ខេត្តស្ទឹងត្រែង ៖ វារឿងមួយដែលហួសចិត្តដោយសារបុរសម្នាក់បានលែងលះជាមួយអតីតប្រពន្ធ ជាង២ឆ្នាំទៅហើយ បានមកបង្កហេតុរហូតរងការចោទប្រកាន់ពីបទចោរកម្មប្រព្រឹត្តនៅភូមិ អូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង។ ជនសង្ស័យរូបនោះត្រូវ…
ខេត្តស្ទឹងត្រែង ៖ វារឿងមួយដែលហួសចិត្តដោយសារបុរសម្នាក់បានលែងលះជាមួយអតីតប្រពន្ធ ជាង២ឆ្នាំទៅហើយ បានមកបង្កហេតុរហូតរងការចោទប្រកាន់ពីបទចោរកម្មប្រព្រឹត្តនៅភូមិ អូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង។ ជនសង្ស័យរូបនោះត្រូវ បានកម្លាំងនគរបាលចាប់ខ្លួននៅស្រុកសៀមបូកកាលពីរសៀលថ្ងៃទី៧ ខែឧសភា ឆ្នាំ២០១៨ ក្រោយអតីតស្ត្រីជាប្រពន្ធដាក់ពាក្យប្តឹងទៅនគរបាលបន្ទាប់ពីជនសង្ស័យរូបនោះលួចគាស់ទ្វារផ្ទះអតីតស្ត្រីជាប្រពន្ធយកម៉ូតូមួយគ្រឿង និងបាត់លុយអស់៥០០ដុល្លារទៀត កាលពីថ្ងៃទី៦ ខែឧសភា ឆ្នាំ២០១៨។ យោងតាមប្រភព័ត៌មានពីមន្ត្រីនគរបាលព្រហ្មទណ្ឌកម្រិតធ្ងន់ ស្នងការដ្ឋាននគរបាល ខេត្តស្ទឹងត្រែង បានឲ្យដឹងថា មុនឈានដល់ការឃាត់ខ្លួនបុរសសង្ស័យ ត្រូវនារីអតីតជាប្រពន្ធបានដាក់ ពាក្យបណ្តឹងប្តឹងទៅលើអតីតបុគ្គលជាប្តីថាក្រោយលែងលះគ្នាជាង២ឆ្នាំតុលាការចេញសាលក្រមដោយបានបែងចែកទ្រព្យសម្បត្តិរួម រួចទៅហើយ បែជា២ឆ្នាំក្រោយមកទាមទារម៉ូតូមួយគ្រឿងទៀត។ ប្រភពដដែលបន្តថា នៅថ្ងៃទី៦ ខែឧសភា ឆ្នាំ២០១៨ អតីតបុគ្គលជាប្តីបានទៅជួបអតីតស្ត្រីជាប្រពន្ធ នៅមន្ទីរពេទ្យយោធភូមិភាគ២១ ក្រុងស្ទឹងត្រែង ដោយបានទាមទារសោផ្ទះអតីតស្រី្តជាប្រពន្ធ ដើម្បីទៅចាក់យកម៉ូតូ តែអតីតស្ត្រីជាប្រពន្ធមិនព្រមឲ្យដោយសារម៉ូតូនោះត្រូវបានតុលការ សម្រេចសាលក្រមបែងចែងក្នុងទ្រព្យសម្បត្តិរួមទៅហើយ ចុះហេតុអីត្រូវមកទាមទារទៀត។
ដោយការប្រកែករបស់អតីតស្រី្តជាប្រពន្ធជនសង្ស័យក៏បាននិយាយថា បើមិនឲ្យសោអញទេ អញទៅគាស់ទ្វារយកដោយខ្លួនឯង។ លុះក្រោយមកជនសង្ស័យចិត្តសឿងទៅគាស់ទ្វារយកម៉ូតូ ម៉ាកវ៉េវអាលហ្វា អត់ពន្ធនោះយកទៅបាត់មែន និងគាស់ទូរបាត់លុយអស់រលីងទៀត។ ទើបមានការប្តឹងផ្តល់តាមចាប់ខ្លួនជនសង្ស័យខាងលើមកសាកសួរនៅស្នងការដ្ឋាននគរបាលខេត្តស្ទឹងត្រែង និងតាមរកម៉ូតូនោះត្រឡប់មកវិញ។ មន្ត្រីដដែលបន្តថា ក្រោយការចាប់ខ្លួនជនសង្ស័យមក ស្នងការដ្ឋាននគរបាលខេត្តជនសង្ស័យប្រើល្បិចនិយាយភូតភរកុហកដោយម្តងថា ម៉ូតូនោះលាក់ទុកនៅខេត្តក្រចេះ ម្តងលាក់ទុកនៅស្រុកសៀមបូក