ខេត្តសៀមរាប ៖ នាំគ្នាផឹកស៊ីក្លែមសម្តីក្នុងខ្ទមដីឡូត៍ដ៏កម្សត់ ត្រូវបានជនដៃដល់វាយកម្មករសំណង់ម្នាក់ ជាច្រើនដំបង ដែលទៅដេកជាមួយអ្នកយាមដីឡូត៍ឱ្យគេ បណ្តាលឱ្យស្លាប់ភ្លាមៗក្នុងថ្លុកឈាម រួចអូសយកមកទម្លាក់នៅមុខរបងតាមផ្លូវគ្រោះក្រហម ដើម្បីបន្លំភ្នែកសមត្ថកិច្ច។ បង្កឱ្យមានការភ្ញាក់ ផ្អើលដល់ប្រជាពលរដ្ឋ និងសមត្ថកិច្ច តាំងពីព្រឹក រហូតដល់រសៀលថ្ងៃទី២១ ខែឧសភានេះ ទើបចាប់បាន ជនសង្ស័យ រួចនាំយកមកធ្វើត្រាប់ នៅកន្លែងកើតហេតុក្នុងដីឡូត៍វិញ ប៉ុន្តែមិនត្រូវបានអនុញ្ញាតឱ្យ ប្រជាពលរដ្ឋចូលមើលឡើយ។ ហេតុការណ៍ចាប់បានជនដៃដល់នោះ បានធ្វើឡើងនៅវេលាម៉ោង ១រសៀល ថ្ងៃទី២១ ខែឧសភា ឆ្នាំ២០១៨ ស្ថិតនៅចំណុចក្នុងព្រៃទំនប់ ខាងត្បូងអង្គរឃ្យុងយូ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលយុត្តិធម៌ នៃស្នងការដ្ឋាននគរបាលខេត្ត បានធ្វើសន្និសីទ នៅរសៀលថ្ងៃទី២១ ខែឧសភា ឆ្នាំ២០១៨នេះថា ក្រោយពីកម្លាំងប្រជាការពារភូមិស្លក្រាម បានប្រទះសាកសពបុរសម្នាក់ កាលពីវេលាម៉ោង០៦ព្រឹក ថ្ងៃទី២១ ឧសភា នេះ ស្ថិតត្រង់ចំណុច ដីឡូត៍មួយកន្លែងក្នុងក្រុមទី២០ ភូមិធ្លកអណ្តូង សង្កាត់ស្លក្រាម ក្រុងសៀមរាប ក៏ត្រូវកម្លាំងសមត្ថកិច្ច បានធ្វើការស្រាវជ្រាវ រហូតដល់ម៉ោងប្រមាណជា១រសៀល ថ្ងៃទី២១ ខែឧសភា ឆ្នាំ២០១៨ ទើបឃាត់ខ្លួន បានជនដៃដល់ ដែលសម្លាប់ជនរងគ្រោះ រួចនាំយកមកធ្វើការសួរនាំនៅអធិការក្រុងសៀមរាប។ លោកបានបន្តថា ជនរងគ្រោះមានឈ្មោះ ឈៀក ប៊ុនណា ភេទប្រុស អាយុ៣៥ឆ្នាំ មុខរបរកម្មករសំណង់ មានស្រុកកំណើតនៅភូមិសំរោងក្រុង ឃុំសំរោងក្រុង ស្រុកឯកភ្នំ ខេត្តបាត់ដំបង។
ចំណែក ជនសង្ស័យឈ្មោះ ស៊ិន សីហសទ្ធា ភេទប្រុស អាយុ៣២ឆ្នាំ មុខរបរគ្មាន មានស្រុកកំណើតនៅភូមិ កំពង់ក្របី ឃុំឯកភាព ស្រុកបាត់ដំបង ខេត្តបាត់ដំបង។ បច្ចុប្បន្នស្នាក់នៅជាមួយ ឪពុកម្តាយ ក្នុងភូមិធ្លក អណ្តូង សង្កាត់ស្លក្រាម ក្រុងសៀមរាប។ មូលហេតុ គឺដោយសារពេលផឹកស៊ីចប់ ជនសង្ស័យខឹង