រាជធានីភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលខណ្ឌពោធិ៍សែនជ័យ សហការជាមួយនគរបាលខណ្ឌទួលគោកឃាត់ខ្លួន បន្ទាប់ពីធ្វើសកម្មភាពលួចម៉ូតូបានពីខេត្តព្រះសីហនុ ប្រុងយកមកលក់នៅភ្នំពេញ។
ហេតុការណ៍តាមប្រមាញ់ក្រុមចោរលួច បង្កអោយមានការភ្ញាក់ផ្អើលកាលពីវេលាម៉ោងប្រមាណ២រសៀលថ្ងៃទី០២ ខែឧសភា ឆ្នាំ២០២៤ នៅមុខកុងស៊ីបញ្ចាំមួយកន្លែងក្នុងតំបន់ឃ្លាំងរំសេវ ផ្លូវលេខ ២០៤ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។
ជនសង្ស័យរូបនោះ ភ្លាមៗពុំទាន់ស្គាល់អត្តសញ្ញាណនៅឡើយ ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ១KB-០២៣៧មួយគ្រឿង ដែលសមត្ថកិច្ចអះអាងថា ជារបស់ជនរងគ្រោះ ដែលជនសង្ស័យលួចបាន ។
តាមព័ត៌មានបានអោយដឹងថា ជនសង្ស័យទាំង២នាក់បានធ្វើសកម្មភាពលួចម៉ូតូ១គ្រឿងតាំងពីខេត្តព្រះសីហនុ ហើយជិះមកភ្នំពេញ គោលបំណងយកមកលក់ឬបញ្ចាំនៅឃ្លាំងរំសេវ ។ តាម
រយប្រព័ន្ធ GPS ជនរងគ្រោះក៏បានតាមមកភ្នំពេញ ហើយប្តឹងនគរបាលខណ្ឌពោធិ៍សែនជ័យ អោយជួយអន្តរាគមន៍ និងឈានទៅសហការជាមួយនគរបាលខណ្ឌទួលគោកឃាត់ខ្លួនបាន ២នាក់ ខណៈពេលដែលជនសង្ស័យជិះម៉ូតូ យកមកលក់ឬបញ្ចាំនៅកុងស៊ី ។
នៅក្នុងហេតុការណ៍ខាងលើ បង្កអោយមានការភ្ញាក់ផ្អើលយ៉ាងខ្លាំងផងដែរ ។ បន្ទាប់ពីឃាត់ខ្លួន នគរបាលក៏បានបញ្ជូនទៅកាន់អធិការដ្ឋានខណ្ឌពោធិសែនជ័យ ដើម្បីសួរនាំ រួចបញ្ជូនបន្តទៅកាន់ខេត្តព្រះសីហនុ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