បំពាក់មេដាយការពារជាតិ និងប្រគល់ផ្ទះដល់បងប្អូនអតីតយុទ្ធជនតាមព្រំដែន
- បាត់ដំបង
ខេត្តបាត់ដំបង ៖ នៅថ្ងៃទី១២ ខែឧសភា ឆ្នាំ២០១៨ លោក ងួន រតនៈ អភិបាល នៃគណៈអភិបាលខេត្តបាត់ដំបង,…
ខេត្តបាត់ដំបង ៖ នៅថ្ងៃទី១២ ខែឧសភា ឆ្នាំ២០១៨ លោក ងួន រតនៈ អភិបាល នៃគណៈអភិបាលខេត្តបាត់ដំបង, លោកឧត្តមសេនីយ៍ទោ អ៊ុក ឃ្នួច មេបញ្ជាការ តំបន់ប្រតិបត្តិការសឹករងបាត់ដំបង ប្រធាន ស.អ.ក ខេត្ត លោកឧត្តមសេនីយ៍ នី កន ទីប្រឹក្សាក្រសួងការពារជាតិ, លោក ប៉ោទ្រី ឌឿន ប្រធានមន្ទីរសេដ្ឋកិច្ច និងហិរញ្ញវត្ថុ អនុប្រធាន ស.អ.ក ខេត្ត, លោកវរសេនីយ៍ឯក អ៊ន ជ្រីសៅ មណ្ឌលមេបញ្ជាការរង កងរាជអាវុធហត្ថខេត្ត ជាសមាជិក គណៈកម្មាធិការ ស.អ.ក ខេត្ត, លោកស្នងការរង នគរបាលខេត្ត, លោក គឹម តេង ប្រធានមន្ទីរសង្គមកិច្ចខេត្ត អនុប្រធានប្រចាំការ ស.អ.ក ខេត្ត, លោកប្រធាន អនុប្រធានមន្ទីរជុំវិញខេត្ត អញ្ជើញជាអធិបតីក្នុងពិធីសំណេះសំណាល និងបំពាក់មេដាយមាស ប្រាក់ និងសំរិទ្ធ ក្នុងកាតព្វកិច្ចការពារជាតិ ជូនដល់សមាជិក អតីតយុទ្ធជន ស្រុកសំពៅលូន ចំនួន៤៩២នាក់ ចូលរួមមាន លោកប្រធានក្រុមប្រឹក្សាស្រុក, លោកអភិបាលស្រុក, លោកប្រធាន អនុប្រធាន ស.អ.ក ស្រុក, ក្រុមការងារ ស.អ.ក ខេត្ត/ស្រុក, លោកប្រធាន អនុប្រធានសាខាឃុំ អាជ្ញាធរដែនដី សរុបចំនួន ៦៥នាក់។
ក្នុងពិធីនេះលោក ឧត្តមសេនីយ៍ទោ អ៊ុក ឃ្នួច មេបញ្ជាការ តំបន់ប្រតិបត្តិការសឹករងបាត់ដំបង ជាប្រធាន ស.អ.ក ខេត្ត បានអានសារលិខិត សម្តេចអគ្គមហាសេបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធាន សមាគមអតីតយុទ្ធជនកម្ពុជា ក្នុងឱកាសខួបលើកទី១១ ទិវាអតីតយុទ្ធជនកម្ពុជា ២១ មិថុនា ឆ្នាំ២០១៨ ផងដែរ។ បន្ទាប់មកលោក ងួន រតនៈ អភិបាល នៃគណៈអភិបាលខេត្ត បានសំណេះសំណាល និងផ្តាំផ្ញើសួរសុខទុក្ខពីថ្នាក់ដឹកនាំគ្រប់លំដាប់ថ្នាក់ ហើយបានប្រាប់អតីតយុទ្ធជនដែលចូលទាំងអស់ត្រូវជឿជាក់ ការដឹកនាំរបស់សម្តេចតេជោ ប្រមុខរាជរដ្ឋាភិបាល និងជាប្រធានសមាគមអតីតយុទ្ធជនកម្ពុជា និងសុំឲ្យបងប្អូនយើងបន្តគាំទ្រសម្តេច តាមរយៈនៃការនាំក្រុមគ្រួសារទៅបោះឆ្នោតជូនសម្តេចដើម្បីបន្តធ្វើជានាយករដ្ឋមន្ត្រីបន្តទៀត។ ពិធីនេះអតីតយុទ្ធជនដែលចូលរួមទាំងអស់ម្នាក់ៗ ទទួលបានមេដាយការពារជាតិ១គ្រឿង ថវិកា ៥០,០០០រៀល ជាអំណោយរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
