រាជធានីភ្នំពេញ ៖ ដោយសារតែអាកាសធាតុក្តៅខ្លាំង ជាហេតុធ្វើឲ្យមានការព្រួយបារម្ភយ៉ាងខ្លាំងអំពីសុវត្ថិភាព និងសុខភាពសិក្សានុសិស្សជិត២,០០០នាក់ ដែលកំពុងតែសិក្សារៀនសូត្រនៅក្នុងសាលារបស់ខ្លួននោះ ។ លោកនាយក លោកគ្រូ អ្នកគ្រូ…
រាជធានីភ្នំពេញ ៖ ដោយសារតែអាកាសធាតុក្តៅខ្លាំង ជាហេតុធ្វើឲ្យមានការព្រួយបារម្ភយ៉ាងខ្លាំងអំពីសុវត្ថិភាព និងសុខភាពសិក្សានុសិស្សជិត២,០០០នាក់ ដែលកំពុងតែសិក្សារៀនសូត្រនៅក្នុងសាលារបស់ខ្លួននោះ ។ លោកនាយក លោកគ្រូ អ្នកគ្រូ នៃសាលាបឋមសិក្សាព្រៃស្ពឺ ស្ថិតនៅក្នុងភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ បានរិះរកវិធី ដើម្បីកាតបន្ថយកម្ដៅ ។
ពួកគាត់បានស្នើសុំទៅកាន់ក្រុមសង្គ្រោះអង្គភាព៧១១ កងពលតូចលេខ៧០ឲ្យជួយយករថយន្តពន្លត់អគ្គិភ័យទៅជួយបាញ់ទឹកដាក់លើដំបូលអគារសាលា ព្រមទាំងបរិវេណសាលារបស់ខ្លួន ។ ស្របតាមការបម្រែបម្រួលអាកាសធាតុកម្ដៅកើនឡើងខ្លាំងបែបនេះ ដែលធ្វើឲ្យសិស្សពិបាកទ្រាំ ជាពិសេស សិស្សតូចៗ ដែលកំពុងសិក្សានៅទីនោះ។
យោងតាមក្រុមសង្គ្រោះអង្គភាព៧១១ កងពលតូចលេខ៧០ បានប្រាប់ឲ្យដឹងថា តបតាមការស្នើសុំខាងលើ នៅវេលារសៀលថ្ងៃទី០២ ខែឧសភា ឆ្នាំ២០២៤នេះ ក្រុមសង្គ្រោះអង្គភាព៧១១ ក៏បានបញ្ចេញរថយន្តពន្លត់អគ្គិភ័យ១គ្រឿងទៅកាន់សាលានោះ ដើម្បីបាញ់ទឹកទៅតាមសំណូមពរ របស់លោកនាយកសាលានិងលោកគ្រូអ្នកគ្រូខាងលើហើយ ។
លោកនាយកសាលាបឋមសិក្សាព្រៃស្ពឺបានប្រាប់ឱ្យក្រុមសង្គ្រោះអង្គភាព៧១១ដឹងផងដែរថា នៅក្នុងឆ្នាំសិក្សា២០២៣-២០២៤នេះ នៅក្នុងសាលាបឋមសិក្សាព្រៃស្ពឺ មានសិក្សានុសិស្សកំពុងសិក្សាសរុបចំនួន១,៧៩៨នាក់ ។ ចំណែកលោកគ្រូអ្នកគ្រូសរុបចំនួន២៦នាក់ ហើយលោកនាយកសាលានិងលោកគ្រូអ្នកគ្រូ ក៏បានថ្លែងអំណរគុណដល់ក្រុមសង្គ្រោះអង្គភាព៧១១ផងដែរ ដែលបានបញ្ចេញរថយន្ពន្លត់អគ្គិភ័យបាញ់ទឹកកាត់បន្ថយកម្ដៅនៅក្នុងសាលាទាំងមូលនេះ ៕
ចែករំលែកព័តមាននេះ