ការប្រកួតបាល់ទាត់ដណ្តើមពានរង្វាន់ពិភពលោក (FIFA World Cup) ២០១៨ ដែលនឹងប្រារព្ធធ្វើឡើងនៅប្រទេសរុស្ស៊ីចាប់ពីថ្ងៃទី១៤ ខែមិថុនា ដល់ថ្ងៃទី១៥ ខែកក្កដា ខាងមុខនេះ មានដើមកំណើតតាំងពីឆ្នាំ១៩៣០មកម៉្លេះ ។ រហូតមកទល់ពេលនេះ មិនទាន់មានកីឡាករឆ្នើមរូបណាអាចបំបែកកំណត់ត្រាស៊ុតបាល់បញ្ចូលទីបានច្រើនជាងគេក្នុងប្រវត្តិសាស្ត្រ World Cup របស់អតីតកំពូលខ្សែប្រយុទ្ធជើងចាស់ពីមុនៗនៅឡើយទេ ។ ខាងក្រោមនេះ គឺជាឈ្មោះសមាសភាពអតីតកីឡាករដែលត្រូវបាន FIFA ចងក្រងជាកំណត់ត្រាកីឡាកររកគ្រាប់បាល់បានច្រើនជាងគេនាពេលកន្លងមក ដោយគិតចាប់ពីការប្រកួតវគ្គចែកពូល៣២ក្រុមដល់វគ្គផ្តាច់ព្រ័ត្រ (មិនរាប់បញ្ជូលវគ្គជម្រុះបឋមក្នុងតំបន់)៖
១-កីឡាករ Miroslav Klose (១៦គ្រាប់)៖
អតីតខ្សែប្រយុទ្ធក្រុមជម្រើសជាតិអាល្លឺម៉ង់អំឡុងឆ្នាំ២០០១ ដល់២០១៤ កីឡាករ Miroslav Klose បានបង្ហាញខ្លួនឱ្យអាល្លឺម៉ង់ចំនួន ១៣៧ប្រកួត និងស៊ុតបាន៧១គ្រាប់គិតគ្រប់កម្មវិធី ។ បច្ចុប្បន្នលោក Miroslav Klose មានអាយុ៣៩ឆ្នាំ និងធ្លាប់លេង World Cup បានចំនួន៤ដង (២០០២, ២០០៦, ២០១០, ២០១៤) ដោយរកបាន១៦គ្រាប់ធ្វើឱ្យរូបលោកហក់ឡើងកាន់កាប់តំណែងលេខ១មកទល់ពេលនេះ ។
២-កីឡាករ Ronaldo (១៥គ្រាប់) ៖
វីរបុរសប្រេស៊ីល Ronaldo វ័យ៤១ឆ្នាំ ធ្លាប់តែឈរនៅកំពូលតារាងជិត១ទសវត្ស ត្រូវបានធ្លាក់មកនៅចំណាត់ថ្នាក់លេខ២វិញ បន្ទាប់ពីកីឡាករ Miroslav Klose ស៊ុតគ្រាប់ទី១៦របស់ខ្លួនជួយអាល្លឺម៉ង់ឈ្នះប្រេស៊ីល៧ទល់នឹង១កាលពីឆ្នាំ២០១៤ ។ Ronaldo បានចូលរួមលេងជាខ្សែប្រយុទ្ធឱ្យក្រុមជម្រើសជាតិចាប់ពីឆ្នាំ១៩៩៤ដល់២០១១ ចំនួន៩៨ប្រកួត ស៊ុតបាន៦២គ្រាប់ ។ រីឯ១៥គ្រាប់នៅ World Cup វិញ Ronaldo រកបានក្នុងអំឡុងវត្តមានរដូវកាលឆ្នាំ១៩៩៨, ២០០២ និង ២០០៦ ។
៣-កីឡាករ Gerd Muller (១៤គ្រាប់)៖
អតីតខ្សែប្រយុទ្ធ Gerd Muller បានចូលរួមលេងឱ្យក្រុមជម្រើសជាតិអាល្លឺម៉ង់ខាងលិចនៅឆ្នាំ ១៩៦៦ដល់ឆ្នាំ១៩៧៤ ដោយបង្ហាញខ្លួនបាន៦២លើក តែស៊ុតបាន៦៨គ្រាប់ ។ ឈ្មោះរបស់លោកនៅតែចារជាប់ក្នុងបញ្ជីកីឡាកររកគ្រាប់បាល់បានច្រើនជាងគេដដែល បើទោះជាវត្តមានរបស់លោកបានឃ្លាតឆ្ងាយពីព្រឹត្តិការណ៍ World Cupអស់ជាច្រើនសម័យកាលហើយក្តី ។ គួរបញ្ជាក់ថា ១៤គ្រាប់របស់លោកតាអាយុ៧២ឆ្នាំខាងលើ រកបានត្រឹមតែ២រដូវកាលប៉ុណ្ណោះនៅឆ្នាំ១៩៧០ និង១៩៧៤ ។
៤-កីឡាករ Just Fontaine (១៣គ្រាប់)៖
លោកតា Just Fontaine បច្ចុប្បន្នមានអាយុ៨៤ឆ្នាំ ធ្លាប់ចូលលេងឱ្យក្រុមជម្រើសជាតិបារាំងតាំងពីឆ្នាំ១៩៥៣ ដល់១៩៦០ និងលេងបានតែចំនួន២១ប្រកួតប៉ុណ្ណោះ ប៉ុន្តែគាត់ស៊ុតបាន៣០គ្រាប់ ។ ម្យ៉ាងទៀត អតីតខ្សែប្រយុទ្ធឆ្នើមរូបនេះ បានបង្ហាញខ្លួននៅក្នុងព្រឹត្តិការណ៍ World Cup តែម្តងគត់កាលពីឆ្នាំ១៩៥៨ លេងបាន៦ប្រកួត និងរកបាន១៣គ្រាប់គួរឱ្យភ្ញាក់ផ្អើល ។
៥-កីឡាករ Pele (១២គ្រាប់) ៖
វីរបុរសប្រេស៊ីលជំនាន់សតវត្សទី២០ Pele ដែលល្បីរន្ទឺខ្លាំងនាសម័យនោះ នៅតែអាចរក្សាឈ្មោះរបស់ខ្លួនក្នុងបញ្ជីកីឡាកររកគ្រាប់បាល់បានច្រើនជាងគេនៅក្នុងព្រឹត្តិការណ៍ World Cup ដដែល បន្ទាប់ពីរកបាន១២គ្រាប់អំឡុងវត្តមានឆ្នាំ១៩៥៨, ១៩៦២, ១៩៦៦ និង១៩៧០ ។ អតីតខ្សែប្រយុទ្ធវ័យ៧៧ឆ្នាំរូបនេះមានឈ្មោះលេងនៅក្រុមជម្រើសជាតិតាំងពីឆ្នាំ១៩៥៧ រហូតដល់ឆ្នាំ១៩៧១ ដោយបង្ហាញខ្លួនបាន៩២ប្រកួត និងស៊ុតបាន៧៧គ្រាប់ ៕
ចែករំលែកព័តមាននេះ