រាជធានីភ្នំពេញ ៖ រថយន្តក្រុងមួយគ្រឿងបានដឹកភ្ញៀវជនបរទេសដែលជាអ្នកបំរើការក្នុងយន្តហោះ និងអ្នកបើកយន្តហោះ ខ្វះការប្រុងប្រយ័ត្ន បានជ្រុលទៅកៀររថយន្តកាមរី ហាយព្រីតមួយគ្រឿងដែលធ្វើដំណើរដំណើរក្នុងទិសដៅស្របគ្នា បណ្តាលឱ្យរងការខូចខាតរថយន្តទាំងសងខាង តែមិនមានគ្រោះថ្នាក់ដល់មនុស្សនោះទេ ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី៧ ខែឧសភា ឆ្នាំ២០១៨ ជិតនឹងស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ១ ខណ្ឌមានជ័យ ។
តាមប្រភពព័ត៌មានពីកន្លែងកើតបានអោយដឹងថា មុនពេលកើតហេតុ គេបានឃើញមនុស្ស៤នាក់ ក្នុងនោះប្រុស២នាក់ និងស្រីម្នាក់ រួមទាំងអ្នកបើកបរម្នាក់ បានបើករថយន្តម៉ាកកាមរី ហាយព្រីត ពណ៌ខ្មៅ ពាក់ស្លាកលេខ ភ្នំពេញ ២K-០៣០៣ ដោយធ្វើដំណើរតាមផ្លូវ ២៧១ ក្នុងទិសដៅ ពីជើងទៅត្បូង ខណៈមកដល់ចំណុចកើតហេតុ ដែលជាផ្លូវកោង ក៍ស្រាប់តែមានរថយន្តក្រុងម៉ាកហ៊ីយ៉ាន់ដាយ ពណ៌ទឹកមាស ពាក់ស្លាកលេខ ភ្នំពេញ ៣E-១០៧៨ បានដឹកភ្ញៀវដែលជនជាតិបរទេសដែលជាអ្នកបំរើការក្នុងយន្តហោះ និងអ្នកបើកយន្តហោះផង បានធ្វើដំណើរតាមផ្លូវ២១៧ ក្នុងទិសដៅស្របគ្នា ក្នុងល្បឿនលឿន ហើយបានវ៉ាជែងខាងស្តាំរថយន្តកាមរីហាយព្រីត ខណៈពេលបើកវ៉ាដោយសារតែកន្ទុយខាងក្រោយវ៉ាមិនផុត ក៍ជ្រុលទៅកៀរ រថយន្តកាមរីហាយព្រីត បណ្តាលរងការខូចខាត ក្រពិតថ្ពាល់មុខចំហៀងស្តាំ និងទ្វារខាងស្តាំបន្តិច តែមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ ។
ដោយឡែកខាងរថយន្តក្រុងវិញរងការខូចខាតឆូតថ្នាំគូថក្រោយចំហៀងឆ្វេងបន្តិចបន្តួច តែមិនមានគ្រោះថ្នាក់ដល់អ្នកជិះនៅក្នុងរថយន្តនោះទេ ហើយភ្លាមនោះ ភ្ញៀវដែលជិះក្នុងរថយន្តក្រុងត្រូវបានរថយន្តមួយគ្រឿងទៀតមកដឹកដើម្បីបន្តដំណើរទៅមុខ ។
ក្រោយពេលកើតហេតុ រថយន្តទាំងពីរគ្រឿងបានធ្វើការសម្របសម្រួលគ្នា ដោយខាងរថយន្តកាមរី ហាយព្រីត ទាមទារសំណងចំនួន១៥០ដុល្លារ តែពេលនោះខាងរថយន្តក្រុងបានសុំសង១៣០ដុល្លារដើម្បីបញ្ចប់រឿង ៕
ចែករំលែកព័តមាននេះ