រាជធានីភ្នំពេញ ៖ អនុវត្ដតាមបទបញ្ជារបស់ថ្នាក់ដឹកនាំអគ្គស្នងការដ្ឋាននគរបាលជាតិនិងដឹកនាំបញ្ជាផ្ទាល់ដោយលោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន កម្លាំងមន្ទីរប្រឆាំងគ្រឿងញៀន សហការជាមួយសមត្ថកិច្ចគយនិងរដ្ឋាករ ប្រចាំអាកាសយានដ្ឋានអន្តរជាតិភ្នំពេញ(ច្រកអ្នកដំណើរចេញ)ក្រោមការសម្របសម្រួលពីលោក ស៊ិត…
រាជធានីភ្នំពេញ ៖ អនុវត្ដតាមបទបញ្ជារបស់ថ្នាក់ដឹកនាំអគ្គស្នងការដ្ឋាននគរបាលជាតិនិងដឹកនាំបញ្ជាផ្ទាល់ដោយលោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន កម្លាំងមន្ទីរប្រឆាំងគ្រឿងញៀន សហការជាមួយសមត្ថកិច្ចគយនិងរដ្ឋាករ ប្រចាំអាកាសយានដ្ឋានអន្តរជាតិភ្នំពេញ(ច្រកអ្នកដំណើរចេញ)ក្រោមការសម្របសម្រួលពីលោក ស៊ិត វណ្ណ: ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កាលពីថ្ងៃទី១៧ ខែមិថុនា ឆ្នាំ២០២៥កន្លងទៅ បានបង្ក្រាបករណីដឹកជញ្ជូនកញ្ឆាក្រៀមជិត ២០គីឡូក្រាម បម្រុងឆ្លងដែនទៅក្រៅប្រទេស តាមជើងហោះហើរនៅអាកាសយានដ្ឋានអន្តរជាតិភ្នំពេញ ។
នៅក្នុងការបង្ក្រាបនេះ សមត្ថកិច្ចបានឃាត់ខ្លួនឈ្មួញគ្រឿងញឿនម្នាក់ជាបុរសជនជាតិអង់គ្លេស អាយុ៤១ឆ្នាំ ដោយចាប់យកកញ្ឆាក្រៀមចំនួន២២ដុំ មានទម្ងន់ស្មើនឹង ១៩គីឡូក្រាមនិង៩០២ក្រាម ។ ក្រោយពេលឃាត់ខ្លួនជនសង្ស័យនិងវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ។
គួរបញ្ជាក់ថា បើតាមការបញ្ជាក់របស់មន្ត្រីជំនាញ ក្នុងរយៈពេលប៉ុន្មានសប្តាហ៍ចុងក្រោយនេះ ពួកឧក្រិដ្ឋជនធ្វើសកម្មភាពដឹកជញ្ជូនកញ្ឆាក្រៀមឆ្លងដែន មានការកើនឡើងគួរឲ្យកត់សម្គាល់ ហើយបើតាមការស៊ើបអង្កេត កញ្ឆាក្រៀមទាំងនេះមានប្រភពមកពីប្រទេសថៃ ។
មន្ទីរប្រឆាំងគ្រឿងញៀនបញ្ជាក់ថា ការជួញដូរ ការដឹកជញ្ជូន ការរក្សាទុក និងការដាំដុះកញ្ឆានៅប្រទេសកម្ពុជា គឺជាអំពើខុសច្បាប់ ដែលមានចែងនៅក្នុងច្បាប់ស្ដីពីការត្រួតពិនិត្យគ្រឿងញៀនឆ្នាំ២០១២ ៕
ចែករំលែកព័តមាននេះ