើគ្នាប៉ុណ្ណោះ។
លោក ញាណ សុធី អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ បានអះអាងថា ការប្រកួតរវាងកីឡាករទាំងពីរទោះបីជាជំនួបលើកដំបូងក៏នៅតែល្អមើលតាំងពីដើមដល់ចប់ ។ លោកថា មួយគូនេះ បើមើលមួយភ្លែត កីឡាករ ឌុម កែវដា សមនឹងឈ្នះច្រើនជាង ដោយសារតែគេវាយត្រូវបានច្រើន ហើយការប្រឹងប្រែងក៏ឃើញថាខ្លាំងមិនធម្មតា ។ ប៉ុន្តែលោកថា កីឡាករថៃក៏ខ្លាំងណាស់ដែរដ្បិតថាវាយចេញបានតិច និងមិនសូវសម្រុកខ្លាំង ប៉ុន្តែមួយដៃមួយជើងរបស់កីឡាករថៃដែលគេវាយចេញត្រូវចំគោលដៅល្អជាង ទើបធ្វើឱ្យការប្រកួតទាំងមូលបានត្រឹមស្មើគ្នា ។ លោកថា លទ្ធផលស្មើខ្លះ ក៏ជារឿងល្អសម្រាប់កីឡាករដែលមានសមត្ថភាព២នាក់ ជាពិសេសក៏ជួយដោះស្រាយទំនាស់រវាងអ្នកលេងភ្នាល់ឱ្យបានស្ងប់ស្ងាត់ផងដែរ ។ លោកនិយាយថា ការណ៍ពិតលទ្ធផលស្មើយើងមិនមែនចេះតែឱ្យទេ ពេលខ្លះវាល្អទាំងសម្រាប់កីឡាករ និងល្អទាំងសម្រាប់គណៈកម្មការ ព្រោះការប្រកួតខ្លះតែឱ្យពិន្ទុមិនស្រួលគឺមានរឿងរញ៉េរញ៉ៃកើតឡើងមិនខាន ។
យ៉ាងណាក៏ដោយលោកនិយាយបែបនេះមិនមែនសំដៅលើការប្រកួតរវាងកីឡាករ ឌុម កែវដា និងកីឡាករថៃនៅក្នុងថ្ងៃនោះមិនល្អ ឬមានអ្នកទិញដូរពីក្រោយទើបឈានដល់ការឱ្យស្មើពិន្ទុគ្នានោះទេ គឺគ្រាន់តែលោកឧទាហរណ៍ និងថាហេតុផលនៃការឱ្យស្មើនៅក្នុងថ្ងៃនោះ គឺដោយសារតែឱ្យកីឡាករថៃឈ្នះក៏ស្ដាយកីឡាករកម្ពុជា ហើយបើឱ្យកីឡាករកម្ពុជាឈ្នះក៏ស្ដាយកីឡាករថៃប៉ុណ្ណោះ ។ លោកថា ការប្រកួតនៅក្នុងថ្ងៃនោះ ទាំងកីឡាករកម្ពុជា និងថៃ សុទ្ធតែបញ្ចេញសមត្ថភាពបានល្អ អ៊ីចឹងលទ្ធផលមិនឱ្យអ្នកណាមានពិន្ទុនាំមុខគឺជាជម្រើសតែមួយគត់ ដើម្បីឱ្យកីឡាករម្ខាងៗអស់ចិត្ត ។ លោកមានគម្រោងដាក់ឱ្យមួយគូនេះប្រកួតឡើងវិញ តែរង់ចាំឱ្យកីឡាករថៃ និងឌុម កែវដា បានត្រៀមខ្លួនគ្រប់គ្រាន់សិន ដើម្បីចង់ដឹងថា បើប៉ះគ្នាម្ដងទៀតតើអ្នកណានឹងឈ្នះ៕
ចែករំលែកព័តមាននេះ