ប្រទេសកូរ៉េខាងជើង ៖ ទីភ្នាក់ងារព័ត៌មានគូរ៉េខាងជើង KCNA រាយការណ៍នាថ្ងៃទី១២ ឧសភា ថា កូរ៉េខាងជើងត្រៀមកម្ទេចចោលនាដំណាច់ខែឧសភា ទីតាំងសាកល្បងនុយក្លេអ៊ែររបស់ខ្លួន មួយខែមុនការជួបគ្នាកំពូលជាប្រវត្តិសាស្ត្រ…
ប្រទេសកូរ៉េខាងជើង ៖ ទីភ្នាក់ងារព័ត៌មានគូរ៉េខាងជើង KCNA រាយការណ៍នាថ្ងៃទី១២ ឧសភា ថា កូរ៉េខាងជើងត្រៀមកម្ទេចចោលនាដំណាច់ខែឧសភា ទីតាំងសាកល្បងនុយក្លេអ៊ែររបស់ខ្លួន មួយខែមុនការជួបគ្នាកំពូលជាប្រវត្តិសាស្ត្រ រវាងមេដឹកនាំខ្លួន លោកគីមជុងអ៊ុន និងប្រធានាធិបតីអាមេរិក លោកដូណាល់ ត្រាំ នៅសិង្ហបុរី។
ក្នុងសារ TWITTER មួយប្រធានាធិបតីអាមេរិក បញ្ចេញប្រតិកម្មចំពោះរឿងនេះថា អរគុណកាយវិការប្រកបដោយបញ្ញាញ្ញាណ និងគួរឲ្យស្រឡាញ់។
ដោយដកស្រង់សេចក្ដីប្រកាសមួយរបស់ក្រសួងការបរទេស កូរ៉េខាងជើង KCNAនិយាយថា ពិធីកម្ទេចចោលទីតាំងសាកល្បងនុយក្លេអ៊ែរ ពេលនេះគ្រោងធ្វើរវាងថ្ងៃទី២៣ ដល់ទី២៥ ឧសភា យោងទៅតាមលក្ខខណ្ឌឧតុនិយម ហើយដោយមានវត្តមានរបស់បណ្ដាអ្នកកាសែតបរទេស។
យោងតាមសេចក្ដីប្រកាសនេះថា បណ្ដារួងក្រោមដីសាកល្បងនុយក្លេអ៊ែរ PUNGGYE-RI ជាទីតាំងសម្ងាត់ស្ថិតនៅជិតព្រំដែនចិន នឹងត្រូវបំផ្លាញចោល តាមរយៈការដាក់គ្រឿងផ្ទុះ ដែលបែបនេះនឹងតម្រូវឲ្យមានការបិទផ្លូវចូលទាំងឡាយ។ រាល់ទីតាំងសង្កេតការណ៍ ព្រមទាំងបណ្ដាមជ្ឈមណ្ឌលស្រាវជ្រាវនឹងត្រូវជម្លៀសចេញ ព្រមទាំងបណ្ដាបុគ្គលិកការពារសន្តសុខ និងបណ្ដាអ្នកស្រាវជ្រាវ។ ក្រសួងការបរទេសនិយាយលម្អិតពីការបិទទីតាំងនោះ។
សេចក្ដីប្រកាសគូសបញ្ជាក់ទៀតថា បណ្ដាអ្នកកាសែតចិន រុស្ស៊ី អាមេរិក អង់គ្លេស និងកូរ៉េខាងត្បូងនឹងអនុញ្ញាតឲ្យចូលទៅកាន់ទីតាំង ដើម្បីយកព័ត៌មានពីព្រឹត្តិការណ៍ ក្នុងបំណងបង្ហាញពីតម្លាភាពនៃការកម្ទេចចោលទីតាំងសាកល្បងនុយក្លេអ៊ែរកូរ៉េខាងជើង។ ទោះបីយ៉ាងណាចំនួនអ្នកកាសែត មានការកម្រិតមកពីខ្វះកន្លែងនៅមជ្ឈមណ្ឌលសាកល្បង ស្ថិតនៅតំបន់ភ្នំមួយដែលគ្មានមនុស្សរស់នៅ។
អ្នកជំនាញការមួយចំនួនយល់ថា នេះជាសម្បទានមួយ ព្រោះទីតាំងអាចលែងត្រូវប្រើមកពីភ្នំលែងសូវរឹងមាំ ដោយបើយោងតាមបណ្ដាអ្នកសិក្សាការរញ្ជួយដីចិនថា ការសាកល្បងនុយក្លេអ៊ែរចុងក្រោយ របស់កូរ៉េខាងជើង បណ្ដាលឲ្យមានការបាក់ថ្មខាងក្នុងភ្នំ៕
ចែករំលែកព័តមាននេះ