រាជធានីភ្នំពេញ ៖ ធៀបនឹងអតីតកាល គេកត់សម្គាល់ថា វិស័យកីឡាប្រដាល់នាពេល បច្ចុប្បន្នកាន់តែមានការរីកចម្រើន ដោយសារបណ្ដាសង្វៀនធំៗរួមមានទូរទស្សន៍ប៉ុស្ដិ៍លេខ៥ ទូរទស្សន៍អាស៊ីអាគ្នេយ៍ CNC បាយ័ន…
រាជធានីភ្នំពេញ ៖ ធៀបនឹងអតីតកាល គេកត់សម្គាល់ថា វិស័យកីឡាប្រដាល់នាពេល
បច្ចុប្បន្នកាន់តែមានការរីកចម្រើន ដោយសារបណ្ដាសង្វៀនធំៗរួមមានទូរទស្សន៍ប៉ុស្ដិ៍លេខ៥ ទូរទស្សន៍អាស៊ីអាគ្នេយ៍ CNC បាយ័ន និង PNN ជាដើមសុទ្ធតែមានការរៀបចំប្រដាល់អន្តរជាតិដែលនាំឱ្យតម្លៃខ្លួនរបស់កីឡាករមានកម្រិតខ្ពស់ខុសពីគូក្នុងស្រុក ។
កីឡាករល្បីៗដែលគេចាត់ទុកស្ថិតក្នុងកម្រិត A រួមមានកីឡាករ ឡុង សុភី កីឡាករ ផាន់ គ្រាន់ កីឡាករ រឿង សោភ័ណ្ឌ និងកីឡាករល្បីឈ្មោះចាស់ក្មេងជាច្រើនទៀត សុទ្ធតែអាចរកចំណូលបានរហូតដល់ខ្ទង់ពាន់ដុល្លារក្នុងមួយខែ ដោយមិនទាន់រាប់បញ្ចូលការងារខាងក្រៅការប្រដាល់រួមមានការបង្វឹកសិស្ស និងការងារបន្ទាប់បន្សំនោះផង។
+ ឡុង សុភី ៖ កីឡាកររូបនេះល្បីឈ្មោះជាយូរមកហើយបានអះអាងថា តម្លៃខ្លួនឡើងប្រដាល់អន្តរជាតិរបស់លោកមានចំនួនមិនដូចគ្នាទេ គឺអាស្រ័យលើសង្វៀននីមួយៗដែលបានអញ្ជើញលោក ប៉ុន្តែមិនក្រោម៥០០ដុល្លារនោះទេ ដោយនៅសង្វៀនខ្វះក៏ឈានដល់ក្បែរ១ពាន់ដុល្លារសម្រាប់ការប្រកួតមានលក្ខណៈពិសេសដែលតម្រូវឱ្យលោកប៉ះប្រកួតជាមួយកីឡាករបរទេសជាម្ចាស់ខ្សែក្រវាត់ជាដើម។
លោកថា ក្នុង១ខែការពិតគេតម្រូវឱ្យឡើងប្រកួតតែ១លើក ឬ២លើកប៉ុណ្ណោះ ប៉ុន្តែដោយសារតែតម្រូវការលោកអាចទទទួលប្រកួតរហូតដល់៣ទៅ៤លើក ខណៈដែលការប្រកួតនីមួយៗក៏មានការផ្ដល់ប្រាក់ធីបលើកទឹកចិត្តពីអ្នកទស្សនាច្រើនគួរសម ។
លោកសារភាពថា អាចរកចំណូលបានដល់រង្វង់១ពាន់ដុល្លារយ៉ាងតិចក្នុងមួយខែពីការឡើងរេញ ប៉ុន្តែសម្រាប់រូបលោកផ្ទាល់បើការប្រកួតទទួលបានប្រាក់កម្រៃច្រើនជាងនេះ គឺលោកទទួលប្រកួតតែ១លើកប៉ុណ្ណោះក្នុង១ខែ ឬអាច២លើកក្នុង១ខែដើម្បីរក្សាកម្លាំងទុកហ្វឹកហាត់បានជាប់លាប់ផង។
