ទីក្រុងម៉ូស្គូ៖ លោកពូទីនថ្លែងថាលោកមិនដែលប្រកែកថាមិនចរចាគ្នាដើម្បីបញ្ចប់សង្គ្រាមអ៊ុយក្រែនម្ដងណាទេ។ ណាស់តែអ៊ុយក្រែនទេតើដែលចូលចិត្តបោះបង់ចោលការចរចាគ្នាទាំងកណ្ដាលទី។ លោកថ្លែងថាកាលពីពេលកន្លងមក អ៊ុយក្រែនច្រើនមានទម្លាប់មួយ។ នៅពេលកំពុងចរចាគ្នាសុខៗ អ៊ុយក្រែនដើរចេញពីតុចរចា ហើយងាកទៅធ្វើសង្គ្រាមជាបន្តទៀត។ មូលហេតុដោយសារពួកគេស្ដាប់តាមការនិយាយចាក់រុកពីក្រុមបស្ចិមប្រទេស។
លោកបាននិយាយរំលឹកថាតាមពិតទៅរុស្ស៊ីធ្លាប់វាយសឹងតែយកបានទីក្រុងកៀវបាត់ទៅហើយតាំងពីរដូវផ្ការីកឆ្នាំ២០២២។ ប៉ុន្តែដោយសារជឿលង់តាមពាក្យសម្ដីបោកបញ្ឆោតរបស់អ៊ុយក្រែន រុស្ស៊ីសុខចិត្តយល់ព្រមដកកងទ័ពរបស់ខ្លួនថយមកវិញបន្ទាប់ពីអ៊ុយក្រែនដាក់លក្ខខណ្ឌថារុស្ស៊ីត្រូវតែធ្វើដូច្នេះទើបខ្លួនយល់ព្រមចូលតុចរចាគ្នា។ ប៉ុន្តែមានអីចឹងឯណា។ បន្ទាប់ពីរុស្ស៊ីបន្ធូរដៃតែបន្តិច អ៊ុយក្រែនចាប់ផ្ដើមឡើងចាងភ្លាម។ ខាងលើនេះជាអ្វីដែលលោកពូទីនថ្លែងប្រាប់អ្នកសារព័ត៌មាន។
នៅក្នុងដំណើរទស្សនកិច្ច២ថ្ងៃទៅប្រទេសចិន លោកពូទីនហាក់ដូចជានិយាយលើកជើងប្រទេសចិននៅក្នុងបញ្ហាអ៊ុយក្រែនព្រោះចិនបានជួយរុស្ស៊ីច្រើនណាស់ក្នុងការបន្ធូរបន្ថយសម្ពាធសេដ្ឋកិច្ច។ មែនទែនទៅ ប្រទេសទាំង២កំពុងជិះនៅលើទូកតែមួយទៅហើយឥឡូវនេះ។ លោកពូទីនបានលើកយកបញ្ហាអ៊ុយក្រែនទៅជជែកគ្នាជាមួយលោកស៊ីជីនពីង។ លោកថាលោកពេញចិត្តនឹងជំហររបស់ចិនដែលមានភាពស្មោះត្រង់ប្រាកដប្រជា និងចេះបត់បែនយ៉ាងប៉ិនប្រសប់ទៅតាមកាលៈទេសៈ។
លោកថាយើងមានមូលដ្ឋានច្បាស់លាស់ហើយនៅក្នុងការចរចាគ្នា។ នោះគឺគម្រោងគោលៗដែលយើងធ្លាប់បានព្រមព្រៀងគ្នាតាំងពីពេលចរចានៅទីក្រុងអ៊ីស្តាន់ប៊ុល ប្រទេសតួកគីមកម៉្លេះ។ ប៉ុន្តែអ៊ុយក្រែន និងក្រុមសម្ព័ន្ធមិត្តលោកខាងលិចទេតើដែលយកកិច្ចព្រមព្រៀងនោះគ្រវាត់ចោលទៅក្នុងធុងសំរាម។
ចំពោះសន្និសីទអន្តរជាតិស្ដីពីបញ្ហាអ៊ុយក្រែនដែលគ្រោងរៀបចំនៅប្រទេសស្វីសនោះ លោកពូទីនសូមមិនធ្វើអត្ថាធិប្បាយថាសន្និសីទនោះនឹងទាមទារឱ្យរុស្ស៊ីធ្វើបែបណាទេ។ មូលហេតុដោយសារគេមិនបានអញ្ជើញភាគីរុស្ស៊ីឱ្យចូលរួម។ ដូច្នេះ បើទុកជាសន្និសីទនេះចេញលទ្ធផលអ្វីក៏ដោយ ឬដាក់ឱសានវាទអ្វីក៏ដោយ ទីក្រុងម៉ូស្គូសូមចេញមុខជំទាស់ទុកជាមុន។
លោកក៏បានកោតសរសើរគំនិតផ្ដួចផ្ដើមឱ្យមានបទឈប់បាញ់ជាបណ្ដោះអាសន្ននៅអ៊ុយក្រែននៅពេលប្រកួតកីឡាអូឡាំពិចនៅប្រទេសបារាំងចាប់ពីថ្ងៃទី២៦ ខែកក្កដាដល់ថ្ងៃទី១១ ខែសីហា ឆ្នាំ២០២៤។ សំណើនេះផ្ដួចផ្ដើមឡើងដោយប្រធានាធិបតីបារាំង លោកម៉ាក្រុង។ នៅពេលលោកស៊ីជីនពីងអញ្ជើញទៅបំពេញទស្សនកិច្ចនៅអឺរ៉ុបដោយចាប់ផ្ដើមពីប្រទេសបារាំងមុនគេ លោកម៉ាក្រុងក៏ឆ្លៀតលើកឡើងនូវសំណើនេះតែម្ដង។
ឥឡូវនេះ នៅលើសមរភូមិជាក់ស្ដែងនៃតំបន់ខាគីវ រុស្ស៊ីអះអាងថាកងទ័ពរបស់ខ្លួនវាយយកបានភូមិចំនួន១២ត្រឹមតែរយៈពេលមួយសប្ដាហ៍គិតចាប់ពីថ្ងៃសុក្រសប្ដាហ៍មុន។ កងទ័ពរុស្ស៊ីកំពុងវាយសម្រុកទៅមុខជាបន្តទៀត។ ប៉ុន្តែលោកពូទីនសូមបញ្ជាក់ថាលោកគ្មានគម្រោងកាន់កាប់តំបន់ខាគីវទេ។ លោកគ្រាន់តែចង់បង្កើតតំបន់ទ្រនាប់មួយដើម្បីឱ្យមានគំលាតឆ្ងាយគ្រប់គ្រាន់ពីទីក្រុងម៉ូស្គូ និងដើម្បីកុំឱ្យអ៊ុយក្រែនវាយប្រហារដល់ទីក្រុងនេះតែប៉ុណ្ណោះ៕
ចែករំលែកព័តមាននេះ