ខេត្តសៀមរាប ៖ ពលរដ្ឋនៅស្រុកស្វាយលើសម្ដែងនូវការពេញចិត្តចំពោះសមិទ្ធផលផ្លូវឡើងភ្នំគូលែនថ្មី ដែលកសាងឡើងដោយរាជរដ្ឋាភិបាលកម្ពុជាកាលពីកន្លងទៅថ្មីៗនេះ ។
លោក ជុន ម៉ី ជាប្រជាពលរដ្ឋរស់នៅក្នុងភូមិតាពេញ ឃុំខ្នងភ្នំ ស្រុកស្វាយលើបានឲ្យដឹងថា ទាំងរូបលោកក៏ដូចជា ប្រជាពលរដ្ឋជាង១០ភូមិ រស់នៅលើខ្នងភ្នំគូលែន ពិតជាមានក្តីរំភើប សប្បាយចិត្ដជាខ្លាំង និងសូមសម្ដែវនូវការសាទរចំពោះប្រមុខរាជរដ្ឋាភិបាលកម្ពុជាដែលសម្រេចសាងសង់ផ្លូវមួយខ្សែថ្មីឡើងភ្នំគូលែន ពីខាងកើតនេះព្រោះថា កាលពីមុនអ្នកភូមិនៅខ្នងភ្នំគូលែននេះ ប្រសិនបើពួកគាត់ចង់ទៅផ្សារដែលមាននៅទីប្រជុំជនស្រុកស្វាយលើ ពួកគាត់ត្រូវធ្វើដំណើរចុះពីលើភ្នំរយៈពេលមួយថ្ងៃទើបបានទៅដល់ផ្ទះវិញ ឬក៏ធ្វើដំណើរចុះទៅតាមផ្លូវផ្នែកខាងលិច ក្នុងស្រុកបន្ទាយស្រី វិលជុំវិញភ្នំតែម្ដងទើបដល់ស្រុកស្វាយលើ ប៉ុន្ដែសម្រាប់ពេលនេះពួកគាត់ចង់មកស្រុកស្វាយលើ តាមផ្លូវថ្មីនេះចំណាយពេលមិនដល់មួយម៉ោងផងទៅដល់ស្វាយលើភ្លាម ហើយសមិទ្ធផលនេះជាផ្លូវប្រវត្ដិសាស្ដ្រមួយទៀតរបស់រាជរដ្ឋាភិបាលដែលមិនធ្លាប់មានតាំងពីមុនមក ។
ចំណែក លោក គិត លុយជាប្រជាពលរដ្ឋរស់នៅភូមិជប់លើ ឃុំស្វាយលើ ស្រុកស្វាយលើ បានមានប្រសាសន៍ថា មិនត្រឹមតែពលរដ្ឋនៅលើភ្នំគូលែននោះទេដែលសប្បាយចិត្ដ សូម្បីតែរូបគាត់ជាអ្នករត់ម៉ូតូឌុប ដែលតែងតែធ្វើដំណើរចុះឡើងតាមផ្លូវនេះក៏មានការសប្បាយចិត្តដែរ ហើយសង្ឃឹមជឿជាក់ថា បន្ទាប់ពីសាងសង់ផ្លូវឡើងភ្នំគូលែនពីខាងកើតរួចរាល់ហើយនោះ ប្រជាពលរដ្ឋទាំងអស់នឹងកាត់បន្ថយការចំណាយបានច្រើន ទាំងការចំណាយពេលវេលា និងការចំណាយទៅលើថ្លៃធ្វើដំណើរជាដើម ។
បើតាមប្រសាសន៍របស់អ្នកទទួលមើលការខុសត្រូវការសាងសង់ផ្លូវបានឲ្យដឹងថា ផ្លូវនេះមានប្រវែងបណ្ដោយជាង៣០គីឡូម៉ែត្រ និងទទឹង៦ម៉ែត្រ បែកចេញពីចំណុចផ្លូវកែងទីប្រជុំជនស្រុកស្វាយលើ ទៅដល់រមណីដ្ឋានភ្នំគូលែនជាប្រភេទគំរោងផ្លូវចាក់បេតុង ហើយនឹងត្រូវបញ្ចប់ការសាងសង់ក្នុងរយៈពេលបីឆ្នាំ ។
សូមបញ្ជាក់ថា ផ្លូវមួយខ្សែនេះ វាក៏ជាសរសៃឈាមទេសចរដ៏សំខាន់ផងដែរ ព្រោះវាបានតភ្ជាប់ប្រាសាទបន្ទាយស្រី ទៅកាន់ភ្នំគូលែន និងពីភ្នំគូលែនទៅប្រាសាទបេងមាលា ឬទៅប្រាសាទកោះកែរ ក្នុងខេត្តព្រះវិហារ ៕
ចែករំលែកព័តមាននេះ