ខេត្តប៉ៃលិន ៖ សេចក្តីរាយការណ៍បឋមឲ្យដឹងថា កាលពីវេលាម៉ោង១០ព្រឹក ថ្ងៃទី១៤ ឧសភា ឆ្នាំ២០១៨ មានករណីមនុស្សស្លាប់នៅក្នុងចម្ការស្វាយ ស្ថិតក្នុងភូមិពេជ្រគីរី សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ជនរងគ្រោះមានឈ្មោះ យ៉ន យ៉ូ ភេទប្រុស អាយុ៤៦ឆ្នាំ ជនជាតិខ្មែរ សញ្ជាតិខ្មែរ មានស្រុកកំណើតនៅភូមិចុងព្រែក ឃុំព្រែកស្ដី ស្រុះកោះធំ ខេត្តកណ្ដាល មុខរបរកម្មករចាំចម្ការស្វាយឲ្យឈ្មោះ ឡៃ រ៉ា ភេទប្រុស អាយុ៣៨ឆ្នាំ រស់នៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
តាមការរៀបពីម្ចាស់ចម្ការបានឲ្យសមត្ថកិច្ចដឹងថា កាលពីកាលពីថ្ងៃទី១១ ខែឧសភា ឆ្នាំ២០១៨ លោកបានឲ្យលុយចំនួន១០ម៉ឺនរៀល ទៅជនរងគ្រោះ ដើម្បីយកទិញប្រេងឆាសម្រាប់ធ្វើម្ហូបអាហារ និង សម្ភារមួយចំនួន ដើម្បីកាត់ស្មៅចម្ការ តែរហូតដល់ថ្ងៃទី១៤ ឧសភា ទើបគាត់បានដឹងពីដំណឹងជនរងគ្រោះថា ស្លាប់បាត់បាត់ទៅហើយ។
តាមការធ្វើកោសល្យវិច្ច័យ របស់ផ្នែកជំនាញនៃអធិការដ្ឋាននគរបាលក្រុងប៉ៃលិន បានឲ្យដឹងថា សាកសពបានមុតនឹងផ្លែម៉ាស៊ីនកាត់ស្មៅ ចំកំភួនជើងឆ្វេងផ្នែកខាងក្រោយ មុនពេលស្លាប់បានដាច់សរសៃឈាមធំ បណ្ដាលឲ្យឈាមហូរហូតដាច់ខ្យល់ស្លាប់ដោយពុំមាននណាដឹង និងជួយសង្គ្រោះ។ សាកសពត្រូវបានសាច់ញាតិយកទៅធ្វើបុណ្យតាមប្រពៃណី៕
ចែករំលែកព័តមាននេះ