រាជធានីភ្នំពេញ ៖ តុលាការកំពូលនៅព្រឹកថ្ងៃទី០៩ ឧសភា ឆ្នាំ២០១៨ ស្អែកនេះគ្រោង និងលើកយកសំណុំរឿងបណ្តឹងសាទុក្ខរបស់លោក សម រង្ស៊ី មកធ្វើការជំនុំជម្រះលើអង្គសេចក្តីពាក់ព័ន្ធ និងបទបទល្មើសចំនួនបី ។
យោងតាមកម្មវិធីជំនុំជម្រះដែលបិទផ្សាយបានបង្ហាញថា តុលាការកំពូល និងជំនុំជម្រះសំណុំរឿងលោក សម រង្ស៊ី ពីបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តទៅកាលពីថ្ងៃទី១២ ១៣ ខែសីហា ឆ្នាំ២០១៥ បទបញ្ញាត្តិដែលមានចែងតាមមាត្រា២៩ , ៦២៩, ៦៣០ និងមាត្រា៤៥៩ នៃក្រមព្រហ្មទណ្ឌ ។
លោក សំ សុគង់ មេធាវីការពារក្តីឲ្យលោក សម រង្ស៊ីបានថ្លែងប្រាប់អ្នកសារព័ត៌មានតាមទូរស័ព្ទឲ្យដឹងថា លោក និងចូលការពារជូនកូនក្តី ខណៈលោកបានទទួលលិខិតអញ្ចើញពីមន្ត្រីតុលាការកំពូលឲ្យចូលរួមនៅព្រឹកស្អែក នៅសាលសវនាការទី៣ តាមពេលវេលាកំណត់ ។
សូមជម្រាបថា កាលពីព្រឹកថ្ងៃទី២៧ ខែធ្នូ ឆ្នាំ២០១៦ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក លាង សំណាត់ បានប្រកាសសាលក្រមថា ផ្ដន្ទាទោស លោក សម រង្ស៊ី ដាក់ពន្ធនាគារកំណត រយៈពេល៥ឆ្នាំ ជុំវិញបទចោទខាងលើ ។
គួរបញ្ជាក់ថា លោកសម រង្ស៊ីត្រូវបានចោទប្រកាន់ និងផ្តន្ទាទោសកំបាំងមុខបន្ទាប់ពីលោកហុង សុខហ៊ួបានប្រើប្រាស់ហ្វេសប៊ុកលោកសម រង្ស៊ីបង្ហោះឯងសារផែនទីកម្ពុជា-វៀតណាមក្លែងក្លាយ ៕
ចែករំលែកព័តមាននេះ