លោកថា ការប្រដាល់រាល់សប្ដាហ៍ ឬកន្លះខែឡើងរេញម្ដង មិនមែនជារឿងល្អនោះទេ ដោយសារទី១ត្រូវបង្ខំចិត្តប្រដាល់លាក់ដៃដើម្បីទុកកម្លាំងឡើងរេញនៅសប្ដាហ៍ក្រោយ និងទី២របួសចាស់មិនទាន់បាត់ឈឺផង ឡើងរេញសាជាថ្មី ។ លោកអះអាងថា ការឡើងសង្វៀនញឹកញាប់ពេកគឺជារឿងអាក្រក់មួយរបស់កីឡាករប្រដាល់ ប៉ុន្តែបណ្ដាលមកពីជម្រើសត្រូវការលុយទើបធ្វើឱ្យកីឡាករច្រើននាក់បូករួមទាំងលោកផងទទួលប្រកួតសឹងរាល់អាទិត្យក៏មាន ដើម្បីទទួលបានប្រាក់ចំណូលច្រើន ។ លោកថា ការប្រដាល់រាល់ថ្ងៃបានក្លាយជាទម្លាប់ទៅហើយ ដោយមិនខ្វល់រឿងប្រកួតមិនកើត ឬប្រកួតមិនល្អមើលនោះទេ។
យ៉ាងណាក៏ដោយលោកថា ការប្រកួតញឹកពេក ដ្បិតថាទទួលបានលុយច្រើនប៉ុន្តែលុយទាំងនោះក៏ចំណាយមើលខ្លួនច្រើនដែរ ជាពិសេសនៅពេលរបួសចាស់មិនទាន់បាត់ឈឺផង ក៏ចេញរបួសថ្មីមកធ្វើទុក្ខ ។ លោកថា បើកីឡាករម្នាក់ឡើងប្រកួត៤សប្ដាហ៍ជាប់គ្នា ក៏ក្នុងខែក្រោយមិនអាចឡើងប្រកួតជាប់ៗគ្នាបែបនេះបានដែរ ទើបលោកបញ្ជាក់ថា បើគិតតែ២ដង ឬ១ដងក្នុង១ខែក៏អាចទទួលបានក្នុងរង្វង់១ពាន់ ឬជាង១ពាន់ដុល្លារពីការឡើងរេញនេះដែរ។
+ ផាន់ គ្រាន់ ៖ កីឡាកររូបនេះក៏អះអាងថា អាចរកចំណូលបានក្នុង១ខែក្បែរៗ១ពាន់ដុល្លារសម្រាប់ការឡើងប្រដាល់១លើក និងបានច្រើនជាងនេះបើទទួលឡើងរេញច្រើនជាង១លើកផងដែរ ប៉ុន្តែលោកថា លុយដែលទទួលបានមិនសុទ្ធតែធ្លាក់ដល់ដៃនោះទេ ដោយត្រូវចែកចាយអ្នកផ្គូផ្គង អ្នកឱ្យទឹក គ្រូបង្វឹក និងផ្នែកជាច្រើនទៀតដើម្បីឱ្យខ្លួនទទួលបានការផ្គូផ្គងជាប្រចាំរៀងរាល់ខែ ។
លោកថា នៅក្នុងពិភពប្រដាល់ ទាំងគ្រូបង្វឹក ទាំងអ្នកឱ្យទឹក មិនទទួលបានប្រាក់កម្រៃ ឬប្រាក់ខែពីភាគីខាងណានោះទេ ដូច្នោះបើមិនគិតគូរអ្នកទាំងនោះ អាជីពប្រដាល់របស់កីឡាករល្បីម្នាក់ក៏ឈរជើងមិនបាននោះដែរ ជាពិសេសសម្រាប់អ្នកចង់ឡើងរេញឱ្យបានញឹក ហើយទទួលបានកម្រៃខ្លួនខ្ពស់ ។ លោកថា ក្នុង១ខែលោកទទួលឡើងរេញរង្វង់២ដង ហើយបើទោះជាក្នុងខែខ្លះទទួលឡើងរេញលើសនេះ ក៏មិនញឹកញាប់ដែរ ដោយសារតែឡើងរេញរៀងរាល់សប្ដាហ៍ពេកក៏មិនអាចឱ្យលោកទ្រទ្រង់កម្លាំងបានដែរ។
