ឡៅ ចន្ទ្រា ក្លាយជាម្ចាស់ពានកំពូលអ្នកប្រយុទ្ធកណ្ដាប់ដៃដែក

ថ្ងៃទី ០៨ ខែ ឧសភា ឆ្នាំ ២០១៨
ម៉ោង ១៤:១០
អ៊ុំ សំអូន

រាជធានីភ្នំពេញ ៖ ឡៅ ចន្ទ្រា ជើងខ្លាំងប្រចាំក្លិបកងពលតូចទ័ពពិសេសឆត្រយោង៩១១ បានក្លាយជាម្ចាស់ជើងឯកពានរង្វាន់កំពូលអ្នកប្រយុទ្ធកណ្ដាប់ដៃដែកក្នុងប្រភេទទម្ងន់៦៧គីឡូក្រាម បន្ទាប់ពីបានយកឈ្នះពិន្ទុកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សពោធិសែនជ័យទាំងលំបាកនៅវគ្គផ្ដាច់ព្រ័ត្រកាលពីថ្ងៃអាទិត្យ ទី៦ ឧសភា នៅលើសង្វៀនទូរទស្សន៍ស៊ីអិនស៊ី។

ការប្រកួត៥ទឹកពេញ គេឃើញកីឡាករ ពុទ្ធ ឆាយរិទ្ធី ខំប្រឹងវាយលុកទៅលើគូប្រកួត
មិនសំចៃដៃក្នុងគោលបំណងដណ្ដើមជ័យជម្នះឱ្យបានលឿនតាមដែលអាចធ្វើទៅបាន ប៉ុន្តែឡៅ ចន្ទ្រា មិនមែនជាជើងអន់ឯណា គេបានវាយបកវិញដូចព្យុះធ្វើឱ្យពុទ្ធ ឆាយរិទ្ធី ទាល់ច្រកនិងទប់ជំហរប្រកួតស្ទើរតែមិនចង់ជាប់ម្ដងៗ។ ទោះបីយ៉ាងណាពុទ្ធ ឆាយរិទ្ធី នៅតែប្រឹងវាយទប់ និង វាយឆ្មក់ ម្ដងម្កាលធ្វើឱ្យគូប្រកួតហាក់រអារមិនហ៊ានវាយសម្រុកដោយខ្វះការប្រុងប្រយ័ត្ននោះទេទើបការប្រកួតត្រូវអូសបន្លាយពេលដល់ទឹកទី៥ ។

ក្រោយ បញ្ចប់ការប្រកួត ឡៅ ចន្ទ្រា ត្រូវបាន គណៈកម្មការប្រកាសឱ្យឈ្នះពិន្ទុមិនឯកច្ឆ័ន្ទក្នុងសំឡេង៤ទល់នឹង១ក្លាយជាម្ចាស់ពានជើងឯកកំពូលអ្នកប្រយុទ្ធកណ្ដាប់ដៃដែកក្នុងប្រភេទទម្ងន់៦៧គីឡូក្រាម ។

ពុទ្ធ ឆាយរិទ្ធី ដែលទទួលបានតំណែងជើងឯករងប្រាប់ថា កុំតែគេមានរបួសស្មងជើងស្ដាំដោយសារការទាត់បាវសាក់មុនពេលប្រកួត ម្ល៉េះឡៅ ចន្ទ្រា ប្រហែលជាមិនអាចយកឈ្នះរូបគេបានឡើយ ។ ពុទ្ធ ឆាយរិទ្ធី បានប្រាប់លោក ស៊ីថូ ណាថាន់ អ្នកគ្រប់គ្រងកម្មវិធីកីឡាប្រចាំស្ថានីយទូរទស្សន៍ស៊ីអិនស៊ីថា លោកទទួលស្គាល់ឡៅ ចន្ទ្រា ថាពិតជាជើងខ្លាំងពូកែគ្រប់ក្បាច់ទាំងអស់ ប៉ុនបើលោកមិនមានបញ្ហារបួសស្មងជើងស្ដាំក៏លោកមិនចាញ់បែបនេះដែរ ។

របួសនេះធ្វើឱ្យលោកមិនអាចប្រើប្រាស់ជើងទាត់ឱ្យអស់កម្លាំងដែលខ្លួនមានឡើយ ។ ជាក់ស្ដែងនៅក្នុងទឹកទី៣និងទី៤តែម្ដង ជើងរបស់លោកឈឺកាន់តែខ្លាំងប៉ុន្តែលោកនៅតែអត់ធ្មត់ប្រកួតរហូតដល់ចប់ទឹកទោះបីលទ្ធផលចុងក្រោយមិនសមប្រកបក្ដី ។ ចំណែកឡៅ ចន្ទ្រាបានសារភាពថា ការមកប៉ះពុទ្ធ ឆាយរិទ្ធី លើកនេះក៏មិនស្រួលខ្លួនប៉ុន្មានទេ ។ ជាក់ស្ដែងក្នុងពេលប្រកួតលោកពិតជាប្រុងប្រយ័ត្នខ្លាំងណាស់បើមិនដូច្នោះទេច្បាស់ជាភ្លាត់ចាញ់ក្រោមកណ្ដាប់ដៃគេមិនខាន។

ឡៅ ចន្ទ្រា ដណ្ដើមបានចំណាត់ថ្នាក់លេខ១ ទទួលបានប្រាក់រង្វាន់ចំនួន៦ពាន់ដុល្លារ,
ពុទ្ធ ឆាយរិទ្ធី ចំណាត់ថ្នាក់លេខ២ទទួលបាន៣ពាន់ដុល្លារ, កីឡាករថៃNoeng Trakanចំណាត់ថ្នាក់លេខ៣ទទួលបាន២ពាន់ដុល្លារនិងកីឡាករថៃRong Nakphaចំណាត់
ថ្នាក់លេខ៤ទទួលបាន១៥០០ដុល្លារ៕