សាខាកាកបាទក្រហមកម្ពុជា ចែកអំណោយពលរដ្ឋរងគ្រោះរលំផ្ទះ៩ខ្នង

ថ្ងៃទី ០៨ ខែ ឧសភា ឆ្នាំ ២០១៨

ម៉ោង ២១:១៥

ខេត្តស្វាយរៀង ៖ នៅថ្ងៃអង្គារ ៩រោច ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៨ ខែឧសភា ឆ្នាំ២០១៨ ក្រុមការងារសាខា កាកបាទក្រហមកម្ពុជាខេត្តស្វាយរៀងដឹកនាំដោយ លោកជំទាវ ពៅ សុភាព ហិរញ្ញឹក គណៈកម្មាធិការសាខា នាំយកអំណោយមនុស្សធម៌របស់សាខា កាកក្របាទក្រហម ទៅចែកជូនគ្រួសារ ដែលរងគ្រោះដោយសារខ្យល់កន្ត្រាក់ កាលពីថ្ងៃទី៧ ខែឧសភា ឆ្នាំ២០១៨ បណ្តាលឲ្យរលំផ្ទះ ខូចខាតទាំងស្រុង៦ខ្នង នៅឃុំថ្មី ស្រុកកំពង់រោទិ៍ នៅស្រុករមាសហែក ប៉ះពាល់៣ឃុំ គឺឃុំត្រពាំងស្តៅ រលំទាំងស្រុង១ខ្នង ឃុំជ្រៃធំ រលំទាំងស្រុង១ខ្នង នៅឃុំម្រាម ខូចខាតតិចតួច១ខ្នង សរុប៩ខ្នង។

ក្នុងឱកាសនោះលោកជំទាវ ពៅ សុភាព ហិរញ្ញឹកគណៈកម្មាធិការសាខា តំណាងឯកឧត្តម ម៉ែន វិបុល ប្រធានគណៈកម្មាធិការសាខា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយចំពោះ ឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់បងប្អូន ដែលបង្កដោយគ្រោះធម្មជាតិ នាពេលនេះ។ អំណោយដែលបានចែកជូនដល់គ្រួសាររងគ្រោះទាំងស្រុង៨គ្រួសារ ក្នុងមួយគ្រួសារទទួលបានអង្ករ៣០គក្រ កៅស៊ូតង់១ ធុងទឹកជ័រ១ ឆ្នាំងបាយសម្ល២ កន្ទេលបត់១ មី១ កេស ទឹកស៊ីអ៊ីវ១យួរ ត្រីខ១០កំប៉ុង ឃីត១កញ្ចប់មានមុង១ ផួយ១ មុង១ ក្រម៉ា១ សារុង១ និងថវិកា ២០០,០០០ រៀល។

ដោយឡែកគ្រួសាររងគ្រោះស្រាល១គ្រួសារ សាខាឧបត្ថម្ភថវិកា១០០,០០០រៀល សម្រាប់ទិញសង្ក័សីសម្រាប់ជួសជុលផ្ទះឡើងវិញ។ សូមបញ្ជាក់ដែរថា នៅក្នុងចុងខែមេសា និងដើមខែឧសភា ២០១៨នេះ ខេត្តស្វាយរៀងមានភ្លៀងធ្លាក់លាយឡំខ្យល់កន្ត្រាក់រលំផ្ទះ និងរបើកដំបូលអស់រាប់រយខ្នងផ្ទះ ហើយរហូតមកដល់ថ្ងៃទី៨ ឧសភានេះ ភ្លៀងនៅតែបង្អុររាល់ល្ងាចតែម្តង៕