រាជធានីភ្នំពេញ ៖ សាលាដំបូងរាជធានីភ្នំពេញ នៅថ្ងៃទី១១ ឧសភា បានលើកយកសំណុំរឿងយុវជនម្នាក់ ដែលតាំងខ្លួនជាគ្រូអគ្គីនេត្រល្បីល្បាញតាមសង្គមហ្វេសបុក រឿងចេះមន្តអាគមន៍អូមអាម ពាក់ព័ន្ធករណីជួញដូរគ្រឿងញៀនខុសច្បាប់។ ជនត្រូវចោទឈ្មោះ…
រាជធានីភ្នំពេញ ៖ សាលាដំបូងរាជធានីភ្នំពេញ នៅថ្ងៃទី១១ ឧសភា បានលើកយកសំណុំរឿងយុវជនម្នាក់ ដែលតាំងខ្លួនជាគ្រូអគ្គីនេត្រល្បីល្បាញតាមសង្គមហ្វេសបុក រឿងចេះមន្តអាគមន៍អូមអាម ពាក់ព័ន្ធករណីជួញដូរគ្រឿងញៀនខុសច្បាប់។ ជនត្រូវចោទឈ្មោះ វ៉ាន់ សុខសីហា អាយុ២២ឆ្នាំ ហៅគ្រូអគ្គិនេត្រ ស្នាក់នៅផ្ទះលេខ៦៦២ ផ្លូវ២៧១ សង្កាត់បឹងទំពុន ខណ្ឌមានជ័យ។ នៅក្នុងសវនាការ គ្រូអគ្គិនេត្រ បានសារភាពថា ខ្លួនគេពិតជាបានលក់គ្រឿងញៀនពិតប្រាកដមែន ដើម្បីបានប្រាក់កម្រៃ ចិញ្ចឹមជីវិត។ ក្រោយការសាកសួរដេញដោលចប់ អង្គសវនាការ បានសម្រេចលើកពេលប្រកាស សាលក្រម រឿងក្ដីនេះទៅថ្ងៃទី៣០ ឧសភា ខាងមុខ។
គួរំលឹកថា ជនត្រូវចោទឈ្មោះ វ៉ាន់ សុខសីហា ហៅ គ្រូអគ្គិនេត្រ ត្រូវបានកម្លាំងសមត្ថកិច្ចការិយាល័យទី៦ នៃមន្ទីរប្រឆាំងគ្រឿងញៀន ដឹកនាំដោយលោក ដាំ ឈឿន នាយករងមន្ទីរ ក្រោមការសម្របសម្រួលរបស់លោក អុំ សុភក្តិ ព្រះរាជអាជ្ញារងអមសាលាដំបូង រាជធានីភ្នំពេញ បានធ្វើការឃាត់ខ្លួននៅចំណុចបណ្តោយផ្លូវ ២៧១ ក្រោយវិទ្យាល័យ ជាស៊ីម សាមគ្គី កាលពីថ្ងៃទី២៧ ខែកញ្ញា ឆ្នាំ២០១៧កន្លងទៅ ពាក់ព័ន្ធរឿងជួញដូរគ្រឿងញៀន ប្រភេទមេតំហ្វេតាមីន ទម្ងន់ ២.៦៨ក្រាម។ ក្រោយពីឃាត់ខ្លួន ជនត្រូវចោទខាងលើ សមត្ថកិច្ច បានបញ្ជូនខ្លួនជនត្រូវឈ្មោះ វ៉ាន់ សុខសីហា ហៅហោរាអគ្គិនេត្រ មកតុលាការនៅរសៀលថ្ងៃទី២៩ ខែកញ្ញា ឆ្នាំ២០១៧ ហើយនៅថ្ងៃទី ៣០ កញ្ញា ចៅក្រម រស់ ពិសិដ្ឋ បានចេញដីកាសម្រេចឃុំខ្លួនរហូតដល់ថ្ងៃកាត់ទោសនេះ៕
ចែករំលែកព័តមាននេះ