បន្តមកវេលាម៉ោង១៥ និង២០នាទី លោក ងួន រតនៈ អភិបាល នៃគណៈអភិបាលខេត្តបាត់ដំបង ប្រធានកិត្តិយស សមាគមអតីតយុទ្ធជនកម្ពុជាខេត្ត អមដំណើរដោយលោកឧត្តមសេនីយ៍ទោ អ៊ុក ឃ្នួច មេបញ្ជាការតំបន់ប្រតិបត្តិការសឹករងបាត់ដំបង បានដឹកនាំប្រតិភូបានចុះក្នុងពិធីប្រគល់ផ្ទះ១ខ្នង ទំហំ(០៤ម៉ែត្រ x ០៦ម៉ែត្រ) តសំយ៉ាបក្រោយ ទំហំ(២.៥ម៉ែត្រ × ៣ម៉ែត្រ) ធ្វើអំពីឈើប្រក់ស័ង្កសី រៀបការ៉ូបាត និងរៀបជញ្ជាំងឥដ្ឋកម្ពស់០១ម៉ែត្រ ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា ផ្តល់ជូនសមាជិកសមាគមអតីតយុទ្ធជនកម្ពុជា ខេត្តបាត់ដំបងម្នាក់ ដែលទីទ័លក្រ និងគ្មានទីជម្រករស់នៅសមរម្យ ឈ្មោះ ឡុង អឿន អត្តលេខ HB83000013 ជាជនពិការ ភេទប្រុស អាយុ៦២ឆ្នាំ ស្ថិតនៅភូមិកូនភ្នំខាងត្បូង ឃុំតាស្តា ស្រុកសំពៅលូន។ ក្នុងនេះម្ចាស់ផ្ទះទទួលបានគ្រឿងឧបភោគបរិភោគរួមមាន ថវិកា ៦០០,០០០រៀល, គ្រែ០១, អង្ករចំនួន ១០០គីឡូក្រាម, ទឹកត្រី០១យួរ, ទឹកស៊ីអីវ០១យួរ, ត្រីខ០១យួរ, ឆ្នាំង ចាន មុង០១,ផួយ០១ និងកន្ទេល ០១ និងអតីតយុទ្ធជនដែលមកចូលរួមចំនួន២០នាក់ ម្នាក់ៗទទួលបានថវិកាចំនួន៥០,០០០រៀល ក្នុងនោះជនពិការម្នាក់ទទួលបានថវិកា១៥០,០០០រៀល ជាអំណោយរបស់សម្តេច អគ្គមហាសេបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធាន សមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
លោកប្រធានកិត្តិយស សមាគមអតីតយុទ្ធជនកម្ពុជាខេត្ត បានសំណេះសំណាល សួរសុខទុក្ខពីថ្នាក់ដឹកនាំគ្រប់លំដាប់ថ្នាក់ និងផ្តាំផ្ញើដល់អតីតយុទ្ធជនទាំងអស់ថា សម្តេច តេជោ ហ៊ុន សែន តែងតែយកចិត្តទុកដាក់ដល់អតីតយុទ្ធជនជានិច្ចមិនបោះបង់ចោលឡើយ។ លុះព្រឹកឡើងថ្ងៃទី១៣ ខែឧសភា ឆ្នាំ២០១៨ លោក ច័ន្ទ សុផល ទីប្រឹក្សារាជរដ្ឋាភិបាល, លោក សុខ គង់ ទីប្រឹក្សារាជរដ្ឋាភិបាល ប្រធានក្រុមការងារចុះជួយស្រុកកំរៀង, លោកឧត្តមសេនីយ៍ទោ អ៊ុក ឃ្នួច មេបញ្ជាការ តំបន់ប្រតិបត្តិការសឹករងបាត់ដំបង ប្រធាន ស.