ខេត្តកំពង់ធំ ៖ លោកវរសេនីយ៍ត្រី កែ កញ្ចនា អធិការងនគរបាលស្រុកបារាយណ៍ ទទួលផ្នែកព្រហ្មទណ្ឌបានឲ្យដឹងថា ករណីរំលោភសេពសន្ថវមួយករណីបានកើតឡើង នៅក្នុងបន្ទប់ផ្ទះសំណាក់តារាស៊ី ស្ថិតនៅក្នុងភូមិត្រស់ ឃុំបល្ល័ង្គកើត ស្រុកបារាយណ៍ ខេត្តកំពង់ធំ កាលពីវេលាម៉ោង១១ និង២០នាទីយប់ ថ្ងៃទី២៧ ខែឧសភា ឆ្នាំ២០១៨ លុះម៉ោង៥ និង៣០នាទីព្រឹក ថ្ងៃ២៨ ខែឧសភានេះ ទើបសមត្ថកិច្ចទទួលបណ្តឹងពីជនរងគ្រោះឈ្មោះ ញ៉ ស្រីនាង ភេទស្រី អាយុ១៦ឆ្នាំ កើតនៅខេត្តរតនគីរី បច្ចុប្បន្នមកស្នាក់នៅ និងរើសស្វាយចន្ទី នៅភូមិត្រពាំងឫស្សី ឃុំក្រយា ស្រុកសន្ទុក ចំណែកជនសង្ស័យឈ្មោះ សែម ឆៃ ភេទប្រុស អាយុ២៦ឆ្នាំ នៅភូមិកំពង់ទូក ឃុំមានជ័យ ស្រុកសំឡូត ខេត្តបាត់ដំបង សពថ្ងៃមកស្នាក់នៅរើសស្វាយចន្ទីនៅចម្ការជាមួយគ្នានឹងជនរងគ្រោះ។
បើយោងតាមការ ឲ្យដឹងពីនារីរងគ្រោះប្រាប់ថា នៅមុនពេលកើតហេតុ វេលាម៉ោង៤ល្ងាច ឪពុកនាងបានពឹងជនសង្ស័យ ឲ្យឌុបនាងទៅបើកលុយនៅផ្សារកំពង់ថ្ម និងពឹងជនសង្ស័យឲ្យទៅឌុបកូនស្រីគាត់មកពីភូមិត្រពាំងឫស្សី ដើម្បីឡើងឡានទៅខេត្តរតន:គីរីទាំងអស់គ្នា។ លុះពេលឌុបជនរងគ្រោះមកតាមផ្លូវ ជនសង្ស័យបាន ឌុបនាងចូលទៅក្នុងព្រៃបម្រុងចាប់រំលោភ តែត្រូវបាននាងលោតចុះពីលើម៉ូតូ ហើយជនសង្ស័យក៏បាន និយាយលួងលោមឲ្យនាងឡើងជិះម៉ូតូជាមួយរហូតទៅដល់ផ្សារកំពង់ថ្ម ហើយក៏ឌុបនាងចូលទៅដេកនៅ ផ្ទះសំណាក់តារាស៊ីខាង ដោយប្រាប់នាងថា ឪពុករបស់នាងស្នាក់នៅទីនោះ ពេលចូលដេកក្នុងបន្ទប់មួយ មាន(គ្រែ២) ដោយយប់ជ្រៅផងនោះ នាងក៏ដេកលក់ទៅ។
ពេលកំពុងតែដេកស្រាប់តែជនសង្ស័យ បានយកខ្នើយមកខ្ទប់មុខរបស់នាង រួចហើយចាប់សម្រាតខោ ហើយគំរាមកុំឲ្យស្រែក នាងក៏មិនហ៊ានស្រែក ពេលនោះជនសង្ស័យបានចាប់រំលោភនាងរហូតបានសម្រេច។ លុះព្រឹកឡើងនាងក៏បានមកដាក់ពាក្យប្តឹងសមត្ថកិច្ចឲ្យចាប់ខ្លួនជនសង្ស័យតែម្តង។ ក្រោយពីបានទទួលពាក្យបណ្តឹងពីជនរងគ្រោះ សមត្ថកិច្ចបានទៅអន្តរាគមន៍ភ្លាមៗ ឃាត់ខ្លួនជនសង្ស័យមកសាកសួរនៅអធិការដ្ឋាននគរបាលស្រុក។ នៅចំពោះមុខសមត្ថកិច្ចជនសង្ស័យបានសារភាពថា រូបគេពិតជាបានរំលោភនាងពិតប្រាកដមែន ដោយសារតែរូបគេធ្វើការជាមួយគ្នាយូរៗទៅក៏ស្រឡាញ់នាង៕
ចែករំលែកព័តមាននេះ