+ ឡៅ ចន្ទ្រា ៖ លោកអះអាងថា ប្រាក់ចំណូលរបស់លោកក៏ច្រើនជាង១ពាន់ដុល្លារក្នុង១ខែដែរ ដោយសារតែលោកបានកុងត្រាផ្ដាច់មុខជាមួយទូរទស្សន៍បាយ័ន ដោយក្រៅពីមានលក្ខខណ្ឌ១ខែយ៉ាងហោចប្រកួតម្ដង ក៏ទទួលបានប្រាក់កម្រៃជាប្រចាំ ។
លោកថាតម្លៃឡើងប្រកួតរបស់លោកប្រមាណជា៦០០ដុល្លារក្នុង១លើក និងអាចលើសនេះអាស្រ័យលើទម្រង់នៃការប្រកួតអន្តរជាតិ ហើយប្រាក់ខែប្រចាំប៉ុស្ដិ៍របស់លោកក៏មានតម្លៃស្មើនឹងគូឯកក្នុងស្រុកឡើងរេញម្ដងដែរ ។ លោកថា ការប្រដាល់នៅក្នុងពេលនេះ កាន់តែប្រសើរជាងមុន ប៉ុន្តែលោកក៏បារម្ភផងដែរជុំវិញកម្លាំងខ្លួនឯងធ្លាក់ចុះហើយបន្តការប្រកួតលែងកើត។
លោក ញាណ សុធី អ្នករៀបចំការប្រកួតអន្តរជាតិ និងការប្រកួតធំៗប្រចាំទូរទស្សន៍អាស៊ីអាគ្នេយ៍ បានអះអាងថា សម្រាប់កីឡាករល្បីៗកម្រិត A ដែលអ្នកស្នេហាប្រដាល់ស្គាល់ឈ្មោះភាគច្រើន តម្លៃឡើងរេញរបស់កីឡាករទាំងនោះមិនក្រោម១លើក៦០០ដុល្លារនោះទេ ដោយសារតែភាពជាក់ស្ដែងគឺកីឡាករម្នាក់ៗសួរនាំតម្លៃខ្លួនគ្នាទៅវិញទៅមក ហើយទាមទារមិនខុសគ្នា ។
អ៊ីចឹងហើយទើបក្នុងការប្រកួតរបស់កីឡាករល្បីៗទាំងនោះ គឺអាចនិយាយបានប្រកួតតែ២ដងក៏បានមិនក្រោម១ពាន់ដុល្លារនោះដែរ បើទោះជាត្រូវទូទាត់លាត់សើយឱ្យគ្រូបង្វឹក និងអ្នកឱ្យទឹកក្ដី ។ លោកថា កីឡាករខ្លះត្រូវចុះពីរេញរបស់លោកថ្ងៃសៅរ៍ឡើងទៅប្រកួតលើរេញដទៃទៀតនៅថ្ងៃអាទិត្យក៏មានដែរ ដោយសារតែកីឡាករទាំងនោះចង់បានលុយ ហើយលាក់អ្នកផ្គូផ្គងប្រចាំប៉ុស្ដិ៍នីមួយៗថាមិនជាប់ ឬដោយសារតែខាងស្ពុនស័រចង់បានកីឡាករហ្នឹងតែម្ដង បើទោះជាដឹងថាជាប់វ៉ៃប៉ុស្ដិ៍ផ្សេងក្នុងសប្ដាហ៍មុន ឬក្នុងសប្ដាហ៍តែមួយ។ ម្យ៉ាងមកពីកីឡាករមួយចំនួនមានប្រជាប្រិយមិនអាចខ្វះបានសម្រាប់សង្វៀននីមួយៗផង ទើបក្នុងការប្រដាល់រាល់ថ្ងៃ ឃើញតែកីឡាករល្បីប៉ុន្មានរូបវិលចុះវិលឡើង៕
ចែករំលែកព័តមាននេះ