ខេត្តបន្ទាយមានជ័យ ៖ ច្រករបៀងអូរបីជាន់ ស្រុកអូរជ្រៅ ក្រោយពេលរដ្ឋបាលសាលាខេត្តចេញលិខិតបិទតាមការណែនាំរបស់សម្តេចក្រឡាហោម ស ខេង មួយរយៈខ្លី ហើយបានបើកដំណើរការចេញ-ចូលជាធម្មតាវិញជិត១ខែមកហើយ។ ជាក់ស្តែងនៅរសៀលថ្ងៃទី១៣…
ខេត្តបន្ទាយមានជ័យ ៖ ច្រករបៀងអូរបីជាន់ ស្រុកអូរជ្រៅ ក្រោយពេលរដ្ឋបាលសាលាខេត្តចេញលិខិតបិទតាមការណែនាំរបស់សម្តេចក្រឡាហោម ស ខេង មួយរយៈខ្លី ហើយបានបើកដំណើរការចេញ-ចូលជាធម្មតាវិញជិត១ខែមកហើយ។
ជាក់ស្តែងនៅរសៀលថ្ងៃទី១៣ ខែឧសភា ឆ្នាំ២០១៨ គេឃើញច្រករបៀងអូរបីជាន់ ស្ថិតឃុំអូរបីជាន់ ស្រុកអូរជ្រៅដែលគ្រប់គ្រោងដោយមន្ត្រីយោធាយោធភូមិភាគទី៥ បានបើកអោយប្រជាពលរដ្ឋ និងការដឹកទំនិញចេញ-ចូលជាធម្មតាឡើងវិញហើយ។
គួរបញ្ជាក់ថា ៖ ដោយមានការណែនាំពីសម្តេចក្រឡាហោម ស ខេង ឧបនាយកដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីដើមខែមេសា ឆ្នាំ២០១៨ រដ្ឋបាលសាលាខេត្តបន្ទាយមានជ័យ បានចេញលិខិតជាផ្លូវការឱ្យបិទច្រករបៀងអូរបីជាន់ ស្រុកអូរជ្រៅ ដោយច្រករបៀងនេះតែងតែមានឈ្មួញនាំចូលទំនិញគេចពន្ធ និងសត្វពាហនៈផ្សេងៗពីថៃមកកម្ពុជាដោយខុសច្បាប់ ។
ទាក់ទិនបើកច្រករបៀងខុសច្បាប់អូរបីជាន់ដំណើរការវិញ អ្នកយកព័ត៌មានបានទំនាក់ទំនងទៅមន្ត្រីយោធាយោធភូមិភាគទី៥ ប្រចាំការច្រករបៀងអូរបីជាន់ដែរ តែមិនអាចទំនាក់ទំនងបានទេជុំវិញការបើកច្រករបៀងអូរបីជាន់ឡើងវិញក្រោយរដ្ឋបាលសាលាខេត្តបានបិទ។
ដោយឡែកនៅច្រករបៀងចំការគរ និងច្រករបៀងភ្នំឆាត់ ស្ថិតក្នុងស្រុកស្វាយចេក ហើយច្រករបៀងធ្នង់ និងច្រករបៀងប្រាសាទស្បែង ស្ថិតក្នុងស្រុកថ្មពួក គេឃើញមានប្រជាពលរដ្ឋចេញ-ចូលទិញទំនិញផ្សាណាត់ក្នុងទឹកដីថៃកាលពីថ្ងៃអាទិត្យ ទី១៣ ខែឧសភា ឆ្នាំ២០១៨ មិនតិចជាង១រយគោយន្តទេ ភាគច្រើនទិញទំនិញមានដូចជាជីដាក់ស្រូវ និងទំនិញហូបចុក ។ មន្ត្រីយោធាម្នាក់ដែលជាអ្នកបើកបារ៉ាស់ចេញ-ចូលបាននិយាយថា ការដែលបើកអោយប្រជាពលរដ្ឋចេញ-ចូលទិញទំនិញផ្សាណាត់ក្នុងទឹកដីថៃនេះ គឺមានការអនុញ្ញាតពីយោធភូមិភាគទី៥ សម្រាប់អោយប្រជាពលរដ្ឋចេញចូលទិញទំនិញ១សប្តាហ៍ម្តង៕
ចែករំលែកព័តមាននេះ