ខេត្តកំពង់ធំ ៖ រថយន្តមួយគ្រឿងបុកដើមឈើក្រឡាប់ចូលទឹកបណ្តាលឲ្យមនុស្សម្នាក់ស្លាប់ និង២នាក់រងរបួសស្រាល បានកើតឡើងលើកំណាត់ផ្លូវជាតិលេខ៦២ ត្រង់ចំណុចភូមិត្រពាំងចំបក់ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ នៅវេលាម៉ោង១២និង៥នាទីរំលងអាធ្រាតឈានចូលថ្ងៃទី៩ ខែឧសភា ឆ្នាំ ២០១៨ ។
បើតាមលោក សាយ សុភ័ក្ក ជាអ្នកបើកបររថយន្តបានរៀបរាប់ថា មុនពេលកើតហេតុលោកបានចូលផឹកស៊ីជាមួយមិត្តភក្តិបន្តិចបន្តួចពិតមែន តែលោកអត់មានស្រវឹងនោះទេ រួចលោកបានធ្វើដំណើរដោយមានគ្នា៣នាក់ជិះក្នុងរថយន្តនោះ ចេញដំណើរពីខេត្តព្រះវិហារ ឆ្ពោះទៅខេត្តកំពង់ចាម ដោយបានបើកបររថយន្តប្រភេទតាកូម៉ាពណ៌ស ពាក់ស្លាកលេខ កំពង់ចាម 2A-6307 លុះមកដល់ចំណុចកើតហេតុ ស្រាប់តែបួងចង្កូតរថយន្តអត់មក បែរជាចង្កូតរថយន្តប្រទាញទៅខាងឆ្វេងដៃវិញ ហើយក៏បុកដើមអាកាស្យា ធ្លាក់ចូលទៅក្នុងទឹកប្រឡាយជម្រៅត្រឹមចង្កេះ ប្រឡាប់ផ្ងារពោះឡើងលើ ។
ពេលនោះលោកបានព្យាយាមលូនចេញពីក្នុងរថយន្តតាមកញ្ចក់មកខាងក្រៅ ហើយស្ទុះទៅជួយប្អូនថ្លៃយកចេញពីក្នុងរថយន្តដែលក្រឡាប់ចូលទឹកនោះ លុះពេលជួយយកចេញពីក្នុងរថយន្តដែលធ្លាក់ចូលទឹកបានមកហើយ ស្រាប់តែជនរងគ្រោះបានស្លាប់បាត់ទៅហើយដោយសារឈ្លក់ទឹក ។ ជនរងគ្រោះដែលស្លាប់ ឈ្មោះ ម៉ឹង ស៊ីវត្ថា អាយុជាង៣០ឆ្នាំ មុខរបរជាគ្រូបង្រៀនថ្នាក់ទី១២ នៅវិទ្យាល័យខេត្តព្រះវិហារ រស់នៅក្បែររង្វង់មូលចាស់ ស្ថិតក្នុងសង្កាត់ត្បែងមានជ័យ ក្រុងព្រះវិហារ ខេត្តព្រះវិហារ ។
ក្រោយពេលកើតហេតុ សមត្ថកិច្ចប៉ូលិសចរាចរណ៍នៃអធិការស្រុកកំពង់ស្វាយបាន ចុះមកពិនិត្យទីតាំងកើតហេតុ និងធ្វើការវាស់វែងរួច បានប្រគល់សពទៅឲ្យសាច់ញាតិដឹកយកទៅខេត្តព្រះវិហារទាំងយប់ដើម្បីធ្វើបុណ្យតាមប្រពៃណី ចំណែករថយន្តត្រូវបានស្ទូចយកទៅរក្សាទុកនៅអធិការដ្ឋានស្រុក ៕
ចែករំលែកព័តមាននេះ