រាជធានីភ្នំពេញ ៖ មន្ត្រីក្រសួងទេសចរណ៍បានឲ្យដឹងថា រហូតមកដល់ពេលនេះ នៅកម្ពុជា មានសហគមន៍ទេសចរណ៍ និងអេកូទេសចរណ៍ប្រមាណ៥៦ហើយ ដែលបាននិងកំពុងធ្វើសកម្មភាពយ៉ាងសកម្មនៅក្នុងការចូលរួម ចំណែកលើកស្ទួយជីវភាពប្រជាពលរដ្ឋ និងអភិវឌ្ឍន៍វិស័យទេសចរណ៍…
រាជធានីភ្នំពេញ ៖ មន្ត្រីក្រសួងទេសចរណ៍បានឲ្យដឹងថា រហូតមកដល់ពេលនេះ នៅកម្ពុជា មានសហគមន៍ទេសចរណ៍ និងអេកូទេសចរណ៍ប្រមាណ៥៦ហើយ ដែលបាននិងកំពុងធ្វើសកម្មភាពយ៉ាងសកម្មនៅក្នុងការចូលរួម ចំណែកលើកស្ទួយជីវភាពប្រជាពលរដ្ឋ និងអភិវឌ្ឍន៍វិស័យទេសចរណ៍ ។
ប្រធាននាយកដ្ឋានអភិវឌ្ឍន៍ទេសចរណ៍នៃក្រសួងទេសចរណ៍ លោក ជុក ជំនោ បានឲ្យដឹងកាលពីថ្ងៃទី២២ ឧសភា ម្សិលមិញថា សហគមន៍ទេសចរណ៍ដែលត្រូវបានទទួលស្គាល់ដោយក្រសួង និងមន្ទីរទេសចរណ៍ខេត្ត-ក្រុង មានចំនួន៥៦ ខណៈដែលសហគមន៍ទាំងនោះបាននិងកំពុងបង្ហាញសក្តានុពលក្នុងការលើក កម្ពស់កម្រិតជីវភាពពលរដ្ឋនៅតាមមូលដ្ឋាន និងរួមចំណែកអភិវឌ្ឍន៍វិស័យទេសចរណ៍ផងដែរ ។
លោកបានបញ្ជាក់ថា ៖« ដោយសារសកម្មភាពដ៏មមាញឹកនោះហើយ ទើបសហ គមន៍ទេសចរណ៍ត្រូវប្រឈមនឹងបញ្ហាមួយចំនួនដែលត្រូវដោះស្រាយឲ្យទាន់ពេលវេលា ហើយកត្តាសំខាន់ គឺសមត្ថភាពជំនាញរបស់មន្ត្រីសហគមន៍មិនទាន់ឈានដល់កម្រិតស្តង់ដានៅឡើយ » ។ លោកថា ៖« ប្រសិនបើសហគមន៍ទេសចរណ៍មិនមានសមត្ថភាពគ្រប់គ្រាន់ទេនោះ ការអូសទាញភ្ញៀវទេសចរទៅកាន់តំបន់រមណីយដ្ឋាន ក៏ដូចជាតំបន់អេកូទេសចរណ៍ ប្រាកដជានៅមានកម្រិតទាបដែរ។ ដូច្នេះ ក្រសួងទេសចរណ៍ រួមទាំងស្ថាប័នជំនាញពាក់ព័ន្ធកំពុងតែយកចិត្តទុកដាក់ជួយពួកគាត់ សំខាន់ជួយបណ្តុះបណ្តាលធនធានមនុស្ស » ។
ទោះជាមានបញ្ហាប្រឈមយ៉ាងនេះក្ដី លោក ជុក ជំនោ បានកត់សម្គាល់យ៉ាងដូច្នេះថា ៖«យើងសង្កេតឃើញសហគមន៍មួយចំនួនបានធ្វើសកម្មភាពល្អច្រើន ហើយប្រកបដោយស្តង់ដាថែមទៀត ដូចជា សហគមន៍ជីផាត នៅក្នុង ខេត្តកោះកុង, សហគមន៍ចំបក់ ក្នុងខេត្តកំពង់ស្ពឺ, សហគមន៍កោះទ្រង់ នៅខេត្តក្រចេះ និងសហគមន៍បន្ទាយឆ្មារ នៅខេត្តបន្ទាយមានជ័យជាដើម ដែលសហគមន៍ទាំងអស់នោះមានការ អភិវឌ្ឍមែនទែន ក្នុងការទាក់ទាញភ្ញៀវទេសចរ សំខាន់ទេសចរអន្តរជាតិ » ។
លោកបញ្ជាក់ថា ចំណុចល្អរបស់សហគមន៍ទាំងនោះ គឺការអូសទាញប្រជាពលរដ្ឋឲ្យចូលរួមក្នុងការអភិវឌ្ឍសហគមន៍ ។ ការកែប្រែមុខរបររបស់ប្រជាពលរដ្ឋឲ្យបោះបង់មុខរបរដើម ដែលមិនសមស្រប ឲ្យងាកមកចាប់យកមុខរបរទាក់ទងនឹងវិស័យទេសចរណ៍វិញ ។
