រាជធានីភ្នំពេញ ៖ បុរស២នាក់ឪពុកកូនរងរបួសដៃធ្ងន់ បន្ទាប់ពីក្រុមជនដៃដល់មួយគ្រួសារមានគ្នា៥នាក់ប្រដាប់ដោយដាវលើកគ្នាចូលកាប់ដល់ក្នុងផ្ទះដូចរឿងចិនហុងកុងដោយចោទប្រកាន់ទៅលើភាគីខាងរងគ្រោះថា បណ្តោយឲ្យឆ្កែខាំក្មួយស្រីរបស់ពួកគេបង្កឲ្យផ្អើលឆោឡោដល់អ្នកជិតខាងរត់ចែកជើងគ្នាគេច ដោយខ្លាចនឹងផ្លែដាវរហូតដល់សមត្ថកិច្ចចុះទៅអន្តរាគមន៍ចាប់ឃាត់ក្រុមអ្នកលេងដាវសាំម៉ូរ៉ៃបាន៤នាក់ ចំណែកម្នាក់ទៀតមានរបួសឲ្យទៅពេទ្យក្បែរកន្លែងកើតហេតុ ។ ហេតុការកើតឡើងកាលពីវេលាម៉ោង៨និង១៥នាទីយប់ ថ្ងៃទី១៩ ខែឧសភា ឆ្នាំ២០១៨ ស្ថិតនៅភូមិជម្ពូវ័ន២ សង្កាត់ចោមចៅ៣ ខណ្ឌពោធិសែនជ័យ ។
ជនរងគ្រោះឈ្មោះ អ៊ឹម ថន ភេទប្រុស អាយុ៤៩ឆ្នាំ មុខរបរបើកបររថយន្ត និងកូនប្រុសម្នាក់ទៀតឈ្មោះ អ៊ឹម ផានិត អាយុ២១ឆ្នាំ មុខរបរជាងអេឡិចត្រនិច ស្នាក់នៅភូមិជម្ពូវ័ន២ សង្កាត់ចោមចៅ៣ ខណ្ឌពោធិសែនជ័យ ។
ចំណែកក្រុមជនបង្កឃាត់ខ្លួនបាន៤នាក់រួមជាមួយដាវចំនួនមួយដើម កាំបិតតោមួយ ដំបងដែកមួយ រួចសមត្ថកិច្ចនាំខ្លួនចូលសាកសួរនៅប៉ុស្តិ៍ប៉ូលិសដែលមានទី១- ឈ្មោះ សេង កាត់ ភេទប្រុស អាយុ២៩ឆ្នាំ ជនជាតិវៀតណាម មុខរបរលក់ប្រហិតចៀនតាមរទេះ ។ ទី២- ឈ្មោះ សេង ស៊ីថន ភេទប្រុស អាយុ២៨ឆ្នាំ ជនជាតិវៀតណាម មុខរបរលក់បបរតាមរទេះ ។ ទី៣- ឈ្មោះ គឹម ជី ភេទប្រុស អាយុ២៥ឆ្នាំ មុខរបរលក់បុកល្ហុងតាមរទេះ ។ ទី៤- ឈ្មោះ ថាច់ ញ៉ ភេទប្រុស អាយុ១៧ឆ្នាំ ជនជាតិវៀតណាម មុខរបរនៅផ្ទះ និងទី៥ឈ្មោះ គឹម យី អាយុ២១ឆ្នាំ មុខរបរលក់បុកល្ហុង(របួសក្បាល និងម្រាមដៃ) ។ អ្នកទាំង៥ស្នាក់នៅភូមិព្រៃព្រីងជើង សង្កាត់ចោមចៅ៣ ខណ្ឌពោធិសែនជ័យ ។
តាមសម្តីជនរងគ្រោះនៅកន្លែងកើតហេតុបានឲ្យដឹងថា ក្រុមជនបង្កបានធ្វើការចោទប្រកាន់មកលើក្រុមគ្រួសាររបស់គាត់ថា បណ្តោយឲ្យសត្វឆ្កែសម្បុរខ្មៅមួយក្បាលខាំក្មួយស្រីរបស់ពួកគេកាលពីព្រឹកថ្ងៃទី១៨ ខែឧសភា ឆ្នាំ២០១៨ ម្សិលមិញ ហើយមកដល់ព្រឹកថ្ងៃទី១៩ ខែឧសភានេះ ភាគីខាងបង្កលើកគ្នាមកសួរ និងចោទប្រកាន់ ទោះជាគាត់បំភ្លឺហេតុផលថា ឆ្កែសម្បុរខ្មៅរបស់គាត់នៅព្រឹកថ្ងៃទី១៨ ខែឧសភា ដាក់នៅក្នុងផ្ទះ មិនបានចេញក្រៅហេតុអ្វីទៅខាំមនុស្សកើត ក្រែងឆ្កែសម្បុរខ្មៅមួយក្បាលទៀតនៅក្បែរនោះដែរ ឬយ៉ាងណា ព្រោះនៅទីនោះមានសត្វឆ្កែសម្បុរខ្មៅចំនួន២ក្បាលដូចគ្នា តែទោះជាយ៉ាងណាក្តីគាត់ជួយចេញលុយថ្លៃចាក់ថ្នាំឲ្យ តែភាគីបង្កមិនព្រម នាំគ្នាចាកចេញទៅវិញរហូតមកដល់យប់ថ្ងៃកើតហេតុនេះ ខណៈដែលសមាជិកក្នុងគ្រួសារជុំគ្នានៅផ្ទះស្រាប់តែក្រុមភាគីបង្កលើកគ្នាទាំងគ្រួសារមានគ្នា៥នាក់ ប្រដាប់ដោយដាវចូលកាប់ដល់ក្នុងផ្ទះ បណ្តាលឲ្យគាត់២នាក់ ឪពុកកូនរងរបួសធ្ងន់ ។
ក្រោយកើតហេតុ កុំតែបានកម្លាំងសមត្ថកិច្ចច្រើននាក់ទៅជួយអន្តរាគមន៍ទើបចាប់ឃាត់ក្រុមជនបង្កបាន៤នាក់ ដោយឡែកម្នាក់ទៀតមានរបួសឲ្យទៅដេកពេទ្យ(កាប់ត្រូវគ្នាឯង) ។ ចំណែកជនរងគ្រោះ២នាក់ឪកូនទៅព្យាបាលរបួសនៅមន្ទីរពេទ្យជាមុនសិនទើបទៅបំភ្លឺនៅប៉ុស្តិ៍ប៉ូលិសជាក្រោយ ៕
បច្ចុប្បន្នករណីខាងលើនេះសមត្ថកិច្ចបានឃាត់ខ្លួនបុរស០៤នាក់ បណ្តោះអាសន្នយកទៅសួរនាំបន្តនៅអធិការដ្ឋាននគរបាលខណ្ឌពោធិ៍សែនជ័យ ៕
ចែករំលែកព័តមាននេះ