ខេត្តកណ្ដាល ៖ បុរសចំណាស់ដែលជាអ្នករត់ម៉ូតូឌុបបាននិយាយអួតអាងក្ដែងៗថា ខ្លួនគឺជាគ្រូមន្តអាគមម្នាក់ដែលអាចស្រោចទឹកព្យាបាលជម្ងឺវិកលចរិកបណ្ដេញព្រលឹងខ្មោចព្រាយបិសាចបាន ។ បន្ទាប់ពីបានឮការអួតអាងក្ដែងៗបែបនេះស្ត្រីចំណាស់ម្នាក់បានហៅឲ្យទៅស្រោចទឹកជម្ងឺវិកលចរិកចៅស្រីរបស់គាត់ម្នាក់ព្រោះនាងមានជម្ងឺវិកលចរិកផង និងជាមនុស្សគផងដែរ ស្រាប់តែលោកគ្រូកំហូចបានចាប់រំលោភសេពសន្ថវៈនាងក្នុងបន្ទប់ទឹក ។ ហេតុការណ៍នោះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១និង៣០នាទីរសៀល ថ្ងៃទី១២ ខែឧសភា ឆ្នាំ២០១៨ នៅក្នុងបន្ទប់ទឹក ផ្ទះនាងរងគ្រោះស្ថិតនៅក្នុងស្រុកអង្គស្នួល ខេត្តកណ្តាល ។
ស្ត្រីរងគ្រោះរូបនោះមានអាយុ២២ឆ្នាំ ជាជនវិកលចរិកផង និងជាមនុស្សគផងដែរ នាងស្នាក់នៅនៅភូមិកើតហេតុខាងលើ ។ ចំណែកលោកគ្រូកំហូចនោះវិញឈ្មោះ នៅ វណ្ណា អាយុ៤៣ឆ្នាំ ជនជាតិខ្មែរ មុខរបររត់ម៉ូតូឌុប និងអះអាងថា ខ្លួនគឺជាគ្រូមន្តអាគមផងដែរ មានទីលំនៅក្នុងភូមិថ្មគោល ឃុំសំបូរ ស្រុកសំរោងទង ខេត្តកំពង់ស្ពឺ ។
តាមប្រភពពីនគរបាលបាននិយាយថា នៅមុនពេលកើតហេតុជនសង្ស័យបានអួតអាងប្រាប់ទៅយាយរបស់ស្ត្រីរងគ្រោះថា ខ្លួនគឺជាគ្រូមន្តអាគមគាថាចេះស្រោចទឹកដោះអំពើលើមនុស្សវិកលចរិកបាន ។ បន្ទាប់ពីបានឮការអួតអាងបែបនេះយាយរបស់នាងមានការជឿជាក់ខ្លាំងណាស់ហើយក៏បានឲ្យជនសង្ស័យទៅស្រោចទឹកនាងរងគ្រោះដែលជាចៅស្រីដល់ផ្ទះរបស់ខ្លួនតែម្ដង ។
ខណៈនោះជនល្មោភកាមបាននាំនាងរងគ្រោះចូលទៅក្នុងបន្ទប់ទឹករួចបិទទ្វារខ្ទាស់គន្លឹះជាប់ដោយប្រាប់យាយរបស់នាងថា ទាល់តែស្រាតសម្លៀកបំពាក់អស់ ស្រោចទឹកក្នុងបន្ទប់ទើបជាសះស្បើយបាន លុះចូលដល់ក្នុងបន្ទប់ទឹកបានចាប់ស្រាតសម្លៀកបំពាក់របស់នាងអស់ពីខ្លួនរួចបានបើកប្រតិបត្តិការរំលោភសេពសន្ថវៈតែម្ដង ។
ប្រភពដដែលបានបន្តទៀតថា ខណៈនោះមិនបានសម្រេចឡើយ ដោយសារតែមានការសង្ស័យស្ត្រីដែលជាយាយបានលួចអឺតមើលតាមប្រហោងទ្វារបន្ទប់ទឹកហើយបានឃើញគ្រូបោករូបនេះកំពុងរំលោភចៅស្រីបែបនេះក៏បានស្រែកឆោរឡោ និងឃាត់ខ្លួនជនកំហូចនេះប្រគល់ជូននគរបាលចាត់ការតាមច្បាប់តែម្ដង ។
មិនតែប៉ុណ្ណោះនគរបាលក៏បានដកហូតបានម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ១គ្រឿង ពាក់ស្លាកលេខ ភ្នំពេញ 1Y-0461 ។ ចំណែកជនសង្ស័យក៏បានសារភាពថា ខ្លួនពិតជាចេះមន្តអាគមខ្លះៗមែនហើយខ្លួនក៏ពិតជាបានបានធ្វើសកម្មភាពចាប់រំលោភសេពសន្ថវៈទៅលើជនរងគ្រោះជាមនុស្សវិកលចរិក និង.គម្នាក់នោះមែន ប៉ុន្តែមិនទាន់បានសម្រេចផងក៏ត្រូវបែកការណ៍ និងត្រូវចាប់ខ្លនបែបនេះ ៕
ចែករំលែកព័តមាននេះ