ទីក្រុងបាងកក៖ លោកអនុទីនដែលជាប្រធានគណបក្សភូមិចៃថៃ និងដែលទើបតែដកខ្លួនចេញពីរដ្ឋាភិបាលចម្រុះក្រោមការដឹកនាំរបស់លោកស្រីផែថងថាន លោកបានបញ្ជាក់ថាសុខចិត្តធ្វើជាគណបក្សប្រឆាំងបែបស្ថាបនា។ ប៉ុន្តែមិនរួមកម្លាំងជាមួយគណបក្សនយោបាយដទៃទៀតដែលមានអាសនៈនៅក្នុងសភាដើម្បីបង្កើតរដ្ឋាភិបាលផ្សេងពីរដ្ឋាភិបាលរបស់លោកស្រីផែថងថានទេ។
លោកអនុទីនធ្លាប់ជាឧបនាយករដ្ឋមន្ត្រី និងរដ្ឋមន្ត្រីមហាផ្ទៃ។ លោកបង្ហាញមុខជាលើកដំបូងកាលពីថ្ងៃសុក្របន្ទាប់ពីប្រកាសដកខ្លួនជាផ្លូវការពីរដ្ឋាភិបាលចម្រុះ។ លោកថ្លែងថាអ្វីដែលជាពាក្យចចាមអារ៉ាមវានៅតែជាពាក្យចចាមអារ៉ាមតែប៉ុណ្ណោះ។ យើងសម្រេចចិត្តដកថយមួយជំហាន (ពីរដ្ឋាភិបាល) ដើម្បីរស់នៅដោយឯករាជ្យ-ម្ចាស់ការ ខ្លូនទីពឹងខ្លួន។
លោកថ្លែងបន្តទៀតថាយើងនឹងខិតខំបំពេញការងារឱ្យអស់ពីកម្លាំងកាយចិត្តទៅតាមសមត្ថភាពរបស់យើង។ គណបក្សរបស់លោកគ្មានផែនការបង្កើតរដ្ឋាភិបាលចម្រុះថ្មីទេ។ លោកថាគណបក្សរបស់លោកចាប់ផ្ដើមបំពេញការងារជាបក្សប្រ
ឆាំងជាបណ្ដើរៗហើយ។ គណបក្សរបស់លោកកំពុងពិនិត្យមើលចំណុចណាខ្លះដែលអាចរិះគន់រដ្ឋាភិបាលដើម្បីផលប្រយោជន៍សាធារណៈ។
ចំពោះសំណួរថាតើលោកយល់យ៉ាងណាដែរដែលក្រុមប្រឆាំងនៅថៃត្រៀមរៀបចំមហាបាតុកម្មនៅថ្ងៃទី២៨ ខែមិថុនាខាងមុខនេះ (ដើម្បីទាមទារឱ្យលោកស្រីផែថងថានចុះពីតំណែង)? លោកអនុទីនសង្ឃឹមថាប្រទេសថៃនៅតែរក្សាបានសន្តិភាព និងស្ថិរភាពជានិច្ច។ លោកចង់ឃើញប្រទេសជាតិមានភាពស្ងប់ស្ងាត់ និងបន្តដំណើរទៅមុខទៀត។ លោកយល់ថាទោះបីយើងប្រកាន់និន្នាការខាងណាក៏ដោយប៉ុន្តែយើងកុំភ្លេចគិតពីសន្តិភាពរបស់ប្រទេសជាតិដែលជាកត្តាសំខាន់ជាទីបំផុតសម្រាប់ពេលបច្ចុប្បន្ន។
តាមការបញ្ជាក់ខាងលើនេះ មានន័យថាគណបក្សរបស់លោកនឹងមិនចូលរួមនៅក្នុងចលនាបាតុកម្មនោះទេ។ លោកថ្លែងថាគណបក្សភូមិចៃថៃមិនចូលរួមធ្វើឱ្យវឹកវរនៅក្នុងឆាកនយោបាយថៃជាដាច់ខាត។ គណបក្សរបស់លោកនឹងប្រើប្រាស់វេទិកាសភាដែលខ្លួនមានអាសនៈមួយចំនួននៅក្នុងនោះប្រកបដោយភាពចាស់ទុំខាងនយោបាយដើម្បីតស៊ូមតិសម្រាប់ជាប្រយោជន៍សាធារណៈ៕
ចែករំលែកព័តមាននេះ