ដោយពង្វាងដានទីតាំងលាក់ម៉ូតូ រហូតអស់ជម្រើសទើបជននោះប្រាប់តាមត្រង់ គឺបានយកទៅផ្ញើនៅផ្ទះអ្នកស្គាល់គ្នាស្ថិតនៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង។ លោក ដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់ឲ្យដឹងថា ជនសង្ស័យឈ្មោះ ទីន អាម៉ីន ហៅឈុន ឆានុន ភេទប្រុស អាយុ៣៦ឆ្នាំ ជនជាតិខ្មែរឥស្លាម ជាអតីតប្តីស្ត្រីរងគ្រោះឈ្មោះ នូ ទីនម៉ៃសុះ អាយុ៣៥ឆ្នាំ ជនជាតិខ្មែរឥស្លាម រស់នៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង។
នៅថ្ងៃទី៧ ខែឧសភា ឆ្នាំ២០១៨ ស្ត្រីរងគ្រោះបានដាក់ពាក្យប្តឹង ជនសង្ស័យអតីតជាប្តីថា បានគំរាមកំហែង និងគាស់ទ្វារផ្ទះលួចម៉ូតូមួយគ្រឿង និងបាត់លុយ ចំនួន៥០០ដុល្លារបន្ថែមទៀត និងទាមទារសុំឲ្យសមត្ថកិច្ចចាប់ខ្លួន និងរកវត្ថុតាងមកវិញ។ ជនសង្ស័យមិនព្រមទទួលស្គាល់នូវកំហុសរបស់ខ្លួនក្រោយធ្វើសកម្មភាពគាស់ទ្វារផ្ទះអតីតស្ត្រីជាប្រពន្ធនោះឡើយ ហើយចោទថា អតីតស្ត្រីជាប្រពន្ធជាអ្នកលួចម៉ូតូរបស់ខ្លួនទៅវិញ។ នៅចំពោះមុខសមត្ថកិច្ចនគរបាលព្រហ្មទណ្ឌកម្រិតធ្ងន់ និងនាយប៉ុស្តិ៍រដ្ឋបាលឃុំអូរឫស្សីកណ្តាល និងមន្ត្រីនគរបាលជាច្រើនរូបទៀតជនសង្ស័យនិយាយរៀបរាប់ថា នៅពេលដែលខ្លួនមិនទាន់ រៀបការយកគ្នាជាប្តីប្រពន្ធ រូបគេមានម៉ូតូមួយគ្រឿងតម្លៃ៦០ម៉ឺនរៀល លុះក្រោយរៀបការក៏បានលក់ ម៉ូតូចាស់ ទិញម៉ូតូថ្មីតម្លៃជាង៣០០ដុល្លារអាមេរិក បន្ទាប់រួមរស់ច្រើនឆ្នាំបានកូនមួយ បែរជាមិនចុះសម្រុងនឹងគ្នាក៏ទៅលែងលះគ្នានៅតុលាការ តែខ្លួនមិនបានដាក់ម៉ូតូនោះទៅក្នុងបញ្ជី ទ្រព្យសម្បតិ្តទេ។ ដូច្នេះម៉ូតូម៉ាកវ៉េវនេះ បើគិតទល់បច្ចុប្បន្នលក់ប្រហែលបាន៦០ម៉ឺនរៀល ស្មើចំនួនលុយដែលខ្លួនមុនយកគ្នាជាប្តីប្រពន្ធ ដូច្នេះខ្លួនត្រូវតែយកទៅវិញ។ ជនសង្ស័យរូបនោះបន្តថា មុនពេលដែលខ្លួនបានខ្លួនបានទៅដាក់ពាក្យបណ្តឹងនៅនគរបាលប៉ុស្តិ៍រដ្ឋបាលឃុំអូរឫស្សីកណ្តាលដោយចោទថា ស្ត្រីអតីតប្រពន្ធលួចម៉ូតូរបស់ខ្លួន តែខណៈប្រទះឃើញម៉ូតូនោះ ខ្លួនទៅទាមទារ តែនាងមិនឲ្យទើបគាស់ទ្វារយកតែម្តង។
