ខេត្តសៀមរាប ៖ ដោយមើលឃើញពីការខ្វះខាតនៅតាមមណ្ឌលសុវត្ថិភាព នៅក្នុងការរស់នៅរបស់បងប្អូនប្រជាពលរដ្ឋភៀសសឹកនិងដើម្បីជួយសម្រាលពីបញ្ហាអនាម័យជូនបងប្អូនដែលបានជម្លៀសខ្លួនពីបណ្ដាខេត្តជាប់តំបន់សង្គ្រាមឈ្លានពានពីសំណាក់កងទ័ពថៃ មកកាន់ទីកន្លែងសុវត្ថិភាពក្នុងភូមិសាស្ត្រខេត្តសៀមរាបនោះ អាជ្ញាធរគ្រប់ជាន់ថ្នាក់ បានធ្វើការផ្គត់ផ្គង់ទឹកស្អាត ការផ្តល់ជូនធុងចម្រោះនិងបង្គន់អនាម័យ ដែលសុទ្ធសឹងជាតម្រូវការចាំបាច់របស់បងប្អូនប្រើប្រាស់ ។
ជាក់ស្តែក កាលពីព្រឹកថ្ងៃទី២២ ខែធ្នូ ឆ្នាំ២០២៥កន្លងទៅ លោក ណម ពិសិដ្ឋ ប្រធានមន្ទីរសេដ្ឋកិច្ចនិងហិរញ្ញវត្ថុខេត្ត បាននាំយកបង្គន់អនាម័យចំនួន៥០ ទៅប្រគល់ជូនដល់រដ្ឋបាលខេត្ត ដើម្បីចាត់ចែងសាងសង់បន្ទប់បង្គន់ជូនដល់បងប្អូនជនភៀសសឹក នៅតាមមណ្ឌលដែលមានការខ្វះខាតបង្គន់អនាម័យប្រើប្រាស់ ។
លោក ណម ពិសិដ្ឋ បានថ្លែងថា ការរស់នៅប្រចាំថ្ងៃរបស់បងប្អូនភៀសសឹកនៅតាមមណ្ឌលសុវត្ថិភាពជាការរស់នៅប្រមូលផ្តុំនេះ តែងតែជួបនូវបញ្ហាសុខភាព អនាម័យ និងបរិស្ថាននៅជុំវិញខ្លួន ។ ដោយមើលឃើញពីបញ្ហាសុខភាពអនាម័យនេះហើយ ទើបរូបលោកនិងក្រុមគ្រួសារ រួមនឹងមន្ត្រីរាជការនៃមន្ទីរសេដ្ឋកិច្ចនិងហិរញ្ញវត្ថុខេត្ត បានផ្តល់បង្គន់អនាម័យដល់រដ្ឋបាលខេត្ត ដើម្បីយកទៅសាងសង់ជូននៅតាមមណ្ឌល ដែលខ្វះខាតបង្គន់អនាម័យប្រើប្រាស់ ។
ក្នុងឱកាសនោះ លោក យុន លីនណេ អភិបាលរងខេត្ត បានមានប្រសាសន៍កោតសរសើរនូវទឹកចិត្តរបស់លោក ណម ពិសិដ្ឋ និងសហការីក្នុងស្មារតីខ្មែរជួយខ្មែរ និងដើម្បីលើកកម្ពស់អនា
ម័យបរិស្ថាន និងជួយសម្រួលដល់ប្រជាពលរដ្ឋ ចាស់ជរា ស្ត្រីមានផ្ទៃពោះ ព្រមទាំងដើម្បីធានាសុវត្ថិភាព សេចក្តីថ្លៃថ្នូរ និងសុខុមាលភាពដល់គ្រួសារដែលផ្លាស់ទីមកនៅតាមមណ្ឌលសុវត្ថិភាពផងដែរ ។
ចែករំលែកព័តមាននេះ