រាជធានីភ្នំពេញ ៖ រថយន្តក្រុងមួយគ្រឿងដឹកប្រជាពលរដ្ឋស្រី-ប្រុសពីបណ្តាខេត្តនានា មកចូលរួមព្រះរាជពិធីថ្វាយព្រះភ្លើងព្រះបរមសពសម្តេចឪ ពេលត្រឡប់ទៅស្រុកកំណើតវិញ មកដល់មុខទីស្តីការគណៈរដ្ឋមន្រ្តីតាមមហាវិថីសហព័ន្ធរុស្ស៊ីក្នុងសង្កាត់មនោរម្យ ខណ្ឌ៧មករា ស្រាប់តែរថយន្តដាច់កាប៉ែនបើកទៅមុខលែងរួចនៅកណ្តាលផ្លូវបង្កឲ្យស្ទះចរាចរណ៍រាប់ម៉ោង កាលពីវេលាម៉ោង៩និង៣០នាទីព្រឹកថ្ងៃទី៥ កុម្ភៈ ។
សាក្សីបានឲ្យដឹងថា រថយន្តក្រុងនេះដឹកអ្នកដំណើរដែលមកចូលរួមព្រះរាជពិធីថ្វាយព្រះភ្លើងព្រះបរមសពតាំងពីថ្ងៃទី១ កុម្ភៈ រហូតដល់ថ្ងៃទី៥ កុម្ភៈ ទើបដឹកត្រឡប់ទៅស្រុកកំណើតវិញ ។ ខណៈមកដល់ចំណុចខាងលើ ស្រាប់តែរថយន្តដាច់កាប៉ែន បើកទៅមុខលែងរួច ឈប់នៅកណ្តាលផ្លូវធ្វើឲ្យស្ទះចរាចរណ៍រាប់ម៉ោង ។
ដោយឡែកភ្ញៀវដែលជិះលើរថយន្តនោះនាំគ្នាជញ្ជូនអីវ៉ាន់ និងរបស់របរមួយចំនួន ជាពិសស មានព្រះឆាយាល័ក្ខណ៍របស់ព្រះបរមរតនកោដ្ឋចេញពីរថយន្ត ។ មួយសន្ទុះក្រោយមកមានរថយន្តក្រុងមួយគ្រឿងទៀតបានមកដឹកអ្នកដំណើរទាំងនោះទៅស្រុកកំណើតរបស់ពួកគាត់បន្តទៀត ឯរថយន្តនោះត្រូវគេរុញអែបចិញ្ចើមផ្លូវដើម្បីជួសជុល ៕
ចែករំលែកព័តមាននេះ