ជនរងគ្រោះ ដែលបានជេរឪពុក ម្តាយរបស់ខ្លួន ព្រមទាំងប្រមាថអាយុជីវិតរូបគេទៀត ទើបហ៊ានលើកដៃ វាយសម្លាប់ដូច្នេះ។ ក្រោយសាកសួររួច ជនសង្ស័យបានសារភាពនៅចំពោះមុខសមត្ថកិច្ចជំនាញថា មុនដំបូងរូបខ្ញុំ បានជិះកង់ចេញពីផ្ទះឪពុកម្តាយទៅផឹកស្រាសជាមួយ អ៊ុំ (ប៊ុន លី) ជាអ្នកយាមដីឱ្យគេ និង ជនរងគ្រោះឈ្មោះ ឈៀក ប៊ុនណា អស់ស្រាសចំនួន១លីត្រកន្លះ ខណៈនោះអ៊ុំ ប៊ុន លី ស្រវឹង គាត់ក៏ចូលដេកមុន ហើយនៅសល់តែរូបខ្ញុំ និងជនរងគ្រោះផឹកតែ២នាក់។
ជនសង្ស័យបានសារភាពបន្តថា បន្ទាប់មក អស់ស្រារូបខ្ញុំក៏ដើរទៅបម្រុងដាក់មុងចូលដេក ស្រាប់តែជនរងគ្រោះ ឈ្មោះ ឈៀក ប៊ុនណា បានជេរឪពុកម្តាយ និងប្រមាថអាយុជីវិតរូបខ្ញុំ ជាច្រើនលើក ច្រើនសារ ទើបខ្ញុំទ្រាំមិនបានក៏ស្ទុះចេញពីមុងចុះមកដីយកដំបងឈើ ប្រវែង០,៥៥ម៉ែត្រ រត់ទៅវាយ ជាច្រើនដំបង ក៏ដួលផ្កាប់មុខ ខណៈជនរងគ្រោះកំពុងរៀបចំដេក។ រួចខ្ញុំក៏វាយបន្ត ហើយអូសជើង ជនរងគ្រោះទម្លាក់មកដី ហើយវាយបន្ថែមទៀតរហូតដល់ស្លាប់។ ប៉ុន្តែរូបខ្ញុំ មិនអស់ចិត្ត ក៏មកអង្គុយជក់បារីរង់ចាំខ្លាចក្រែងជនរងគ្រោះដឹងខ្លួន ដើម្បីវាយថែមទៀត តែស្លាប់បាត់ ហើយក៏អូស ចេញទៅចោលនៅក្រៅរបង ដើម្បីបន្លំភ្នែកសមត្ថកិច្ចកុំថា ស្លាប់នៅក្នុងដីឡូត៍ រួចក៏ដើរត្រឡប់មកវិញ ប្រមូលកន្ទេល ផួយ មុង និងមកដូរសម្លៀកបំពាក់ ដើម្បីយកទៅដុត ប៉ុន្តែដុតមិនឆេះក៏ទុកចោល ហើយក៏ជិះកង់ត្រឡប់ទៅផ្ទះផឹកនៅផ្ទះពូក្រោយវត្តពោធិ៍លង្កា។
លុះដល់ថ្ងៃប្រហែលម៉ោងជិត១រសៀល ថ្ងៃទី២១ ខែឧសភា ឆ្នាំ២០១៨ រូបខ្ញុំបានជិះកង់ចេញពីផ្ទះពូត្រឡប់ទៅផ្ទះវិញ ដើម្បីសុំលុយម្តាយចំនួន ២០ដុល្លារ ដើម្បីជិះឡានរត់គេចខ្លួនទៅបាត់ដំបង។ ប៉ុន្តែឪពុកម្តាយមិនឱ្យ ដល់ពាក់កណ្តាលផ្លូវ ឃើញសមត្ថកិច្ច និងប្រជាការពារភូមិ ក៏ទុកកង់ចោលរត់ចូលព្រៃក្បែរទំនប់ ប៉ុន្តែអកុសល ត្រូវសមត្ថកិច្ចចាប់បានតែម្តង រួចបញ្ជូនមកកាន់អធិការក្រុងដើម្បីសួរនាំ៕
https://youtu.be/0w3GFW_uvCw
ចែករំលែកព័តមាននេះ