ខេត្តស្ទឹងត្រែង ៖ រថយន្តប្រភេទវ៉រអងមួយគ្រឿង ត្រូវបានកម្លាំងកងរាជអាវុធហត្ថប្រចាំការគោលដៅត្រើយម្ខាងគល់ស្ពានសេកុងឃាត់ និងសហការជាមួយជំនាញរដ្ឋបាលព្រៃឈើដើម្បីត្រួតពិនិត្យទៅលើឯកសារក្នុងការដឹកជញ្ជូនឈើផ្ទះចាស់ពីខេត្តស្ទឹងត្រែងទៅកាន់ខេត្តកំពង់ចាម ។ ក្នុងលិខិតកិច្ចសន្យាលក់ផ្ទះចាស់ និងលិខិតសំណើសុំដឹកឈើផ្ទះចាស់ចុះហត្ថលេខាកាលពីថ្ងៃទី៣០ ខែមិថុនា ដោយលោកសា…
ខេត្តស្ទឹងត្រែង ៖ រថយន្តប្រភេទវ៉រអងមួយគ្រឿង ត្រូវបានកម្លាំងកងរាជអាវុធហត្ថប្រចាំការគោលដៅត្រើយម្ខាងគល់ស្ពានសេកុងឃាត់ និងសហការជាមួយជំនាញរដ្ឋបាលព្រៃឈើដើម្បីត្រួតពិនិត្យទៅលើឯកសារក្នុងការដឹកជញ្ជូនឈើផ្ទះចាស់ពីខេត្តស្ទឹងត្រែងទៅកាន់ខេត្តកំពង់ចាម ។
ក្នុងលិខិតកិច្ចសន្យាលក់ផ្ទះចាស់ និងលិខិតសំណើសុំដឹកឈើផ្ទះចាស់ចុះហត្ថលេខាកាលពីថ្ងៃទី៣០ ខែមិថុនា ដោយលោកសា ស៊ូ មេភូមិកញ្ចាញទឹក និងលោក ស៊ីង ម៉ាន់ មេឃុំ ស្រែសំបូរ ឈ្មោះធិ ឆាយ ភេទប្រុស អាយុ៣២ឆ្នាំ រស់នៅភូមិកញ្ចាញទឹក ឃុំស្រែសំបូរ ស្រុកសៀមប៉ាង បានព្រមព្រៀងលក់ផ្ទះចាស់សាងសង់ពីឈើមានទំហំ៧ម៉ែត្រែ គុណ១១ម៉ែត្រអោយទៅឈ្មោះចាន់ វណ្ណា ភេទប្រុស អាយុ៥៦ឆ្នាំ មានទីលំនៅភូមិជីតុក ឃុំក្រែកនស្រុកពញាក្រែក ខេតកំពង់ចាម ក្នុងតម្លៃព្រមព្រៀងមួយទឹកចំនួនសរុប៧,៨០០,០០០រៀល ។
បើតាមលោកចាន់ វណ្ណា ភេទប្រុស អាយុ៥៦ឆ្នាំ បានប្រាប់កោះសន្ធិភាព កាលពីព្រឹកថ្ងៃទី២ កក្កដា ២០២៥ ថា មូលហេតុដែលពួកគាត់មកទិញផ្ទះចាស់នៅស្រុកសៀមប៉ាងនេះគឺដោយសារកូនៗត្រឡប់មកពីប្រទេសថៃវិញ ពុំមានផ្ទះស្នាក់នៅ ទើបគាត់សម្រេចចិត្តដើររកទិញផ្ទះចាស់មួយទឹកដើម្បីយកទៅសាងសង់ឲ្យកូនរស់នៅ ។
លោកបន្តថា ក្រោយពីបានព្រមព្រៀងជាមួយអ្នកលក់រួចមកគាត់ក៏បានធ្វើកិច្ចសន្យាទិញលក់ចំពោះមុខមេភូមិ និងលោកមេឃុំ ហើយក៏បានស្នើសុំធ្វើលិខិតដើម្បីដឹកជញ្ជូនផងដែរ ។ ទាក់ទងការឃាត់រថយន្តដឹកឈើផ្ទះចាស់ខាងលើនេះ កម្លាំងសមត្ថកិច្ចកងរាជអាវុធហត្ថក៏បានរាយការណ៍ជូនលោកអភិបាលបានជ្រាប ។ លោកអភិបាលខេត្តក៏បានបញ្ជាទៅកម្លាំងជំនាញរដ្ឋបាលព្រៃឈើចុះសហការជាមួយកម្លាំងកងរាជអាវុធហត្ថធ្វើការត្រួតពិនិត្យលើឯកសារពាក់ព័ន្ធ ប្រសិនបានបំពេញបែបបទឯកសារគ្រប់គ្រាន់ និងសម្រួលជូនពួកគាត់ដើម្បីបានបន្តដំណើរទៅដល់គោលដៅ ។
