រាជធានីភ្នំពេញ ៖ ប្រជាពលរដ្ឋមួយគ្រួសារ ដែលបានក្រាញននៀល រស់នៅលើដីក្នុងវត្តជោតមង្គលហៅវត្តព្រែកព្នៅ ក្នុងភូមិកណ្តាល សង្កាត់ព្រែកព្នៅ ដែលបានប្តឹងផ្តល់គ្នា អស់រយៈពេលជាច្រើនឆ្នាំ មកហើយ ត្រូវបានមន្ត្រីតុលាការ និងអាជ្ញាធរខណ្ឌព្រែក ប្រើកម្លាំងចុះទៅរុះរើចេញទៅតាមអំណាចអំណាចតុលាការ។ ការចុះរុះរើផ្ទះរំលោភយកដីវត្តនេះ កាលពីព្រឹក ថ្ងៃទី១០ ខែឧសភា ឆ្នាំ២០១៨ ដឹកនាំដោយលោក ជា ខេម៉ា អភិបាលរងខណ្ឌព្រែកព្នៅ និងមានការសម្របសម្រួលពីលោក ប្រាក់ សាវុធ ប្រធានរដ្ឋបាល អយ្យការសាលាដំបូងរាជធានីភ្នំពេញ ទទួលការងារ អាជ្ញាសាលា។តាមអាជ្ញាធរបានឲ្យដឹងថា គ្រួសារដែលចាញ់ក្តី និងត្រូវបានបណ្តេញចេញនោះឈ្មោះ ផា ភឿន ភេទប្រុស អាយុ៧០ឆ្នាំ ដែលបានរស់នៅ លើដីវត្តមានទំហំទទឹងប្រវែង៣ម៉ែត្រ និងបណ្តោយ១៥ ម៉ែត្រ អស់រយៈពេល១០មកហើយ។
តាមព័ត៌មានឲ្យដឹងថា ដីនេះមានទំនាស់រ៉ាំរ៉ៃប្រមាណជិត១០ឆ្នាំ ដោយសាតែគាត់ពុំព្រមចាក់ចេញ និងចង់បានដីវត្តដែលបានប្តឹងផ្តល់គ្នាទៅតុលាការ ហើយត្រូវបានតុលាការប្រគល់ដីនោះឱ្យទៅវត្តជោតមង្គលវិញ។ ទោះបីជាយ៉ាងណាចុងចម្លើយឈ្មោះ ផា ភឿន ភេទប្រុស អាយុ៧០ឆ្នាំ និងកូនចៅមិនព្រមចាកចេញ នៅតែក្រាញននៀលរហូត។ លោក ជា ខេម៉ា អភិបាលរងខណ្ឌបានឱ្យដឹងថា ការចុះរុះរើសំណង់នេះអនុវត្តតាមសាលក្រម រដ្ឋប្បវេណីលេខ ១០១៧ ថ ចុះថ្ងៃទី១៥ ខែមិថុនា ឆ្នាំ២០១៧ របស់តុលាការរាជធានីភ្នំពេញ ដើម្បីប្រគល់ដីទៅឲ្យវត្តវិញ។
តាមព៌ត៌មានបានឲ្យដឹងថា កន្លងមកសមត្ថកិច្ចចម្រុះបានចុះទៅអនុវត្តសាលក្រមរុះរើម្តងមកហើយ កាលពីថ្ងៃទី២៩ ខែវិច្ឆិកា ឆ្នាំ២០១៧ តែភាគីអ្នកចាញ់មានសុំពន្យាពេលសន្យាថា រុះរើដោយខ្លួនឯងតែម្ចាស់មិនព្រមទើបសមត្ថកិច្ចចុះទៅរុះរើ ហើយម្ចាស់ក៏បានឯកភាពផងដែរ។ ទោះបីជាយ៉ាង ណាអាជ្ញាធរខណ្ឌព្រែកព្នៅ ក៏បានយកចិត្តទុកដាក់ដោយជួលផ្ទះមួយកន្លែងឱ្យគ្រួសារគាត់ស្នាក់នៅបណ្តោះអាសន្នសិន និងរកទិញដីកន្លែងណាមួយសម្រាប់សាងសង់ផ្ទះឲ្យគាត់រស់នៅ៕
ចែករំលែកព័តមាននេះ