រាជធានីភ្នំពេញ ៖ តុលាការកំពូលនៅថ្ងៃទី0៧ ខែឧសភា ឆ្នាំ២០១៨បានប្រកាសសាលដីកាបដិសេធបណ្តឹងសាទុក្ខរបស់ជនជាប់ចោទលោកកឹម សុខា មេដឹកនាំអតីតគណបក្សសង្គ្រោះជាតិ ប្រឆាំងការបន្តឃុំខ្លួន៦ខែ ដោយសាលាដំបូងរាជធានីភ្នំពេញ និងសម្រេចឃុំខ្លួនដដែលបន្ទាប់ពីបើកសវនាការកំបាំងមុខជនជាប់ចោទ ។
ចៅក្រមតុលាការកំពូលលោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះនៅព្រឹកថ្ងៃទី0៧ ខែឧសភា ឆ្នាំ២០១៨នេះ បានបើកសវនាការលើសំណុំរឿងប្រឆាំងនឹងការពន្យារពេលឃុំខ្លួនជនត្រូវចោទ កឹម សុខា រយៈពេល៦ខែ តែសវនាការនេះមិនមានវត្តមានជនត្រូវចោទ កឹម សុខា នោះទេ ។
សូមបញ្ជាក់ថា កាលពីថ្ងៃទី៥ ខែមិនា ឆ្នាំ២០១៨ លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញបានសម្រេចបន្តឃុំខ្លួនជនត្រូវចោទ កឹម សុខា អតីតប្រធាននៃអតីតគណបក្សសង្គ្រោះរយៈពេល៦ខែបន្តទៀត នៅពន្ធនាគារត្រពាំងផ្លុង ។
ជនត្រូវចោទ កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេសតាមមាត្រា ៤៤៣ នៃក្រមព្រហ្មទណ្ឌ ។ បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ។
លោក កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ ។ ក្រោយឃាត់ខ្លួនសមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ ។
ហើយនៅថ្ងៃទី៤ ខែកញ្ញា ឆ្នាំ២០១៧ ព្រះរាជអាជ្ញា៣រូបបានទៅដល់ពន្ធនាគារត្រពាំងផ្លុង ដើម្បីសាកសួរលោក កឹម សុខា ។ ការសាកសួរនោះ ក៏មានវត្តមានរបស់មេធាវីទាំង៥រូប របស់លោក កឹម សុខាដែរ ៕
ចែករំលែកព័តមាននេះ