ទីក្រុងម៉ូស្គូ៖ វិមានក្រឹមឡាំងចេញមុខបដិសេធពាក្យចចាមអារ៉ាមដែលចុះផ្សាយតាមសារព័ត៌មានថារុស្ស៊ីកំពុងបែកបាក់ផ្ទៃក្នុងរវាងលោកពូទីន និងរដ្ឋមន្ត្រីការបរទេស។ ពាក្យចចាមអារ៉ាមនិយាយថាលោកពូទីន និងប្រមុខការទូតរបស់គាត់ធ្វើការលែងចុះសម្រុងនឹងគ្នាតទៅទៀតហើយ ហើយលោកពូទីនក៏លែងត្រូវការរដ្ឋមន្ត្រីរូបនេះធ្វើការជាមួយតទៅទៀតដែរ។
បានជាមានពាក្យចចាមអារ៉ាមនោះព្រោះមុនគម្រោងជួបគ្នារវាងលោកពូទីន និងលោកត្រាំនៅទីក្រុងប៊ូដាប៉ែស ប្រទេសហុងគ្រី ប្រមុខការទូតអាមេរិក និងរុស្ស៊ីបានសន្ទនាគ្នាតាមទូរស័ព្ទ។ ក្រោយពេលសន្ទនាគ្នារួច លោកត្រាំប្រកាសលុបចោលគម្រោងជួបគ្នាកម្រិតកំពូលជាមួយលោកពូទីន។ ក្រោយមក លោកត្រាំប្រកាសដាក់ទណ្ឌកម្មសេដ្ឋកិច្ចលើប្រទេសរុស្ស៊ីថែមទៀត។
រដ្ឋមន្ត្រីរុស្ស៊ី លោកឡាវរ៉ូស ជាអ្នកការទូតជើងចាស់តាំងពីសម័យសហភាពសូវៀត និងជាមនុស្សមានសិល្ប៍វិធីក្នុងការចរចា។ នៅឯកិច្ចប្រជុំកាលពីពេលថ្មីៗនេះ គេមិនឃើញវត្តមានរបស់គាត់ទេ។ ចំណែកនៅឯកិច្ចប្រជុំកំពូលជីម្ភៃ (G20) ដែលនឹងរៀបចំឡើងនៅអាហ្វ្រិកខាងត្បូងនាចុងខែវិច្ឆិកា លោកពូទីននឹងមិនទៅចូលរួមទេ។ ជានិច្ចកាល បើលោកពូទីនមិនបានទៅចូលរួម លោកច្រើនចាត់លោកឡាវរ៉ូសទៅជំនួស។ ប៉ុន្តែលើកនេះ លោកពូទីនចាត់អ្នកផ្សេងទៅជំនួស។
ក្រសួងការបរទេសរុស្ស៊ីមិនបានបញ្ជាក់ថាលោកឡាវរ៉ូសមានផែនការធ្វើដំណើរទៅទីណាខ្លះ ឬចូលរួមនៅក្នុងវេទិកាណាខ្លះនៅសប្ដាហ៍ក្រោយ។ សភាពការណ៍នេះហើយដែលធ្វើឱ្យមានពាក្យចចាមអារ៉ាមថាលោកឡាវរ៉ូសដែលកាន់តំណែងជារដ្ឋមន្ត្រីការបរទេសរុស្ស៊ីរយៈពេលជាង២០ឆ្នាំមកហើយនោះប្រហែលជាលែងស្ថិតនៅក្នុងក្រសែភ្នែករបស់លោកពូទីនតទៅទៀតហើយដោយសារគម្រោងជួបគ្នានៅប៊ូដាប៉ែសត្រូវលុបចោល។
ដូច្នេះដើម្បីឱ្យអស់សង្ស័យ អ្នកសារព័ត៌មានបានទាក់ទងទៅវិមានក្រឹមឡាំងដើម្បីស្នើសុំការឆ្លើយបំភ្លឺ។ នៅពេលសួរថាតើលោកឡាវរ៉ូសមានរឿងអ្វីកើតឡើង? អ្នកនាំពាក្យវិមានក្រឹមឡាំង លោកប៉េស្កូស ថ្លែងថាពាក្យចចាមអារ៉ាមនោះមិនពិតទេ។ លោកសូមឆ្លើយដោយសង្ខេបថាអ្វីដែលបានចុះផ្សាយនោះមិនមែនជាការពិត។ នៅពេលសួរថាតើលោកឡាវរ៉ូសនឹងបន្តកាន់តំណែងរបស់គាត់ដដែល ឬយ៉ាងណា លោកប៉េស្កូសឆ្លើយថាប្រាកដណាស់ លោកឡាវរ៉ូសនឹងបន្តកាន់តំណែងជារដ្ឋមន្ត្រីការបរទេស។ នេះបើយោងការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