រាជធានីភ្នំពេញ ៖ ការកកស្ទះចរាចរណ៍ជារឿងសម្រាប់អ្នកធ្វើដំណើរមិនចង់ឃើញ និងជួបនោះទេ ប៉ុន្តែធ្វើយ៉ាងណាដំណោះស្រាយនេះត្រូវក្រសួងពាក់ព័ន្ធកំពុងដុតដៃដុតជើងក្នុងដោះស្រាយកុំឲ្យមាន ដោយសារការកកស្ទះនេះបានប៉ះពាល់ដល់ពេលវេលរបស់ពលរដ្ឋធ្វើការ និងបាត់បង់សោភ័ណភាពទីក្រុង។ ទាក់ទងនឹងការកកស្ទះចរាចរណ៍នេះដែរ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថាក្នុងការពិនិត្យជាក់ស្តែង នៅរាជធានីភ្នំពេញនាបច្ចុប្បន្នមានចំណុចកកស្ទះចរាចរណ៍ជាអចិន្ត្រៃយ៍មានចំនួន១៨២គោលដៅ។ នៅចំពោះមុខនេះដែរក្រសួងសាធារណៈការ និង ក្រសួងមហាផ្ទៃកំពុង រួមគ្នាដោះស្រាយចំនួន៥គោលដៅសិន ដើម្បីបញ្ច្រៀសការកកស្ទះចរាចរណ៍នាពេលបច្ចុប្បន្ន។ បញ្ជាក់ក្រោយបញ្ចប់កិច្ចប្រជុំឆ្លងរបាយការណ៍ប្រចាំត្រីមាសទី១ និងបូកសរុបលទ្ធផលការងារសុវត្ថិភាពចរាចរណ៍ ផ្លូវគោកប្រចាំខែមេសា ឆ្នាំ២០១៨ កាលពីរសៀលថ្ងៃទី១០ ឧសភា ឆ្នាំ២០១៨ នៅទីស្តីការក្រសួង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានឲ្យដឹងថា ការកកស្ទះចរាចរណ៍សព្វថ្ងៃនេះ ផ្តើមចេញពីពលរដ្ឋ ចតរថយន្តមិនគោរពច្បាប់ លក់ដូរលើផ្លូវថ្នល់ និងការមិនគោរពច្បាប់មួយចំនួន នាំឲ្យការការកក ស្ទះចរាចរណ៍កាន់តែ ច្រើននៅរាជធានីភ្នំពេញ។
ជុំវិញការកកស្ទះចរាចរណ៍នេះដែរលោករដ្ឋមន្ត្រីក្រសួងសាធារណៈការបានលើកឡើងថា នាពេលនេះគណៈកម្មាធិការដោះស្រាយបញ្ហាការកកស្ទះចរាចរណ៍កំពុងធ្វើការដោះស្រាយបញ្ហាចំពោះមុខតែចំនួន៥គោលដៅសិនដែលជាគោលដៅកកស្ទះជាងគេមុននឹងធ្វើការដោះស្រាយការកកស្ទះតំបន់ដទៃទៀត។ ដើម្បីដោះស្រាយនេះ ត្រូវធ្វើការរឹតបន្តឹងកន្លែងចតរថយន្តនៅកន្លែងកកស្ទះនេះ លោក ស៊ុន ចាន់ថុល ដែលជាអនុប្រធានអចិន្ដ្រៃយ៍គ ណៈកម្មាធិការជាតិសុវត្ថិភាពចរាចរណ៍ផ្លូវគោកក៏បានមានប្រសាសន៍ថានឹងសិក្សាសាកល្បងផ្លូវចំនួន៥កន្លែង នៅក្នុងរាជធានីភ្នំពេញ។ លោកបន្តថា បន្ទាប់ពីបានសិក្សាលើផ្លូវមួយចំនួនក្នុងរាជធានីភ្នំពេញរួចមកក្រសួងសាធារណៈការ និងសាលារាជធានីភ្នំពេញបានជ្រើសរើសយកផ្លូវភ្លើងស្ដុបចំនួន៥កន្លែង ដើម្បីយកមកពិនិត្យពិចារណាក្នុងការដា ក់ឱ្យអនុវត្ដន៍សាកល្បង និងចូលរួមដោះស្រាយបញ្ហាកកស្ទះចរាចរណ៍ឱ្យបានក្នុងជំហានដំបូងជាមុនសិន។
