ខេត្តមណ្ឌលគិរី ៖ ប្រជាសហគមន៍រស់នៅភូមិឈូល (ថងប៉ាង) ឃុំស្រែហ៊ុយ ស្រុកកោះញែក បាននាំគ្នាធ្វើពិធីបន់ស្រន់ដល់អ្នកតាព្រៃភ្នំ និងដាក់បណ្តាសាដល់ក្រុមអ្នកកាប់បំផ្លាញព្រៃឈើក្នុងដីត្រណមកប់សពរបស់បងប្អូនជនជាតិដើមភាគតិច កាលពីថ្ងៃទី៦ ឧសភា…
ខេត្តមណ្ឌលគិរី ៖ ប្រជាសហគមន៍រស់នៅភូមិឈូល (ថងប៉ាង) ឃុំស្រែហ៊ុយ ស្រុកកោះញែក បាននាំគ្នាធ្វើពិធីបន់ស្រន់ដល់អ្នកតាព្រៃភ្នំ និងដាក់បណ្តាសាដល់ក្រុមអ្នកកាប់បំផ្លាញព្រៃឈើក្នុងដីត្រណមកប់សពរបស់បងប្អូនជនជាតិដើមភាគតិច កាលពីថ្ងៃទី៦ ឧសភា ព្រោះថ្មីៗនេះមានសកម្មភាពចូលកាប់ឈើជាបន្តបន្ទាប់ក្នុងដែនជម្រកសត្វព្រៃស្រែពក បន្លំជាមួយឈើដែលគេដេញថ្លៃបានពីក្រសួងកសិកម្ម ។
លោក ឡា គីន រស់នៅឃុំស្រែហ៊ុយ បានឲ្យដឹងថា កាលពីថ្ងៃទី៣ ឧសភា លោក ភឿក មុន្នី បានសុំខ្ទីដីពីសហគមន៍ទំហំ២ហិកតា ក្នុងភូមិឈូល ជាប់ព្រៃកប់សព ដើម្បីធ្វើទីតាំងស្តុបឈើបណ្តោះអាសន្ន ដោយធ្វើកិច្ចសន្យា រយៈពេល២ឆ្នាំ ចាប់ពីថ្ងៃទី៣ ឧសភា ២០១៨ រហូតដល់ថ្ងៃទី៣ ឧសភា ២០២០ នឹងប្រគល់ឲ្យអ្នកភូមិវិញ ។
ប្រភពដដែលបន្តថា ចាប់ពីថ្ងៃទី៣ ឧសភា ក្រោយធ្វើកិច្ចសន្យាសុំខ្ទីដីរួច ស្រាប់តែមានមនុស្សរាប់សិបនាក់ រួមនឹងរថយន្តកែច្នៃ គោយន្តកន្ត្រៃ និងរណារយន្តរាប់សិបគ្រឿង បានចូលទៅកាប់ផ្តួលឈើក្នុងតំបន់ព្រៃសហគមន៍រើសយកដើមឈើធំៗដូចជា សុក្រំ ផ្ទឹក…ប្រមូលទៅទុកនៅចំណុចជិតដីកប់សព ។ សកម្មភាពក្រុមឈ្មួញឈើខាងលើត្រូវបានអ្នកភូមិអះអាងថា បានធ្វើឲ្យប៉ះពាល់ដល់ជំនឿរបស់អ្នកភូមិ ជាពិសេសគឺដីព្រៃត្រណមកប់សពដែលតម្រូវឲ្យពួកគាត់ត្រូវធ្វើពិធីសែនព្រេនដល់អារុក្ខអារក្សអ្នកតា កុំឲ្យខឹងដល់អ្នកភូមិដែលអនុញ្ញាតឲ្យមានមនុស្សចូលទៅតំបន់នោះ ។
សហមគន៍ភូមិឈូល បានស្នើដល់អាជ្ញាធរខេត្តជួយពិនិត្យលើករណីនេះផង ព្រោះនៅពេលដែលលោកភឿក មុន្នី សុំខ្ទីដីពីសហគមន៍បានធ្វើកិច្ចសន្យាត្រឹមធ្វើជាទីតាំងស្តុបឈើចាស់ដែលដឹកមកពីព្រំដែនប៉ុណ្ណោះ តែបែរជានាំគ្នាចូលកាប់ឈើថ្មី ក្នុងព្រៃសហគមន៍យ៉ាងគគ្រឹកគគ្រេងទៅវិញ។ ហើយថែមទាំងបម្រុងនឹងឈូសឆាយដីព្រៃដែលមានកប់សពតាំងពីដូនតាមក ដោយគេមិនទៅធ្វើនៅកន្លែងដែលមានដីស្រឡះ និងរាបស្មើទេ ។
ទាក់ទិនករណីនេះលោក ភឿក មុន្នី បានឲ្យដឹងថា លោកបានទទួលការអនុញ្ញាតពីខេត្ត ដើម្បីប្រមូលឈើដែលដេញថ្លៃបានពីតំបន់ព្រំដែន ប៉ុស្តិ៍អូររ៉ូ ចំនួន១.៨៧២ម៉ែត្រគូប យកទៅស្តុកទុកនៅលើទីតាំងដីសម្បទានសង្គមកិច្ចរបស់យោធា ។ លោកមុន្នី បានបញ្ជាក់យ៉ាងខ្លីថា លោកមិនបានឲ្យប្រជាជនណាម្នាក់ចូលទៅកាប់ឈើឲ្យលោកទេ ។
