រាជធានីភ្នំពេញ ៖ ជារឿងមួយដែលចាប់អារម្មណ៍ផងដែរពីសមហាជនសម្រាប់ការដោះលែងឲ្យមានសេរីភាពបណ្តោះអាសន្នចំពោះលោក ញឹក ប៊ុនឆៃ អតីតប្រធានគណបក្សខ្មែររួបរួមជាតិនៅមុនពេលបោះឆ្នោតឆ្នាំ២០១៨ ខាងមុខនេះពីអំណាចតុលាការ ។ ប៉ុន្តែការដោះលែងនេះ ត្រូវគណបក្សនយោបាយមួយចំនួនបានសម្តែងមិតិផ្សេងគ្នាទៅវិញ ដោយបក្សខ្លះមានជាប់ពាក់ព័ន្ធ និងរឿងនយោបាយ បក្សខ្លះមានជាប់ពាក់ព័ន្ធនឹងរឿងបុគ្គល ។
យ៉ាងណាក្តីសម្រាប់ការដោះលែងលោកញឹក ប៊ុនឆៃនេះត្រូវបានលោកពេជ្រ ស្រស់ប្រធានគណបក្សយុវជនកម្ពុជាបានអះអាងមកស្ថានការណ៍នយោបាយ និងរឿងបុគ្គលទើបតុលាការដោះលែងឲ្យមានស៊េរីភាពបណ្តោះអាសន្ន ។
លោកពេជ្រ ស្រស់បានផ្តល់បទសម្ភាសន៍ជាមួយកោះសន្តិភាពនៅថ្ងៃទី០៨ ខែឧសភាឲ្យដឹងថា ការលើកលែងទោសនេះជាអំណាចតុលាការ ហើយគាត់(ញឹកប៊ុនឆៃ) មកធ្វើនយោបាយគ្មានអ្វីចម្លែកនោះទេ ។ ប៉ុន្តែបើពិនិត្យផ្លូវច្បាប់ចូលរួមនយោបាយរបស់លោកញឹក ប៊ុនឆៃជាថ្មីនេះមិនទាន់ត្រឹមត្រូវទេព្រោះថា គាត់គ្រាន់តែតុលាការដោះលែងឲ្យនៅក្រៅឃុំបណ្តោះអាសន្នតែប៉ុណ្ណោះ (ស្ថិតនៅក្រោមការឃ្លាំមើលពីអំណាចតុលាការ) ។
លោកបញ្ជាក់ថា « លោកញឺក ប៊ុនឆៃនៅមានទោសនៅឡើយ បើពិនិត្យតាមផ្លូវច្បាប់ ។ ក៏ប៉ុន្តែបើលោកមិនមែនទោសអ្វីនោះទេ គាត់ចួលរួមប្រកូតនយោបាយជាការល្អព្រោះមានគំនិតច្រើន ។ ផ្ទុយទៅវិញប្រសិនបើករណីលោកញឹក ប៊ុនឆៃ នេះត្រូវតុលាការ ធ្វើតាមការ បញ្ជានោះ នឹងធ្វើឲ្យច្បាប់អត់អំណាច ហើយជាគំរូបអាក្រក់ ដល់មនុស្សជំនាន់ក្រោយ » ។
លោកពេជ្រ ស្រស់បានអះអាងលោកមិនបានភ្ញាក់ផ្អើលនោះទេ ចំពោះលោកញឹក ប៊ុនឆៃ ត្រូវបានតុលាការដោះលែងឲ្យមានសេរីភាព និងចូលរួមប្រកួតប្រជែងនយោបាយឡើងវិញ ។ ព្រោះថា លោកជាអ្នកនយោបាយជើងចាស់មួយដែលធ្លាប់ឈ្នះមកចាញ់ ។
លោកថា ៖« គាត់ជាអ្នកនយោបាយឈ្នះធ្លាប់មកចាញ់ ហើយការចូលរួមនយោបាយថ្មីទៀតនេះជារឿងរបស់គាត់ជាឆន្ទៈរបស់គាត់ ។ ខ្ញុំស្វាគមន៍ចំពោះគាត់ មិនថាខ្ញុំទេ គឺផ្លូវ ច្បាប់បានស្វាគមន៍រួចហើយ » ។