លោកបានបញ្ជាក់ថា «ដោយមើលឃើញថា បច្ចុប្បន្ននេះការកកស្ទះចរាចរណ៍បាន និងកំពុងតែកើតឡើង ជារៀងរាល់ថ្ងៃនោះ គណៈកម្មាធិការជាតិសុវត្ថិភាពចរាចរណ៍ផ្លូវគោកបានរៀបចំក្រុមការងារពិសេស ដើម្បីសិក្សាលើការកក ស្ទះចរាចរណ៍នៅក្នុងរាជធានីភ្នំពេញ និងបានរកឃើញផ្លូវភ្លើងស្ដុបប្រសព្វចំនួន១៨២កន្លែង មានការកកស្ទះចរាចរណ៍»។ លោកបន្ដថា ក្រសួងសាធារណការ ក៏ដូចជាគណៈកម្មាធិការជាតិ សុវត្ថិភាពចរាចរណ៍ផ្លូវគោក កំពុងតែពិនិត្យមើលថា តើមានផ្លូវណាខ្លះ ដែលត្រូវប្ដូរទៅជាផ្លូវឯកទិសដើម្បីធ្វើយ៉ាងណាឱ្យការធ្វើដំណើររបស់ប្រជាពលរដ្ឋមានភាពងាយស្រួល និងធ្វើដំណើរស្របគ្នាតែមួយ។ ទន្ទឹមនេះ មន្ដ្រីជំនាញក៏កំពុងជ្រើសរើសផ្លូវមួយកន្លែងដែលហាមមិនឱ្យបត់ឆ្វេង ឬបត់ត្រឡប់ក្រោយ ដែលជាកត្ដាធ្វើឱ្យមានការកកស្ទះចរាចរណ៍ផងដែរ ដើម្បីធ្វើជាបទពិសោធន៍ និងដាក់ឱ្យ អនុវត្ដន៍ជាក់ស្ដែងចំពោះបញ្ហាកកស្ទះចរាចរណ៍នៅក្នុងរាជធានីភ្នំពេញ។
លោករដ្ឋមន្ដ្រីបានបន្ថែមទៀតថា ក្រុមការងារជំនាញក៏បានជ្រើសរើស ផ្លូវមួយបន្ថែមទៀត ដើម្បីរឹតបន្ដឹងការចតឡាននៅកន្លែងហាមឃាត់ ដែលប្រជាពលរដ្ឋមួយចំនួនតែងតែយកឡានទៅចតនៅលើដងផ្លូវ ឬកន្លែងហាមឃាត់ បណ្ដាលឱ្យមានការកកស្ទះចរាចរណ៍នៅតាមដងផ្លូវ។ បើតាមការឲ្យដឹងពីលោករដ្ឋមន្ត្រី ការកកស្ទះចរាចរណ៍មួយចំនួនក៏កើតចេញពីពលរដ្ឋលក់ដូរទាំងតាមចិញ្ចឹមផ្លូវ និងទ្រូងផ្លូវផងដែរ ក្នុងនេះដូចជាតំបន់មន្ទីរពេទ្យរុស្សីជាដើម។ ដោយឡែកពលរដ្ឋមួយចំនួនក៏បានបង្ហាញពីការលក់ដូរមិនមានរបៀបរៀបរយ តាមដងផ្លូវដែលនាំឲ្យកើតការកកស្ទះចរាចរណ៍ និងបញ្ហាប្រឈមនាកន្លងមកនេះផងដែរ។ គួរបញ្ជាក់ថា បើតាមលោក សាំ ពិសិដ្ឋ ប្រធានមន្ទីរសាធារណការរាជធានីភ្នំពេញបានឲ្យដឹងនាកន្លងមកថា ចំនួនយានយន្ដនៅក្នុងរាជធានីភ្នំពេញ សព្វថ្ងៃនេះ ប្រមាណ២លាន៨ម៉ឺនគ្រឿង ក្នុងនោះម៉ូតមាន១លាន៦សែនគ្រឿង និងរថយន្ដមាន ៤៨ម៉ឺនគ្រឿង។ ដែលបញ្ហាចំនួន យានយន្តច្រើននេះហើយនាំអោយកើតការកកស្ទះចរាចរណ៍កាន់តែងខ្លាំងក្លាឡើងបន្តបន្ទាប់៕
ចែករំលែកព័តមាននេះ