រាជធានីភ្នំពេញ ៖ ប្រទេសកម្ពុជាត្រៀមធ្វើជាម្ចាស់ផ្ទះរៀបចំវេទិកាជំនួបពាណិជ្ជកម្មរវាងប្រទេសឥណ្ឌា និងបណ្តាប្រទេស CLMV នៅទីស្តីការក្រសួងពាណិជ្ជកម្ម នាពេលឆាប់ៗខាងមុខនេះ ។
រដ្ឋលេខាធិការក្រសួងពាណិជ្ជកម្ម លោក ឈួន ដារ៉ា បានសរសេរនៅលើបណ្តាញទំនាក់ទំនងសង្គមរបស់លោក កាលពីថ្ងៃទី៦ ឧសភា ថា ក្នុងនាមលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោកបានដឹកនាំអង្គប្រជុំរបស់គណៈកម្មការសម្រាប់ត្រៀមរៀបចំវេទិកាជំនួបពាណិជ្ជកម្មរវាងប្រទេសឥណ្ឌា-កម្ពុជា ឡាវ មីយ៉ាន់ម៉ា វៀតណាម លើកទី៥ (The 5th India-CLMV Business Conclave) នៅក្រសួងពាណិជ្ជកម្ម ។ លោកបន្តថា ជំនួបពាណិជ្ជកម្មនេះ នឹងប្រព្រឹត្តទៅនៅរាជធានីភ្នំពេញ ដោយមានរដ្ឋមន្ត្រីពាណិជ្ជកម្មនៃប្រទេសទាំង៥ ដឹកនាំពាណិជ្ជករ និងវិនិយោគិនមកចូលរួមផងដែរ ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានថ្លែងតាមទូរស័ព្ទនាព្រឹកថ្ងៃទី៧ ឧសភាថា កម្ពុជានឹងធ្វើជាម្ចាស់ផ្ទះរៀបចំវេទិកាពាណិជ្ជកម្មលើកទី៥ នៅថ្ងៃទី២១ ដល់២២ ឧសភា ខាងមុខ ។ វេទិកានេះធ្លាប់បានរៀបចំ៣លើករួចមកហើយនៅប្រទេសឥណ្ឌា ប៉ុន្តែក្នុងអំឡុងកិច្ចប្រជុំលើកទី៣ បណ្តាប្រទេសទាំងនេះបានអនុម័តដើម្បីរៀបចំកិច្ចប្រជុំបែបនេះ មានលក្ខណៈវិលជុំនៅតាមបណ្តាប្រទេសទាំង៥នេះ ។
លោកបន្តថា ៖« នេះជាកិច្ចប្រជុំកម្រិតរដ្ឋមន្ត្រីដ៏សំខាន់មួយស្ថិតក្នុងក្របខ័ណ្ឌតំបន់មេគង្គនិងឥណ្ឌា ដែលយើងរំពឹងថា នឹងទទួលបានអត្ថប្រយោជន៍ច្រើនពីវេទិកានេះ ដោយសារវេទិកានេះនឹងមានការចូលរួមពីអ្នកវិនិយោគសំខាន់ៗមកពីបណ្តាប្រទេសទាំង៥ និងបង្ហាញពីឱកាស និងស្ថានភាពនៃការវិនិយោគនៅតាមបណ្តាប្រទេសពួកគេនីមួយៗ » ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងថា កន្លងមកសភាពាណិជ្ជកម្មកម្ពុជាបានចុះកិច្ចព្រមព្រៀងសហការគ្នាជាមួយសភាពាណិជ្ជកម្មឥណ្ឌារួចហើយ ដើម្បីពង្រីកទំហំពាណិជ្ជកម្មរវាងប្រទេសទាំងពីរ ព្រោះទំហំពាណិជ្ជកម្មកម្ពុជា-ឥណ្ឌានៅមានកម្រិតតិចតួចនៅឡើយ ប៉ុន្តែតាមរយៈការចុះកិច្ចព្រមព្រៀងនេះ និងដំណើរទស្សនកិច្ចរបស់ប្រមុខរាជរដ្ឋាភិបាលកម្ពុជាទៅកាន់ប្រទេសឥណ្ឌានាពេលថ្មីៗនេះ ក្នុងនោះមានការចូលរួមពីសភាពាណិជ្ជកម្មកម្ពុជា យើងរំពឹងថា ទំហំពាណិជ្ជកម្ម និងការវិនិយោគពីឥណ្ឌា នឹងកើនឡើងថែមទៀត ។
លោកបន្តថា ៖« ឥណ្ឌាជាមហាអំណាចសេដ្ឋកិច្ចមួយ និងជាដៃគូអាស៊ានបូក១ ហេតុនេះ តាមរយៈវេទិកាពាណិជ្ជកម្មតំបន់ ជាមួយឥណ្ឌា យើងរំពឹងនឹងទទួលបានផលប្រយោជន៍កាន់តែច្រើនពីវេទិកានេះ » ។ លោកបន្តថា ៖« ខ្ញុំតែងលើកឡើងថា ការមកប្រសើរជាងមិនមក ហេតុនេះ ការរៀបចំវេទិកាដែលមានការចូលរួមពីអ្នកវិនិយោគនានា យើងរំពឹងនឹងអាចចាប់ដៃគូ ឬស្វែងរកការសហការគ្នាបានច្រើនថែមទៀត ដើម្បីផ្តល់ផលប្រយោជន៍ដល់គ្នាទៅវិញទៅមក » ៕
ចែករំលែកព័តមាននេះ