ខេត្តបន្ទាយមានជ័យ ៖ ភ្ញៀវទេសចរអន្តរជាតិដែលចេញចូលមកទស្សនាកម្ពុជា តាមច្រកទ្វារអន្តរជាតិប៉ោយប៉ែតក្នុងខែមេសាឆ្នាំនេះ មានចំនួនជិត៨ម៉ឺននាក់ បើធៀបនឹងខែមីនានៃឆ្នាំដដែល ថយចុះ៦,៦% ។ នេះបើយោងតាមរបាយការណ៍របស់មន្ទីរទេសចរណ៍ខេត្ត ។
របាយការណ៍បានបញ្ជាក់ថា ក្នុងខែមេសា កន្លងទៅនេះ ភ្ញៀវចេញចូលមកកម្ពុជាតាមច្រកទ្វារអន្តរជាតិប៉ោយប៉ែត រយៈពេល៣០ថ្ងៃ សរុបចំនួន៧៨.៤៣៣នាក់ ក្នុងនោះភ្ញៀវចូលមកកម្ពុជាមានចំនួន៣៣.៩៣៦នាក់ និងភ្ញៀវចេញពីប្រទេសមានចំនួន៤៤.៤៩៧នាក់។ បើធៀបនឹងខែមីនានៃឆ្នាំដដែល មានចំនួន៨៤.០២៥នាក់ ក្នុងនោះភ្ញៀវចូលមកមានចំនួន៤១.៦៩៣នាក់ និងភ្ញៀវចេញពីប្រទេសមានចំនួន៤២.៣៣២ ។
របាយការណ៍ក៏បានឲ្យដឹងដែរថា ភ្ញៀវបរទេសចូលមកលេងកាស៊ីណូក្រុងប៉ោយប៉ែត ក្នុងខែមេសាឆ្នាំនេះ មានចំនួន៣៩.២៩៨នាក់ គិត១ថ្ងៃជាមធ្យមមានចំនួន១.៣០៩នាក់ ប្រៀបធៀបនឹងខែមីនា ឆ្នាំ២០១៨ មានចំនួន៣៣.៧៥៥នាក់ ជាមធ្យម១ថ្ងៃមានចំនួន១.១២៥នាក់ កើនឡើង១៦,៤២% ។
ចំពោះភ្ញៀវទេសចរអន្តរជាតិដែលមកទស្សនាកម្ពុជាភាគច្រើនឆ្ពោះមកកាន់តំបន់អាទិភាពសំខាន់ៗរួមមាន រាជធានីភ្នំពេញ, សៀមរាបអង្គរ, តំបន់ឆ្នេរសមុទ្រ និងតំបន់អេកូទេសចរណ៍ភូមិភាគឦសាន ។
បើទោះបីជាការមកដល់នៃភ្ញៀវទេសចរអន្តរជាតិតាមច្រកទ្វារមួយនេះមានការថយចុះបន្ដិច ប៉ុន្ដែបើគិតពីតួលេខនៃចំនួនភ្ញៀវទេសចរអន្តរជាតិសរុបដែលមកទស្សនានៅកម្ពុជាវិញ ក្នុងរយៈពេល២ខែដំបូងនៃដើមឆ្នាំនេះ មានចំនួន១.១៣៩.១៧៨នាក់ កើនឡើងប្រមាណ១១,១% បើធៀបនឹងរយៈពេលដូចគ្នាឆ្នាំ២០១៧។ ក្នុងនោះ ភ្ញៀវទេសចរចិននៅតែឈរលំដាប់ទី១ ក្នុងចំណោមទីផ្សារទេសចរណ៍សំខាន់ៗទាំង១០របស់កម្ពុជា ។ នេះបើយោងតាមរបាយការណ៍ក្រសួងទេសចរណ៍ ។
កំណើនភ្ញៀវទេសចរអន្តរជាតិដែលបន្ដកើនឡើងនេះ បើតាមប្រតិបត្តិករទេសចរណ៍ក្នុងវិស័យឯកជនបានលើកឡើងថា ដោយសារតែការភ្ជាប់ជើងហោះហើរតាមគោលដៅជាច្រើននៅក្នុងតំបន់អាស៊ី ។
លោក ហូ វណ្ឌី បានថ្លែងប្រាប់កោះសន្ដិភាពថា ៖«អំឡុងពេលនេះ ជាពេលដែលមានភ្ញៀវតិច ក៏ប៉ុន្ដែយើងឃើញការមកដល់នៃភ្ញៀវទេសចរបរទេសចូលទស្សនាមានកំណើនខ្ពស់ ។ នេះដោយសារតែកម្ពុជាបានភ្ជាប់ជើងហោះហើរតាមគោលដៅសហគមន៍របស់យើងនៅអាស៊ី ជាពិសេសប្រទេសចិន » ៕
ចែករំលែកព័តមាននេះ