រាជធានីភ្នំពេញ ៖ ទីតាំងទិញលក់ម៉ូតូ និងទទួលបញ្ចាំម៉ូតូមួយកន្លែង នៅសង្កាត់ទឹកល្អក់ទី៣ ត្រូវបានកម្លាំងគណៈបញ្ជាការឯកភាពខណ្ឌទួលគោក ចុះត្រួតពិនិត្យ បន្ទាប់ពីមានការផ្សព្វផ្សាយពីទីតាំងខាងលើទទួលផលចោរកម្ម និងធ្វើការណែនាំឲ្យម្ចាស់ផ្អាកអាជីវកម្មទទួលបញ្ចាំយានយន្ត ។…
រាជធានីភ្នំពេញ ៖ ទីតាំងទិញលក់ម៉ូតូ និងទទួលបញ្ចាំម៉ូតូមួយកន្លែង នៅសង្កាត់ទឹកល្អក់ទី៣ ត្រូវបានកម្លាំងគណៈបញ្ជាការឯកភាពខណ្ឌទួលគោក ចុះត្រួតពិនិត្យ បន្ទាប់ពីមានការផ្សព្វផ្សាយពីទីតាំងខាងលើទទួលផលចោរកម្ម និងធ្វើការណែនាំឲ្យម្ចាស់ផ្អាកអាជីវកម្មទទួលបញ្ចាំយានយន្ត ។
តាមនគរបាលខណ្ឌទួលគោកបានឲ្យដឹងថា ថ្ងៃទី២០ ខែឧសភា ឆ្នាំ២០២៦ វេលាម៉ោង១៤និង៣០នាទីរសៀល គណៈបញ្ជាការឯកភាពខណ្ឌទួលគោក ដឹកនាំដោយលោក បុត្រ សុភា នាយករងរដ្ឋបាលសាលាខណ្ឌទួលគោក បានដឹកនាំកម្លាំងចម្រុះ ចុះត្រួតពិនិត្យទីតាំងទិញ-លក់ម៉ូតូ មួយកន្លែងស្ថិតនៅផ្ទះលេខ៥០B ផ្លូវលេខ១៩២ ភូមិ៥ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ តាមការចុះផ្សាយរបស់បណ្ដាញសារព័ត៌មានបានចុះផ្សាយកាលពីថ្ងៃទី១៨ ខែឧសភា ឆ្នាំ២០២៦ ថា ទីតាំងនេះ បានទទួលផលចោរកម្ម ។
នគរបាលបានឲ្យដឹងទៀតថា ក្រោយពីការចុះផ្សាយរបស់បណ្ដាញសារព័ត៌មាន កម្លាំងចម្រុះបានដឹកនាំចុះត្រួតពិនិត្យជាក់ស្ដែង យើងបានពិនិត្យឃើញថា ៖ ទីតាំងនេះមានលិខិតអនុញ្ញាបើកអាជីវកម្មទិញ-លក់ម៉ូតូ ចុះថ្ងៃទី០៣ ខែមីនា ឆ្នាំ២០២៣ របស់រដ្ឋបាលខណ្ឌទួលគោក (ផុតសុពលភាព) ។
ក្រោយពីត្រួតពិនិត្យរួចរាល់ក្រុមការងារ បានសម្រេចឲ្យម្ចាស់ទីតាំងឈ្មោះ សេង គឹមលី ភេទប្រុស អាយុ៣១ឆ្នាំ ជនជាតិខ្មែរ ផ្អាកការទទួលបញ្ចាំយានយន្តចាប់ពីថ្ងៃនេះតទៅ រហូតដល់មានច្បាប់អនុញ្ញាតិអាជីវកម្ម ទើបបើកអាជីវកម្មបាន និងបានណែនាំឲ្យម្ចាស់ទីតាំងធ្វើច្បាប់ ទទួលបញ្ចាំ (មុននឹងទទួលសម្ភារៈ ឫមធ្យោបាយផ្សេងៗយកមកបញ្ចាំ) ។
ដោយឡែកម៉ូតូចំនួន១៣គ្រឿង ដែលដាក់តាំងលក់នៅក្នុងផ្ទះ នគរបាលពិនិត្យឃើញថា មានប័ណ្ណសម្គាល់យានយន្តត្រឹមត្រូវទាំង១៣គ្រឿង ៕
ចែករំលែកព័តមាននេះ