បើតាមរដ្ឋបាលព្រៃឈើបានបញ្ជាក់ថា រថយន្តដឹកឈើផ្ទះចាស់នោះ គឺមិនមែនជាករណីចាប់ចងនោះទេ តែជាកាតព្វកិច្ចក្នុងការត្រួតពិនិត្យឲ្យបានល្អិតល្អន់អំពីឯកសារពាក់ព័ន្ធក្នុងការដឹកជញ្ជូននិងត្រួតពិនិត្យមើលជាក់ស្ដែង ក្រែងមានការបំភាន់ក្នុងរូបភាពណាមួយ ។ ការត្រួតពិនិត្យនេះ គឺដើម្បីបង្កភាពងាយស្រួលដល់ការដឹកជញ្ជូនឈើផ្ទះចាស់របស់ពួកគាត់ទៅវិញទេ ព្រោះថា បើកម្លាំងសមត្ថកិច្ចមិនឃាត់ត្រួតពិនិត្យលើឯកសារ ក៏ចេញពីខេត្តស្ទឹងត្រែង ឆ្លងកាត់ខេត្តផ្សេងត្រូវសមត្ថកិច្ចឃាត់ត្រួតពិនិត្យផងដែរ ដូច្នេះទើបកម្លាំងជំនាញធ្វើការឃាត់ត្រួតពិនិត្យលើឯកសារ បើពួកគាត់ខ្វះឯកសារបែបណា គឺត្រូវឲ្យគាត់បំពេញឯកសារនោះឲ្យបានគ្រប់គ្រាន់ ទើបមិនបង្កការស្មុគស្មាញមុនពេលទៅដល់គោលដៅ។
ពាក់ព័ន្ធករណីដឹកជញ្ជូនឈើនេះផងដែរ មិនថាឈើផ្ទះចាស់ឬប្រភេទឈើក្នុងទម្រង់ណាក៏ដោយ បើជាក្រុមឈ្មួញតែងប្រើយុទ្ធវិធីដើម្បីបំភាន់ ។ កន្លងមក សមត្ថកិច្ចបានត្រួតពិនិត្យលើដឹកជញ្ជូនដោយឈ្មួញខ្លះបានប្រើប្រាស់រូបភាពដូចជាជួលមនុស្សឲ្យដើរតួធ្វើប្រជាពលរដ្ឋកំសត់ត្អូញត្អែរខ្វះនេះខ្វះនោះ ងាយស្រួលបិតបាំងជំនួញ និងឆ្មក់ឱកាសបង្កប់ឈើថ្មីលាយឡំជាដើម ឯឈ្មួញខ្លះទៀតជាព្រះសង្ឃដើរតួសុំបិណ្ឌបាតឈើ ដើម្បីយកទៅសាងសង់កុដិ សាលាឆាន់ និងវិហារជាដើម តែការពិតយកទៅចែកចាយតាមដេប៉ូក្នុងស្រុកធ្វើមានធ្វើបានយ៉ាងរំភើយ ។
ជាក់ស្ដែងថ្មីៗនេះ ក៏មានការចុះបង្ក្រាបទាំងយប់អធ្រាត្រពីសំណាក់លោកអភិបាលខេត្តផ្ទាល់ផងដែរ។ បើតាមក្រសួងកសិកម្ម រុក្ខាប្រមាញ់ និងនេសាទ ក៏បានណែនាំអំពីនីតិវិធីនៃការដឹកជញ្ជូនឈើផ្ទះចាស់ផងដែរ ក្នុងគោលបំណងបម្រើផលប្រយោជន៍សាធារណៈ និងសម្រួលដល់ការដឹកជញ្ជូនឈើផ្ទះចាស់របស់ប្រជាពលរដ្ឋ ក៏ដូចជាដើម្បីទប់ស្កាត់ការជួញដូរឈើខុសច្បាប់ រដ្ឋបាលព្រៃឈើសូមធ្វើការណែនាំថា ការដឹកជញ្ជូនឈើផ្ទះចាស់ពីកន្លែងមួយយកទៅប្រើប្រាស់នៅកន្លែងផ្សេងទៀត ត្រូវមានការបញ្ជាក់ដឹងឮពីអង្គភាពជំនាញផ្នែករដ្ឋបាលព្រៃឈើដែលនៅជិតបំផុត ដោយមានការចូលរួមពីអាជ្ញាធរភូមិ និងមានកំណត់ហេតុច្បាស់លាស់បញ្ជាក់ពីស្ថានភាពដើមនៃផ្ទះចាស់រយៈពេលសាងសង់ទំហំផ្ទះ ប្រភេទឈើ និងបរិមាណឈើដែលបានមកពីការរុះរើផ្ទះ។ ឈើផ្ទះចាស់ សំដៅដល់ ឈើដែលបានប្រើធ្វើផ្ទះយ៉ាងតិច៥ឆ្នាំ ។
ដោយឡែក រថយន្តវេរអងដែលបានដឹកឈើផ្ទះចាស់ខាងលើនោះបច្ចុប្បន្នជំនាញកំពុងណែនាំអំពីនីតិវិធីនិងបំពេញបែបបទឯកសារឲ្យបានគ្រប់គ្រាន់ និងអនុញ្ញាតឲ្យបន្តដំណើរឆ្ពោះទៅគោលដៅ ៕
ចែករំលែកព័តមាននេះ