លោកបន្តថា ច្បាប់បានចែងថា ពលរដ្ឋគ្រប់រូបមានសិទ្ធិឲ្យគេបោះឆ្នោត និងធ្វើនយោបាយដោយសកម្មដូចនេះ ច្បាប់បានស្វាគមន៍រួចហើយ ។ សម្រាប់ខ្ញុំវិញចង់ឲ្យមានគណបក្សនយោបាយច្រើនចូលរួមបោះឆ្នោត ដើម្បីស្របលិទ្ធិប្រជាធិបតេយ្យ ។
លោកសង្កត់ធ្ងន់ថា «ខ្ញុំចង់បានអ្នកនយោបាយចូលរួមច្រើន ដើម្បីជាជម្រើសរបស់ប្រជាពលរដ្ឋឲ្យដឹងថា គណបក្សណាមួយល្អ និងគណបក្សណាមួយមិនល្អ ។ ដូច្នេះអ្នកនយោបាយបើមានតែមួយពិបាកសម្រេចចិត្តណាស់ តែបើមានបក្សនយោបាយច្រើនជាការល្អ ទើបម្ចាស់ឆ្នោតងាយស្រួលសម្រេចចិត្តថា គណបក្សនយោបាយណាមួយល្អ » ។
លោកពេជ្រ ស្រស់ក៏បានឲ្យដឹងថា ករណីលោកញឹក ប៊ុនត្រូវបានតុលាការដោះលែងក៏ស្ថិតក្នុងសភាពការណ៍នយោបាយផងដែរ ។
ចំណែកលោក គង់ មុនីកាស្ថាបនិកគណបក្សឆន្ទៈខ្មែរត្រូវជាកូនប្រុសលោកគង់ គាំ អតី តមន្ត្រីជាន់ខ្ពស់គណបក្សសង្គ្រោះជាតិ បានឲ្យដឹងថា ការដោះលែងលោកញឹក ប៊ុនឆៃ ជារឿងរ៉ាវរបស់អ្នកនយោបាយចាស់ៗ ដែលពួកគាត់មានការដោះដូរអ្វីមួយ ដើម្បីដោះ ស្រាយបញ្ហា ក្នុងចំណោមបញ្ហាធំៗទាំងឡាយ ។
យ៉ាងណាក្តីលោកមុនីកា បានអះអាងថា លោកមិនបានព្រួយបារម្មណ៍ចំពោះការមកចូលរួមឆាកនយោបាយរបស់លោកញឹក ប៊ុនឆៃនោះទេ ។ ព្រោះថា គណបក្សនយោបាយមានច្រើនសម្រាប់ចូលរួមប្រកួតប្រជែងគ្នា តាមគោលនយោបាយមិនថា គណបក្សនយោបាយថ្មី ៗចាស់នោះទេ ។
លោកបញ្ជាក់ថា៖« យើងមិនបានព្រួយបារម្មណ៍ទេ យើងនឹងខិតខំប្រឹងប្រែងឲ្យអស់ពីលទ្ធភាព ដើម្បីបង្ហាញឲ្យម្ចាស់ឆ្នោតដឹងពីគោលបំណងរបស់គណបក្ស ដើម្បីផ្តាស់ប្តូរ ដើម្បីវិជ្ជមាន ហើយគណបក្សផ្សេងទៀតក៏គោលនយោបាយខ្លួនដែលក្នុងការប្រកួ តប្រជែងគ្នាដោយតម្លាភាពដែលមាន គ.ជ.ប ជាអាជ្ញាកណ្តាល» ។
សូមជម្រាប់ថា ក្រោយពីតុលាការដោះលែងលោកញឹក ប៊ុនឆៃប៉ុន្មានថ្ងៃលោក សិង្ហ គិរីប្រធានគណបក្សខ្មែររួូបរួមជាតិ បច្ចុប្បន្ននេះបានឲ្យដឹងថា សមាជិកគណបក្សបានគាំទ្រឲ្យលោកញឹក ប៊ុនឆៃធ្វើប្រធានគណបក្សគណបក្សវិញ ហើយគណបក្ស និងធ្វើសមាជមួយ ដើម្បីប្រកាសដំណែងជូនលោកញឹក ប៊ុនឆៃវិញ ។ ប៉ុន្តែរហូតមកដល់ពេលនេះគណបក្សខ្មែររួបរួមជាតិមិនទាន់ធ្វើសមាជ ដើម្បីប្រគល់តួនាទីជាប្រធានគណបក្សទៅឲ្យញឹក ប៊ុនឆៃនោះទេ ៕
ចែករំលែកព័តមាននេះ