អ.ក ខេត្ត, ឯកឧត្តម កែវ ហន ក្រុមការងារចលនាមន្ត្រីរាជការចូលនិវត្ត និងអតីតយុទ្ធជន, លោកអភិបាលរងខេត្ត, ប្រធានមន្ទីរសង្គមកិច្ចខេត្ត អនុប្រធានប្រចាំការ ស.អ.ក ខេត្ត, លោកស្នងការរង នគរបាលខេត្ត, លោកមេបញ្ជាការរង កងរាជអាវុធហត្ថខេត្ត សមាជិក គណៈកម្មាធិការ ស.អ.ក ខេត្ត, លោកប្រធាន អនុប្រធានមន្ទីរជុំវិញខេត្ត អញ្ជើញជាអធិបតីក្នុងពិធីសំណេះសំណាល និងបំពាក់មេដាយការពារជាតិ ជូនដល់សមាជិក អតីតយុទ្ធជន ស្រុកកំរៀង ចំនួន៤៥១នាក់ អញ្ជើញចូលរួមមាន៖ លោកប្រធានក្រុមប្រឹក្សាស្រុក, លោកអភិបាលស្រុក, លោកប្រធាន អនុប្រធាន ស.អ.ក ស្រុក, ក្រុមការងារ ស.អ.ក ខេត្ត/ស្រុក, លោកប្រធាន អនុប្រធានសាខាឃុំ អាជ្ញាធរដែនដី សរុបចំនួន៧១នាក់ នៅវិមានមង្គលសុវណ្ណ ស្ថិតនៅភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង។
ពិធីសំណេះសំណាល និងបំពាក់មេដាយមាស ប្រាក់ និងសំរិទ្ធជូនដល់សមាជិកអតីតយុទ្ធជនស្រុកកំរៀងចំនួន៤៥១នាក់ ក្នុងម្នាក់ៗ ទទួលបានមេដាយការពារជាតិ១គ្រឿង ថវិកា ៥០,០០០រៀល ជាអំណោយរបស់សម្តេច អគ្គមហាសេបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធាន សមាគមអតីតយុទ្ធជនកម្ពុជា និងសម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ លោក ច័ន្ទ សុផល គណៈអធិបតី បានសំណេះសំណាល ផ្តាំផ្ញើសួរសុខទុក្ខពីថ្នាក់ដឹកនាំគ្រប់លំដាប់ថ្នាក់ និង ប្រាប់អតីតយុទ្ធជនដែលចូលទាំងអស់ត្រូវជឿជាក់លើការដឹកនាំរបស់សម្តេចតេជោ ប្រមុខរាជរដ្ឋាភិបាល ជាប្រធាន សមាគមអតីតយុទ្ធជនកម្ពុជា និងសុំឲ្យបងប្អូនអតីតយុទ្ធជនបន្តគាំទ្រសម្តេចតេជោ តាមរយៈនៃការនាំក្រុមគ្រួសារទៅបោះឆ្នោតជូនសម្តេចតេជោ ហ៊ុន សែន ដើម្បីធ្វើជានាយករដ្ឋមន្ត្រីបន្តទៀត។ បន្ទាប់មកឯកឧត្តម បានផ្តល់ផ្ទះជូនអតីតយុទ្ធជនទីទ័លក្រចំនួន ២ខ្នងតាមការស្នើសុំរបស់បងប្អូនអតីតយុទ្ធជនផងដែរ៕
ចែករំលែកព័តមាននេះ