យោធភូមិភាគទី៤ បើកវគ្គហ្វឹកហ្វឺនពលទាហានថ្មី បំពេញក្របខណ្ឌឲ្យកងទ័ពជើងគោកឆ្នាំ២០២៥
ខេត្តសៀមរាប ៖ នៅថ្ងៃទី៣ ខែមិថុនា ឆ្នាំ២០២៥ លោកឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក…
ខេត្តសៀមរាប ៖ នៅថ្ងៃទី៣ ខែមិថុនា ឆ្នាំ២០២៥ លោកឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក យោធភូមិភាគទី៤ បានអញ្ជើញជាអធិបតីភាពក្នុងពិធីបើកវគ្គហ្វឹកហ្វឺនពលទាហានថ្មី បំពេញក្របខណ្ឌឱ្យកងទ័ពជើងគោក នៅសាលាពលទាហានទី៤ យោធភូមិភាគទី៤ ។
ឧត្តមសេនីយ៍ត្រី ឈឹង សារុន នាយកសាលា ពលទាហានទី៤ បានឡើងអានមតិស្វាគមន៍ និងរបាយការណ៍អំពីផែនការហ្វឹកហ្វឺនជូនអង្គពិធីទាំងមូលបានជ្រាប និងញ្ជាក់ថា វគ្គហ្វឹកហ្វឺននាពេលនេះ មានសិក្ខាកាមចូលរួមសរុបចំនួន ៣០៥នាក់ ដែលមកពីយោធភូមិភាគទី៥ ចំនួន ២០០នាក់ និងយោធភូមិភាគទី៤ ចំនួន ១០៥នាក់ ដោយមានរយៈពេលហ្វឹកហ្វឺនរៀនសូត្រចំនួន ៩១ថ្ងៃ (គិតចាប់ពីថ្ងៃទី៣ ខែមិថុនា ឆ្នាំ២០២៥ នេះតទៅ) ។
ក្នុងឱកាសនោះ ឧត្តមសេនីយ៍ឯក ពៅ ហេង បានមានប្រសាសន៍ ផ្តាំផ្ញើដល់សិក្ខាកាមក្នុងវគ្គហ្វឹកហ្វឺនទាំងអស់ ត្រូវខិតខំប្រឹងប្រែងយកចិត្តទុកដាក់រៀនសូត្រឱ្យបានល្អនឹងស្ទាត់ជំនាញ ទាំងទ្រឹស្តី និងការអនុវត្តជាក់ស្តែង។ ត្រូវគោរពវិន័យ បទបញ្ជារបស់សាលា ថ្នាក់ដឹកនាំ និងគ្រូគ្រប់គ្រងវគ្គឱ្យបានហ្មឺងម៉ាត់បំផុត។ ត្រូវចេះសាមគ្គី ឯកភាពគ្នា សហការស្រលាញ់ ឱ្យក្លាយជាមិត្តរួមអាវុធចិត្តតែមួយ និងដាច់ខាតការពារឱ្យបាននូវ រដ្ឋធម្មនុញ្ញ ការពារព្រះមហាក្សត្រ រាជរដ្ឋាភិបាលស្របច្បាប់ ដែលកើតចេញពីកាបោះឆ្នោតត្រឹមត្រូវ និងការពារឱ្យបាននូវបូរណភាពទឹកដី ប្រឆាំងរាល់ការឈ្លានពានគ្រប់រូបភាព ពួកជ្រុលនិយម ចលនាបដិវត្តន៍ពណ៌ និងក្រុមឧទ្ទាមប្រដាប់អាវុធទាំងឡាយណា ដែលមានបំណងបំផ្លាញសន្តិភាព និងសមិទ្ធផលសង្គមជាតិ ជាពិសេសជាវៀងឱ្យឆ្ងាយពីការប្រើប្រាស់ នូវគ្រឿងញៀនគ្រប់ប្រភេទ។ ចំពោះការងារហ្វឹកហ្វឺនរៀនសូត្រត្រូវខិតខំបង្កើនព្យាយាមសមត្ថភាពអោយកាន់តែខ្លាំងដើម្បីរួមចំណែកពង្រឹងខឿនការពារជាតិបានរឹងមាំ ។
តំណាងកម្មសិក្សាការី ឡើងធ្វើការប្តេជ្ញាចិត្ត អស់ពីកម្លាំងកាយ ស្មារតី ក្នុងការយកចិត្តទុកដាក់ហាត់ពត់ដំរៀនសូត្រទាំងទ្រឹស្តី ការអនុវត្តន៍ក្នុងទីលានហ្វឹកហាត់ ដើម្បីបង្កើនសម្ថិភាព យល់ដឹង បណ្តាមុខវិជ្ជាយោធា សម្រាប់បំពេញភារកិច្ចការពារជាតិមាតុភូមិឱ្យបានដាច់ខាត។ ប្តេជ្ញាស្មោះចំពោះ ជាតិ សាសនា ព្រះមហាក្សត្រ ហានធ្វើពលីកម្មគ្រប់បែបយ៉ាង ដើម្បីការពារបូរណភាពទឹកដី ស្មោះត្រង់ចំពោះរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ និងគោរពប្រតិបត្តិនូវច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា ព្រមទាំងលក្ខន្តិកៈ បទវិន័យទូទៅ នៃកងយោធពលខេមរភូមិន្ទ បទបញ្ជារបស់ក្រសួងការពារជាតិ អគ្គបញ្ជាការ មេបញ្ជាការកងទ័ពជើងគោក និងបទបញ្ជាផ្ទៃក្នុងរបស់សាលាឱ្យបានដាច់ខាត ៕
ចែករំលែកព័តមាននេះ