ខេត្តព្រៃវែង ៖ ផ្លូវបេតុងចំនួន ៦ខ្សែ នៅទីប្រជុំជនអ្នកលឿង ក្នុងស្រុកពាមរក៍ ខេត្តព្រៃវែង ត្រូវទឹកជនលិចល្ហាចល្ហឹម ក្រោយភ្លៀងធ្លាក់មួយមេធំ នៅល្ងាចថ្ងៃទី០៤…
ខេត្តព្រៃវែង ៖ ផ្លូវបេតុងចំនួន ៦ខ្សែ នៅទីប្រជុំជនអ្នកលឿង ក្នុងស្រុកពាមរក៍ ខេត្តព្រៃវែង ត្រូវទឹកជនលិចល្ហាចល្ហឹម ក្រោយភ្លៀងធ្លាក់មួយមេធំ នៅល្ងាចថ្ងៃទី០៤ ខែមិថុនា ឆ្នាំ២០២៥នេះ ។
ពលរដ្ឋដែលមានទីលំនៅតាមបណ្ដោយផ្លូវបេតុងទាំងនោះ បានអោយដឹងថា ពួកគាត់ត្រូវធ្វើដំណើរឆ្លងកាត់ទឹកស្អុយ ដែលហូរចេញពីលូ ដោយសារតែការជនលិច ដោយជំនន់ទឹកភ្លៀងនេះ ឡើងស៊ាំទៅហើយ ព្រោះឲ្យតែមានភ្លៀង មិនថា តិច ឬច្រើន តែងតែជន់លិចផ្លូវបេតុង មុខផ្ទះពួកគាត់ជានិច្ច ហើយរឿងបែបនេះ បានកើតឡើងរាប់ឆ្នាំមកហើយ ។
ពលរដ្ឋទាំងអស់នោះ បានបញ្ជាក់ថា មូលហេតុ ដែលមានទឹកជន់លិចផ្លូវបេតុង ពេលមានភ្លៀងធ្លាក់ម្ដងៗនោះ គឺដោយសារតែប្រព័ន្ធលូ នៅអមសងខាងផ្លូវ បានកកស្ទះ ទៅដោយគំនរសំរាម និងភក់ល្បាប់ ហើយគ្មានអ្នកជួយស្ដារចេញ ទើបពេលមានភ្លៀងធ្លាក់ម្ដងៗ ទោះជាភ្លៀងតិចៗក៏ដោយ ក៏ធ្វើឲ្យមានទឹកជន់លិចផ្លូវដែរ ហើយពេលលិចម្ដងៗ មិនត្រឹមតែពិបាកធ្វើដំណើរឆ្លងកាត់នោះទេ សូម្បីតែដកដង្ហើម ក៏ពិបាកដែរ ព្រោះក្លិនទឹកស្អុយ ដែលហ៊ារចេញពីក្នុងលូ បានសាយភាយពាសពេញផ្លូវ ។
ពាក់ព័ន្ធបញ្ហានេះលោក ជុំ ជា មេឃុំព្រែកខ្សាយ(ខ) បានឲ្យដឹងនៅល្ងាចថ្ងៃទី៤ មិថុនានេះថា បញ្ហាស្ទះលូ ធ្វើឲ្យទឹកជនលិចផ្លូវ ពេលមានភ្លៀងម្ដងៗនេះ អាជ្ញាធរឃុំ ក៏បានឃើញដែរ ហើយបានប្រើប្រាស់កញ្ចប់ថវិកាមូលនិធិឃុំ ដាក់ដេញថ្លៃឱ្យក្រុមហ៊ុនម៉ៅការ ចុះជួយស្ដារ ប្រព័ន្ធលូទាំងអស់នេះហើយ ដែលតាមគម្រោង នឹងត្រូវស្ដារលូទាំងអស់សរុបប្រវែង ៣,៦០០ម៉ែត្រ ហើយតាមកិច្ចសន្យា ក្រុមហ៊ុនម៉ៅការ ត្រូវចាប់ផ្ដើមធ្វើនៅដើមខែមិថុនានេះ ប៉ុន្តែមកដល់ពេលនេះ មិនដឹងយ៉ាងម៉េច មិនឃើញក្រុមហ៊ុនម៉ៅការនោះ ចុះមកធ្វើទេ ។
ទោះជាយ៉ាងណា លោកមេឃុំ សន្យាថា នឹងពន្លឿនការស្ដារប្រព័ន្ធលូនេះ ឲ្យបានលឿនជាទីបំផុត ដើម្បីបញ្ឈប់កុំឲ្យមានការជនលិច បង្កការលំបាកដល់ប្រជាពលរដ្ឋតទៅទៀត ៕
ចែករំលែកព័តមាននេះ