ខេត្តរតនគិរី ៖ គ្រោះថ្នាក់ចរាចរណ៍មួយបានកើតឡើងរវាងរថយន្ត និងម៉ូតូបើកបរបញ្ច្រាសទិសបុកគ្នាបណ្តាលឱ្យបុរសម្នាក់រងរបួសធ្ងន់រហូតស្លាប់ពេលបញ្ជូនដល់មន្ទីរពេទ្យបង្អែកខេត្ត ។ ហេតុការណ៍ខាងលើនេះបានកើតឡើងកាលពីវេលាម៉ោង៦និង៣៥យប់ថ្ងៃទី៧ ខែឧសភា ឆ្នាំ២០១៨ លើកំណាត់ផ្លូវជាតិលេខ៧៨ ចំណុចអូរត្រាវ ស្ថិតក្នុងភូមិភ្នំ សង្កាត់យក្ខឡោម ក្រុងបានលុង ខេត្តរតនគិរី ។
តាមប្រភពពីសមត្ថកិច្ចបានឱ្យដឹងថា មានករណីគ្រោះថ្នាក់ចរាចរណ៍មួយរវាងម៉ូតូវេវ ពណ៌ស គ្មានផ្លាកលេខមួយគ្រឿងត្រូវរថយន្តបង្កម៉ាកហ៊ីយ៉ាន់ដាយ ពណ៌ស ពាក់ផ្លាកលេខ កំពង់ចាម ៣A-៣១៧៦ បានបុកពេញទំហឹងបណ្តាលឱ្យអ្នកបើកបរម៉ូតូរងរបួសធ្ងន់ ហើយត្រូវបានស្លាប់ពេលបញ្ជូលដល់មន្ទីរពេទ្យ រីឯអ្នកបើកបររថយន្តមិនត្រូវបានស្គាល់អត្តសញ្ញាណនោះទេព្រោះរត់គេចខ្លួនបាត់ពេលកើតហេតុភ្លាមៗ ។
ក្រោយកើតហេតុរថយន្ត និងម៉ូតូត្រូវបានជំនាញការិយាល័យចរាចរណ៍ខេត្តយកទៅរក្សាទុកធ្វើកំណត់ហេតុរងចាំដោះស្រាយតាមក្រោយ។ ចំណែកសពត្រូវបានរក្សាទុកនៅមន្ទីរពេទ្យបង្អែកខេត្តរង់ចាំគ្រួសារឬសាច់ញាតិយកទៅធ្វើបុណ្យតាមប្រពៃណីផងដែរ ៕
ចែករំលែកព័តមាននេះ