ខេត្តស្ទឹងត្រែង ៖ អ្នករស់នៅស្រុកសេសាន បានផ្តល់ដំណឹងបន្ទាន់លើករណីបាត់ក្របី ក្រោយរកឃើញនៅសល់តែគ្រោងឆ្អឹង និងក្បាល។ ដំណឹងនោះសុះសាយពីម្នាក់ទៅម្នាក់ឲ្យមានការប្រុងប្រយ័ត្នជាចម្បង ក្រោយពីអ្នកភូមិហាងសាវ៉ាតជាប់ព្រំប្រទល់នឹងភូមិស្តៅ២ស្ថិតនៅស្រុកសេសានបានបាត់ក្របីជាបន្តបន្ទាប់ ហើយថ្មីនេះមានក្របីចំនួន២ក្បាល កាលពីថ្ងៃទី៨…
ខេត្តស្ទឹងត្រែង ៖ អ្នករស់នៅស្រុកសេសាន បានផ្តល់ដំណឹងបន្ទាន់លើករណីបាត់ក្របី ក្រោយរកឃើញនៅសល់តែគ្រោងឆ្អឹង និងក្បាល។ ដំណឹងនោះសុះសាយពីម្នាក់ទៅម្នាក់ឲ្យមានការប្រុងប្រយ័ត្នជាចម្បង ក្រោយពីអ្នកភូមិហាងសាវ៉ាតជាប់ព្រំប្រទល់នឹងភូមិស្តៅ២ស្ថិតនៅស្រុកសេសានបានបាត់ក្របីជាបន្តបន្ទាប់ ហើយថ្មីនេះមានក្របីចំនួន២ក្បាល កាលពីថ្ងៃទី៨ ខែឧសភា បន្ទាប់មួយថ្ងៃគឺថ្ងៃទី៩ ខែឧសភា ទើបប្រទះឃើញគ្រោងឆ្អឹង និងក្បាល។ ប្រភពព័ត៌មានឲ្យដឹងថាក្រោយកើតហេតុការណ៍នេះ អ្នកភូមិបានបង្កើនការប្រុងប្រយ័ត្ន និងតាមដាននាពេលយប់ ដើម្បីចាប់ខ្លួនជនល្មើសប្រគល់ជូនសមត្ថកិច្ច។ ប្រភពដដែលបន្តថា នៅវេលាយប់ថ្ងៃទី១២ ខែឧសភា ឆ្នាំ២០១៨ កម្លាំងនគរបាលស្រុកសេសាន រួមសហការជាមួយ កម្លាំងនគរបាលព្រហ្មទណ្ឌកម្រិតស្រាលបានឃាត់មនុស្សចំនួន៤ក្នុងចំណោមបក្ខពួក៥នាក់ ដោយមានម្នាក់រត់គេចខ្លួន ខណៈបើកបរគោយន្តកន្ត្រៃរក្សាទុកកាំភ្លើងកែច្នៃ និងកាំបិត។ ក្រោយការឃាត់ខ្លួនជនសង្ស័យទាំង៤នាក់នោះ សាកសួរអំពីការធ្វើដំណើរនៅពេលយប់ និងប្រើប្រាស់អាវុធកែច្នៃពុំមានការអនុញ្ញាតក៏បានបែកធ្លាយអំពីសកម្មភាពលួចក្របីយកទៅពន្លះសាច់ដែលប្រជាពលរដ្ឋបានបាត់កាលពីយប់ថ្ងៃទី៨ និងទី៩ ខែឧសភា ឆ្នាំ២០១៨កន្លងទៅនេះ។