បើតាមក្រុមប្រជាពលរដ្ឋដែលបានចូលទៅកាប់ឈើនៅក្នុងព្រៃសហគមន៍ភូមិឈូលបាននិយាយថា ពួកគាត់ត្រូវបានមេការឈ្មោះ ថុល និងឈ្មោះ ចែ គា ជាអ្នកចេញមុខជួយសម្រួលលើការកាប់ឈើក្នុងតំបន់ ដើម្បីលក់ឲ្យក្រុមហ៊ុនរបស់ឈ្មោះ មុន្នី ក្នុងមួយម៉ែត្រគូបតម្លៃ៣៥០ ០០០រៀល ។ យោងតាមលិខិតរបស់ក្រសួងបរិស្ថាន លេខ៣៩៣ សជណ ប.ស្ថ ចុះថ្ងៃទី២៤ មេសា ២០១៨ បានឲ្យដឹងថា ការដឹកជញ្ជូនឈើដែលលោក ភឿក មុន្នី ដេញថ្លៃបានយកចេញពីតំបន់អូរ៉ូ ក្នុងដែនជម្រកសត្វព្រៃស្រែពក ត្រូវគោរពតាមគោលការណ៍៖
១-មិនអនុញ្ញាតឲ្យដឹកឈើកាត់តាមតំបន់ស្នូល នៃដែនជម្រកសត្វព្រៃស្រែពកនោះទេ ប៉ុន្តែការដឹកជញ្ជូនឈើត្រូវកាត់តាមផ្លូវប៉ុស្តិ៍អង្កេតការណ៍អូររ៉យ មកដល់ទន្លេស្រែពក ទល់មុខប៉ុស្តិ៍១៤ រួចដឹកជញ្ជូនតាមផ្លូវក្រោយ ឆ្លងកាត់ភូមិកោះម្យើលលើ ។
២-មិនអនុញ្ញាតឲ្យបង្កើតទីតាំងកែច្នៃឈើនៅក្នុង ឬក្បែរដែនជម្រកសត្វព្រៃស្រែពកទេ។
៣-មិនអនុញ្ញាតឲ្យប្រើប្រាស់រណារយន្តគ្រប់ប្រភេទ។ តែជាក់ស្តែងគេសង្កេតឃើញថា ក្រោយទទួលបានការយល់ព្រមពីសហគមន៍ឲ្យខ្ចីដីសម្រាប់ធ្វើឃ្លាំងស្តុបឈើ បែរជាឃើញមានរណារយន្ត និងរថយន្តកែច្នៃជាច្រើនគ្រឿងសម្រុកចូលទៅអារច្រៀកឈើក្នុងដែនជម្រកសត្វព្រៃស្រែពកយកទៅស្តុបនៅកន្លែងដែលលោកភឿក មុន្នី អះអាងថា ស្តុបឈើដែលដេញថ្លៃបាន ដែលករណីនេះផ្ទុយពីលិខិតរបស់ក្រសួងបរិស្ថានទៅវិញ ។
ក្រុមអ្នកតាមដានបរិស្ថានបាននិយាយថា ករណីខាងលើនេះមិនខុសពីកន្ទេលធំបន្លំដេកនោះទេ ខណៈការដេញថ្លៃឈើពីរដ្ឋសុទ្ធសឹងជាឈើចាស់ៗ បែក ប្រះ ស្រាំ ហើយឈ្មួញនៅតែហ៊ានដេញថ្លៃយកក្នុងតម្លៃខ្ពស់ ព្រោះតែគេមើលឃើញពីផលចំណេញលើច្បាប់ដែលដេញថ្លៃបាននោះ ។ ប្រភពដដែលបានបន្តថា អាចជារឿងសាមញ្ញទៅហើយ ដែលមានអ្នកដេញថ្លៃឈើចាស់ពីរដ្ឋ រួចលួចប្រមូលឈើថ្មីពីក្រៅបន្លំជាមួយឈើមានច្បាប់ ដើម្បីដឹកទៅលក់ក្រៅប្រទេស ហើយករណីបែបនេះបានកើតមានជារឿយៗនៅតំបន់ដែលសម្បូរព្រៃឈើ ខណៈមន្ត្រីជំនាញហាក់នៅមានកម្រិតលើការអនុវត្តច្បាប់ស្តីពីព្រៃឈើ ឬអាចហៅបានថា ជាប់ពាក់ព័ន្ធនឹងផលប្រយោជន៍ផ្ទាល់ខ្លួន ។
ទោះជាយ៉ាងណា ប្រជាពលរដ្ឋបានទទូចដល់អាជ្ញាធរជាពិសេសមន្ត្រីជំនាញ មេត្តាចុះបង្ក្រាបការកាប់បំផ្លាញព្រៃឈើក្នុងដែនជម្រកការពារសត្វព្រៃស្រែពកឱ្យទាន់ពេលវេលា បើមិនដូច្នោះទេប្រភេទឈើមានតម្លៃក្នុងតំបន់នេះ ប្រឈមទៅនឹងវិនាសកម្មជាក់ជាមិនខាន ៕
ចែករំលែកព័តមាននេះ