យោងតាមបណ្តឹងអតីតស្ត្រីជាប្រពន្ធជនសង្ស័យបានប្តឹង ទៅនគរបាលថា កាលពីថ្ងៃទី៦ ខែឧសភា ឆ្នាំ២០១៨ ជនសង្ស័យអតីតជាប្តីបានទៅរករឿងនាង នៅមន្ទីរពេទ្យយោធភូមិភាគ២១ ក្រុងស្ទឹងត្រែង ដោយបានគំរាមទារសោផ្ទះរបស់នាងចាក់ចូលយកម៉ូតូ តែនាងប្រកែកមិនព្រមឲ្យដោយសារម៉ូតូនោះត្រូវតុលាការសម្រេចសាលក្រមបែងចែងទ្រព្យសម្បត្តិ គ្រាលែងលះនោះរៀងខ្លួនទៅហើយ។ ហេតុត្រូវមកទាមទារទៀត តែជនសង្ស័យគំរាមថា បើមិនឲ្យគេនឹងទៅគាស់ផ្ទះយកដោយខ្លួនឯង លុះក្រោយមកនាងទៅដល់ផ្ទះអ្នកជិតខាងថា អតីតប្តីរបស់នាងមកគាស់ទ្វារយកម៉ូតូទៅបាត់ហើយ។ យោងបណ្តឹងខាងលើនាងបន្តថា ក្រៅពីបាត់ម៉ូតូនោះទូរក៏ត្រូវគេគាស់របើក និងបាត់លុយអស់៥០០ដុល្លារអាមេរិកទៀត ដែលជាប្រាក់សន្សំរបស់ខ្លួនជាមួយនឹងប្តីក្រោយ។ លោក ស៊ុក ប៊ុនណា នាយប៉ុស្តិ៍រដ្ឋបាល ឃុំអូរឫស្សីកណ្តាលលោកថា ជនសង្ស័យពិតជាបានដាក់ពាក្យប្តឹងមែន។ លោកបានបញ្ជាក់សាវតា នោះថា កាលពីមិនទាន់យកគ្នា ជនសង្ស័យមានម៉ូតូចាស់មួយគ្រឿងតម្លៃ៦០ម៉ឺនរៀល ចំណែកនាងជាប្រពន្ធ មានដីមួយប្លង់ក្រោយយកគ្នាជាប្តីប្រពន្ធ និងមានកូនមួយក៏បានលែងលះ គ្នានៅតុលាការ ហើយតុលាការក៏បានសម្រេចប្រគល់ទៅឲ្យនារីអតីតជាប្រពន្ធ រីឯជនសង្ស័យបាន ទាមទារលុយពីនាងចំនួន៣០០០ដុល្លារ។
លោកបន្តថា ពេលនោះមិនទាន់មានការឯកភាពគ្នាផង ពេលមកដល់ផ្ទះជនសង្ស័យរករឿងដោយទាមទារឡើងថ្លៃទារ៤៥០០ដុល្លារ លុះក្រោយមកលុះមក ត្រឹម៤.០០០ដុល្លារវិញ នាងអតីតជាប្រពន្ធ មិនចង់ឲ្យមានបញ្ហាវែងឆ្ងាយក៏ទៅលក់ដីនៅស្រុកកំណើត យកលុយមកឲ្យ តែក្រោយពីបានលុយអស់ហើយ ជនសង្ស័យនៅតែបន្តរុកគួនទៅតាមយកម៉ូតូនោះ ទៀត រហូតនាងសម្រេចយកម៉ូតូដែលតុលាការបែងចែកឲ្យនោះទៅលាក់ទុក ស្រាប់តែជនសង្ស័យមក ដាក់ពាក្យប្តឹងថា ប្រពន្ធលួចម៉ូតូ។ លោកបញ្ជាក់បន្តថា ក្រោយបាត់ជាង២ឆ្នាំមក ទើបលេចមុខមក បែរទៅគាស់ទ្វារលួចម៉ូតូនោះមកទៀត។ លោកបានន្ថែមថា ជនសង្ស័យខាងលើជាមនុស្សមាន សណ្ដានអាក្រក់ មុនពេលមកយកគេរួមរស់ជាប្រពន្ធប្តី មានម៉ូតូកញ្ចាស់មួយគ្រឿងតម្លៃត្រឹម៦០ម៉ឺនរៀល ប៉ុណ្ណោះ។ តែខាងស្រីគេមានដល់ទៅដីចម្ការ ក្រោយលែងលះគ្នាទាមទារលុយរាប់ពាន់ដុល្លារ ហើយកាលលែងលះគ្នានាងជាអតីតប្រពន្ធងើបពីព្រឹកម៉ោង៥ទៀបភ្លឺ ទៅចៀរជ័រ ជនសង្ស័យនេះទៅស្ទាក់ស្កាត់ផ្លូវចាប់នាងរំលោភនៅព្រៃចម្ការកៅស៊ូទៀត រហូតជាប់គុកនៅឯស្រុកកំណើតខាងស្រី ក្រោយចេញពីគុកវិញបាត់ខ្លួនមួយរយៈ ទើបមកដល់ទៅរករឿងគេ ហើយគាស់ទ្វារផ្ទះគេយកម៉ូតូ និងបាត់លុយគេ៥០០ដុល្លារទៀត។ បច្ចុប្បជនសង្ស័យកំពុងស្ថិតនៅស្នងការដ្ឋាននគរបាលខេត្តស្ទឹងត្រែង ក្រោមការសាកសួរពីមន្ត្រីនគរបាលព្រហ្មទណ្ឌកម្រិតធ្ងន់ស្នងការដ្ឋាននគរបាលខេត្ត នឹងត្រូវបញ្ជូនទៅសាលាដំបូងក្រោយបញ្ចប់នីតិវិធី៕
https://youtu.be/Y2Ld73sZGGs
ចែករំលែកព័តមាននេះ