លោក ហោ វុទ្ធី នាយការិយាល័យព្រហ្មទណ្ឌកម្រិតស្រាលស្នងការដ្ឋាននគរបាលខេត្តស្ទឹងត្រែង បានឲ្យដឹងថា ជនសង្ស័យចំនួន៤នាក់ ក្នុងចំណោមបក្ខពួក៥នាក់ ត្រូវបានកម្លាំងនគរបាលស្រុកសេសាន សហការកម្លាំងនគរបាលការិយាល័យព្រហ្មទណ្ឌកម្រិតស្រាល ឃាត់ខ្លួនលើករណីបទល្មើសពីរផ្សេងគ្នា ទី១-ពាក់ព័ន្ធរក្សាទុក និងប្រើប្រាស់អាវុធកែច្នៃដែលច្បាប់ហាមឃាត់ និងទី២-ពាក់ព័ន្ធលួចក្របីអ្នកភូមិ ចំនួន២ក្បាលពន្លះសាច់យកទៅលក់។ លោកនាយការិយាល័យបន្តថា ជនសង្ស័យមានបក្ខពួករួមគ្នា ចំនួន៥នាក់ ដោយក្នុងនោះរត់គេចខ្លួនបាត់ម្នាក់ និងឃាត់ខ្លួនជាក់ស្តែងចំនួន៤នាក់ ក្នុងនោះទី.១ឈ្មោះ សុំ សុខៀត ភេទប្រុស អាយុ២២ឆ្នាំ រស់នៅភូមិហាងសាវ៉ាត ឃុំសាមឃួយ ស្រុកសេសាន ២.ឈ្មោះ តូម៉ា តុលា ហៅឡៃ ភេទប្រុស អាយុ២៦ឆ្នាំ រស់នៅភូមិស្តៅ២ ឃុំស្តៅ២ ស្រុកសេសាន ៣.ឈ្មោះ ផល ដាំ ភេទប្រុស អាយុ១៨ឆ្នាំ រស់នៅភូមិហាងសាវ៉ាត ឃុំសាមឃួយ ស្រុកសេសាន ៤.ឈ្មោះ តូម៉ា មូន ភេទប្រុស អាយុ១៦ឆ្នាំ រស់នៅភូមិហាងសាវ៉ាត ឃុំសាមឃួយ ស្រុកសេសាន បច្ចុប្បន្នកំពុងសាកសួរ នៅការិយាល័យព្រហ្មទណ្ឌកម្រិតស្រាលស្នងការដ្ឋាននគរបាលខេត្តស្ទឹងត្រែង។
ចំណែកជនសង្ស័យទី៥.ឈ្មោះ តូម៉ា ប៊ុនឃូន ភេទប្រុស អាយុ១៩ឆ្នាំ រស់នៅភូមិហាងសាវ៉ាត ឃុំសាមឃួយ ស្រុកសេសាន កំពុងរត់គេចខ្លួន។ មន្ត្រីនគរបាល៉ុស្តិ៍រដ្ឋបាល ឃុំសាមឃួយ ស្រុកសេសាន បានឲ្យដឹងថា ក្រោយការឃាត់ខ្លួនជនសង្ស័យខាងលើ កម្លាំងជំនាញព្រហ្មទណ្ឌបានសាកសួរចម្លើយ ជនសង្ស័យទាំង៤នាក់បានសារភាពថា ពួកគេទាំង៥នាក់ពិតជាបានលួចក្របីអ្នកភូមិយកទៅពន្លះសាច់ មែន។ សូមរំលឹកថា បងប្អូនប្រជាពលរដ្ឋគួរគិតពិចារណា រាល់ពេលទៅទិញសាច់សត្វព្រៃទៅបរិភោគ ដោយចង់បានសាច់ប្រើស ឬខ្ទីង គឺប្រហែលមិនមានសាច់ទាំងនោះលក់ជូនបងប្អូននោះទេ ព្រោះសត្វព្រៃទាំងនោះស្ថិតក្រោមការអភិរក្សផង និងនៅតំបន់ព្រៃក្រាស់ផង។ ប្រសិនជាមានការបរបាញ់ ឬដាក់អន្ទាក់ក៏គេមិនអាចនាំមកកាន់ទីផ្សារលក់សេរីនោះដែរ ហើយសាច់ប្រើសដែលដាក់លក់លួចលាក់ និងចំហរលើទីផ្សារបច្ចុប្បន្ននោះ គឺជាភ្លៅសាច់ក្របីនោះឯង មិនមែនជាសាច់ប្រើសអីនោះទេ ដូច្នេះបងប្អូនគួរពិចារណាមុនទិញសាច់ទាំងនោះទៅបរិភោគ៕
ចែករំលែកព័តមាននេះ