តម្លៃមាសអន្តរជាតិបន្តបំបែកកំណត់ត្រាខ្ពស់បំផុតមិនធ្លាប់មាន ៥ ៤៥១ ដុល្លារ/តម្លឹង
បរទេស ៖ នៅថ្ងៃទី២៤ ខែធ្នូ ឆ្នាំ២០២៥ មាសអន្តរជាតិបានទម្លុះតម្លៃ ៤ ៥០០ ដុល្លារក្នុង១អោន ឬ…
បរទេស ៖ នៅថ្ងៃទី២៤ ខែធ្នូ ឆ្នាំ២០២៥ មាសអន្តរជាតិបានទម្លុះតម្លៃ ៤ ៥០០ ដុល្លារក្នុង១អោន ឬ ៥ ៤២១ ដុល្លារក្នុង១តម្លឹងជាលើកដំបូងនៅក្នុងប្រវត្តិសាស្ត្រ ខណៈដែលបណ្តាវិនិយោគិនសម្រុកវិនិយោគលើលោហៈដ៏មានតម្លៃនេះ ដើម្បីការពារហានិភ័យភូមិសាស្ត្រនយោបាយ និងពាណិជ្ជកម្ម បូករួមទាំងការរំពឹងទុកកាន់តែខ្ពស់នៃការកាត់បន្ថយអត្រាការប្រាក់បន្ថែមទៀតរបស់ធនាគារកណ្តាលអាមេរិក (Fed) នៅឆ្នាំ ២០២៦។ នេះបើតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅរសៀលថ្ងៃទី២៤ ខែធ្នូ ឆ្នាំ២០២៥។
គិតត្រឹមម៉ោង ២:៥៥នាទីរសៀលថ្ងៃទី២៤ ខែធ្នូ ឆ្នាំ២០២៥ តម្លៃមាសបានកើនឡើង ០,២% នៅក្នុងតម្លៃ ៤. ៤៨៦ ដុល្លារ/អោន ឬ ៥ ៤០៤ ដុល្លារ/តម្លឹង បន្ទាប់ពីហក់ឡើងដល់កម្រិតខ្ពស់បំផុតមិនធ្លាប់មាន ៤ ៥២៥ ដុល្លារ/អោន ឬ ៥ ៤៥១ ដុល្លារ/តម្លឹង។ អ្នកវិភាគអន្តរជាតិមួយចំនួនបានលើកឡើង តម្លៃមាសកំពុងកំណត់គោលដៅដល់ ៥ ០០០ ដុល្លារ/អោន ឬ ៦ ០២៤ ដុល្លារ/តម្លឹង នៅរយៈពេល ៦ ទៅ ១២ ខែខាងមុខ។
នៅឆ្នាំ ២០២៥ តម្លៃមាសបានកើនឡើង ៧០% ហើយរហូតមកដល់ពេលនេះ ដែលជាការកើនឡើងប្រចាំឆ្នាំដ៏ខ្ពស់បំផុត ចាប់តាំងពីឆ្នាំ ១៩៧៩ ជំរុញដោយ តម្រូវការដ៏រឹងមាំនៃលោហៈធាតុដ៏មានតម្លៃមួយនេះ ព្រមទាំងការរំពឹងទុកនៃការកាត់បន្ថយអត្រាការប្រាក់របស់ធនាគារកណ្តាលអាមេរិក នៅឆ្នាំក្រោយ គួបផ្សំនឹងការសម្រុកទិញស្កុកទុកជាទុនបម្រុងរបស់បណ្តាធនាគារកណ្តាលលើពិភពលោក។
មាសត្រូវបានចាត់ទុកជាទ្រព្យសកម្មមានសុវត្ថិភាពបំផុត។ តម្លៃកើនឡើងនៅពេលភាពតានតឹងផ្នែកភូមិសាស្ត្រនយោបាយ និងពាណិជ្ជកម្មកាន់តែខ្លាំង ខណៈដែលកម្សោយប្រាក់ដុល្លារអាមេរិកបានធ្វើឱ្យមាសមានតម្លៃថោកជាង សម្រាប់អ្នកទិញនៅបរទេស៕
ចែករំលែកព័តមាននេះ