ទីក្រុងវ៉ាស៊ីនតោន៖ អាមេរិក និងអ៊ីស្រាអែលចោទប្រកាន់ថាអ៊ីរ៉ង់រៀបផែនការធ្វើឃាតឯកអគ្គរដ្ឋទូតអ៊ីស្រាអែលប្រចាំប្រទេសម៉ិកស៊ីកូ។ នេះជាសញ្ញាមិនល្អទាល់តែសោះ។ ស្រួលមិនស្រួលប្រទេសទាំង២ (អ៊ីរ៉ង់ និងអ៊ីស្រាអែល) អាចនឹងមានរឿងត្រូវជម្រះបញ្ជីគ្នា ហើយអាចនឹងឈានទៅដល់ការផ្ទុះសង្គ្រាមជាថ្មី។ អ៊ីស្រាអែលអះអាងថាអាជ្ញាធរម៉ិកស៊ីកូអាចធ្វើអន្តរាគមន៍ទាន់ពេលវេលាដើម្បីទប់ស្កាត់មិនឱ្យការប៉ុនប៉ងធ្វើឃាតនោះបានសម្រេចទេ។
ក្រសួងការបរទេសអ៊ីស្រាអែលអរគុណភ្នាក់ងារសន្តិសុខ និងមន្ត្រីអនុវត្តច្បាប់របស់ម៉ិកស៊ីកូដែលខិតខំទប់ស្កាត់ក្រុមភេរវកម្មជាខ្សែបណ្ដាញដែលទទួលបញ្ជាពីប្រទេសអ៊ីរ៉ង់។ មន្ត្រីរដ្ឋាភិបាលអាមេរិកម្នាក់ថ្លែងថាឆ្មាំបដិវត្តអ៊ីរ៉ង់បានរៀបចំផែនការធ្វើឃាតនេះតាំងពីចុងឆ្នាំ២០២៤។ ផែនការនោះរួមមានការចាត់តាំងភ្នាក់ងារសម្ងាត់ដើម្បីចេញប្រតិបត្តិការពីស្ថានទូតអ៊ីរ៉ង់ប្រចាំប្រទេសវេណេហ្ស៊ូអេឡា។ ប្រធានាធិបតីវេណេហ្ស៊ូអេឡាមានទំនាក់ទំនងល្អជាមួយអ៊ីរ៉ង់ព្រោះជាក្រុមប្រឆាំងអាមេរិកដូចគ្នា។
មន្ត្រីរដ្ឋាភិបាលអាមេរិកម្នាក់ដែលស្នើសុំមិនបញ្ចេញឈ្មោះបញ្ជាក់ថាផែនការនោះត្រូវបានទប់ស្កាត់ទាំងស្រុងហើយ។ ដូច្នេះមិនបង្កការគំរាមកំហែងអ្វីតទៅទៀតទេ។ នេះជាឧទាហរណ៍ថ្មីបំផុតដែលបង្ហាញថាអ៊ីរ៉ង់មានប្រវត្តិជាយូរមកហើយក្នុងការតាមធ្វើឃាតក្រុមអ្នកការទូត, អ្នកសារព័ត៌មាន, អ្នកចុះចូលជាមួយរដ្ឋបរទេស និងអ្នកដែលហ៊ានចេញមុខប្រឆាំងរដ្ឋាភិបាលទីក្រុងតេអេរ៉ង់។ នេះជារឿងដែលគួរឱ្យព្រួយបារម្ភសម្រាប់គ្រប់ប្រទេសទាំងអស់ដែលមានវត្តមានរបស់អ៊ីរ៉ង់។
មន្ត្រីខាងលើនេះមិនបានផ្ដល់ភស្តុតាងលម្អិតទេ ហើយក៏មិនបានបញ្ជាក់ថាតើផែនការធ្វើឃាតនេះត្រូវបានទប់ស្កាត់ដោយវិធីណាដែរ។ ការធ្វើឃាតនេះសមនឹងបានសម្រេចតាំងពីក្រោយថ្ងៃទី១ ខែមេសា ឆ្នាំ២០២៤ នៅពេលអ៊ីស្រាអែលវាយប្រហារអគារស្ថានទូតអ៊ីរ៉ង់ប្រចាំទីក្រុងដាម៉ាស់ ប្រទេសស៊ីរី បណ្ដាលឱ្យស្លាប់ឆ្មាំបដិវត្តអ៊ីរ៉ង់មួយចំនួន។ ក្រោយមក អ៊ីរ៉ង់ប្រកាសថាខ្លួននឹងសងសឹក។ បន្ទាប់ពីប្រកាសមិនបានប៉ុន្មានផង អ៊ីរ៉ង់វាយប្រហារអ៊ីស្រាអែលដោយមីស៊ីល និងដ្រូនជាច្រើនគ្រឿង។ នេះបើយោងតាមប្រភពពីឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