លោកនិយាយថា ៖« សហគមន៍ទាំងអស់ខាងលើនេះ ជាសហគមន៍ដែលទទួលបានជោគជ័យលើការងារជំនាញរបស់ខ្លួន » ។
យោងតាមរបាយការណ៍ក្របខ័ណ្ឌគោលនយោបាយម៉ាក្រូសេដ្ឋកិច្ច វិស័យទេសចរណ៍ត្រូវបានរំពឹងថា បន្តងើបឡើងក្នុងអត្រាកំណើន៤,៥%ក្នុងឆ្នាំ២០១៨ និង៤,៧%ក្នុងឆ្នាំ២០១៩ ដោយសារកំណើនខ្ពស់នៃចំនួនភ្ញៀវទេសចរអន្តរជាតិ ជាពិសេស ទេសចរពីតំបន់អាស៊ី, ការខិតខំប្រឹងប្រែងរបស់រាជរដ្ឋាភិបាលក្នុងការផ្សព្វផ្សាយ, ការលើកទឹកចិត្តឲ្យមានការបើកជើងហោះហើរត្រង់ និងការដាក់ចេញនូវគោលនយោបាយនានា ក្នុងគោលបំណងទាក់ទាញភ្ញៀវទេសចរបន្ថែម ។ ទោះយ៉ាងនេះក្តី ការធ្វើពិពិធកម្មផលិតផល និងគោលដៅទេសចរណ៍ ព្រមទាំងការទាក់ទាញភ្ញៀវចំណាយខ្ពស់ នៅតែជាប្រការចាំបាច់ និងបន្ទាន់ សំដៅធានាចីរភាពកំណើននៃវិស័យនេះ ដើម្បីបន្តតួនាទីជាជន្ទល់សំខាន់មួយសម្រាប់ទ្រទ្រង់សេដ្ឋកិច្ចជាតិ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា និងជានាយកគ្រប់គ្រងក្រុមហ៊ុនទេសចរណ៍ World Express Tours & Travel លោក ហូ វណ្ឌី បានថ្លែង កត្តាដែលជំរុញកំណើនភ្ញៀវទេសចរ គឺដោយសារតែការភ្ជាប់ជើងហោះហើរតាមគោលដៅសហគមន៍នៅអាស៊ី ជាពិសេសពីប្រទេសចិន ។ ទន្ទឹមនឹងនេះ ដើម្បីទាក់ទាញភ្ញៀវទេសចរអន្តរជាតិមកទស្សនាកាន់តែច្រើនថែមទៀត គួរយកចិត្តទុកដាក់លើការការពារ និងការថែរក្សាបរិស្ថាន និងអនាម័យឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ ។
ក្រសួងទេសចរណ៍បានឲ្យដឹងថា ក្នុងរយៈពេល៣ខែដើមឆ្នាំ២០១៨ កម្ពុជាទទួលបានភ្ញៀវអន្តរជាតិចំនួនជាង១,៧លាននាក់ កើនឡើង១៣,៩% ក្នុងនោះភ្ញៀវទេសចរចិនមានចំនួន៥០៥.៩៤០នាក់ កើនឡើង៨៥,៣% ធៀបនឹងរយៈពេលដូចគ្នាឆ្នាំ២០១៧ ។
បើតាមការលើកឡើងរបស់រដ្ឋមន្ត្រីក្រសួងទេសចរណ៍បានព្យាករណ៍ថា កម្ពុជានឹងទទួលបានភ្ញៀវអន្តរជាតិប្រមាណ៦,២លាននាក់នៅឆ្នាំ២០១៨ និងប្រមាណ៧លាននាក់នៅឆ្នាំ២០២០ និងនាំមកនូវចំណូលសរុបប្រមាណ៥.០០០លានដុល្លារអាមេរិក បង្កើតនូវឱកាសការងារប្រមាណ១លាននាក់ និងភ្ញៀវទេសចរអន្តរជាតិប្រមាណ១៥លាននាក់នៅឆ្នាំ២០៣០ ដោយនាំមកនូវចំណូលសរុបប្រមាណ១០ពាន់លានដុល្លារអាមេរិក និងបង្កើតឱកាសការងារប្រមាណ២លាននាក់ ៕
ចែករំលែកព័តមាននេះ