ខេត្តក្រចេះ ៖ បើទោះបីជាស្ថានភាពគ្រោះថ្នាក់ចរាចរណ៍នៅខេត្តក្រចេះ កន្លងមកមានភាពស្មុគស្មាញ ប្រឈមនឹងការកើតមាន តែមន្ត្រីអនុវត្តច្បាប់បានចុះអនុវត្តបានយ៉ាងម៉ឺងមាត់ បានធ្វើឲ្យចំនួនគ្រោះថ្នាក់មានចំនួនធ្លាក់ចុះ។ ក៏ប៉ុន្តែកិច្ចការងារនេះគឺត្រូវបាន អគ្គស្នងការរងនគរបាលជាតិ នាយឧត្តមសេនីយ៍…
ខេត្តក្រចេះ ៖ បើទោះបីជាស្ថានភាពគ្រោះថ្នាក់ចរាចរណ៍នៅខេត្តក្រចេះ កន្លងមកមានភាពស្មុគស្មាញ ប្រឈមនឹងការកើតមាន តែមន្ត្រីអនុវត្តច្បាប់បានចុះអនុវត្តបានយ៉ាងម៉ឺងមាត់ បានធ្វើឲ្យចំនួនគ្រោះថ្នាក់មានចំនួនធ្លាក់ចុះ។ ក៏ប៉ុន្តែកិច្ចការងារនេះគឺត្រូវបាន អគ្គស្នងការរងនគរបាលជាតិ នាយឧត្តមសេនីយ៍ ហ៊ឹម យ៉ាន នៅតែជំរុញឲ្យនគរបាលចរាចរណ៍ បន្តពង្រឹងការអនុវត្តច្បាប់ ដើម្បីការពារសុវត្ថិភាពប្រជាពលរដ្ឋ និងអ្នកធ្វើដំណើរលើដងផ្លូវជាតិ។ ថ្លែងទៅកាន់នាយ-នាយរងនគរបាល ពិសេសមន្ត្រីជំនាញ មកពីតាមបណ្តាអង្គភាពពាក់ព័ន្ធ និងការអនុវត្តច្បាប់ ក្នុងកិច្ចប្រជុំពិភាក្សាជម្រុញការរឹតបន្តឹងអនុវត្តន៍ច្បាប់ស្ដីពីចរាចផ្លូវគោក ដែលបានធ្វើឡើងនៅ ស្នងការដ្ឋាននគរបាលខេត្តក្រចេះ កាលពីថ្ងៃទី១០ ឧសភា អគ្គស្នងការរងនាយឧត្តមសេនីយ៍ ហ៊ឹម យ៉ាន បានសម្តែងការកោតសសើរដល់មន្ត្រីជំនាញ តាមមន្ទីរស្ថាប័នអង្គភាពពាក់ព័ន្ធទាំងអស់ដែលកន្លងមក បានខិតខំចូលរួមអនុវត្តកិច្ចការងារ បានធ្វើឲ្យតួលេខនៃគ្រោះថ្នាក់មានការថយចុះគួរឲ្យកត់សម្គាល់។
ភាពប្រឈមនៃគ្រោះថ្នាក់ចរាចរណ៍ដែលកន្លងមកធ្នាប់កើតមាននៅខេត្តក្រចេះ ត្រូវបាន នគរបាលជំនាញរកឃើញថា អត្រាដែលបានកើតឡើងភាគច្រើនបណ្តាលមកពីកត្តាល្បឿន ការមិនគោរពសិទ្ធ និងកត្តាយានយន្តជាដើម។ ស្នងការនគរបាលខេត្តក្រចេះឯកឧត្តម នាយឧត្តមសេនីយ៍ លន់ សុផាត បានថ្លែងឲ្យដឹងដែរថា គ្រោះថ្នាក់ចរាចណ៍ក្នុងត្រីមាសទី១ ដើមឆ្នាំ២០១៨ ថយចុះ ចំនួន៦លើក ស្មើនឹងជាង១៣ (៤០/៤៦លើក) មនុស្សស្លាប់ថយចុះចំនួន ២នាក់ ស្មើនឹង១០% របួសថយចុះ ៦នាក់ ខូចខាតរថយន្តថយចុះ ២៥គ្រឿង ក្នុងនោះម៉ូតូ៣៩គ្រឿង និងរថយន្ត ៧គ្រឿង។ អគ្គស្នងការរងនគរបាលជាតិ នាយឧត្តមសេនីយ៍ ហ៊ឹម យ៉ាន បានមានប្រសាសន៍ បញ្ជាក់ថា ក្នុងអំឡុងពេលដែលបានអនុវត្តរឹតបន្តឹងច្បាប់ចរាចណ៍ផ្លូវគោកនៅដើមឆ្នាំ២០១៦ រហូតដល់ឆ្នាំ២០១៨នេះ នៅទូទាំងប្រទេស ចំនួនមនុស្សស្លាប់ថយចុះសរុប ២៧១នាក់ របួសថយចុះ ៥៨០នាក់ ។
ចំនួនថយចុះនេះ ត្រូវបានលោកនាយឧត្តមសេនីយ៍ចាត់ទុកថា បានមកពីរួមសហការគ្នា រវាងស្ថាប័នពាក់ព័ន្ធក្នុងការអនុវត្តច្បាប់ពិសេសនគរបាលចរាចរណ៍ដែលជាមន្ត្រីអនុវត្ត ច្បាប់ផ្ទាល់តែម្តង។ ស្របជាមួយគ្នានេះ លោកនាយឧត្តមសេនីយ៍បានជំរុញឲ្យ មន្ត្រីនគរបាលចរាចណ៍នៅតាមគោលដៅ ត្រូវរឹតបន្តឹងពង្រឹងការត្រួតពិនិត្យអប់រំ និងណែនាំ ដល់ម្ចាស់រថយន្តកែច្នៃ រថយន្តល្មើសល្បឿន អ្នកបើកបរស្ថិតក្រោមជាតិស្រវឹង ជាពិសេស អ្នកបើកបរមិនពាក់ខ្សែ ក្រវាត់ការពារ និងមិនពាក់មួកសុវត្ថិភាព ដើម្បីកាត់បន្ថយគ្រោះថ្នាក់ ចរាចណ៍ និងការពារអាយុជីវិតជូនប្រជាពលរដ្ឋ ស្របតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្ងៃនេះថ្ងៃស្អែក គ្មានគ្រោះថ្នាក់ចរាចណ៍៕
ចែករំលែកព័តមាននេះ