រាជធានីភ្នំពេញ ៖ ប្តីប្រពន្ធ និងបុរសម្នាក់ត្រូវជាបងថ្លៃបានរត់ទៅប្តឹងសមត្ថកិច្ចទាំងកណ្តាលយប់បន្ទាប់ពីមានចោរចូលគាស់បន្ទប់លួចយកម៉ូតូ និងកុំព្យូទ័រហើយឡើងទៅយកទូរស័ព្ទនៅលើឡៅតឿដែលពួកគាត់ទុកនៅក្បាលដំណេក កាលពីវេលាម៉ោង១២និង៩នាទីរំលងអធ្រាត្រឈានចូលថ្ងៃទី៧ ខែឧសភា ឆ្នាំ២០១៨ នៅខាងក្រោយរោងចក្រ QMI…
រាជធានីភ្នំពេញ ៖ ប្តីប្រពន្ធ និងបុរសម្នាក់ត្រូវជាបងថ្លៃបានរត់ទៅប្តឹងសមត្ថកិច្ចទាំងកណ្តាលយប់បន្ទាប់ពីមានចោរចូលគាស់បន្ទប់លួចយកម៉ូតូ និងកុំព្យូទ័រហើយឡើងទៅយកទូរស័ព្ទនៅលើឡៅតឿដែលពួកគាត់ទុកនៅក្បាលដំណេក កាលពីវេលាម៉ោង១២និង៩នាទីរំលងអធ្រាត្រឈានចូលថ្ងៃទី៧ ខែឧសភា ឆ្នាំ២០១៨ នៅខាងក្រោយរោងចក្រ QMI ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះមានឈ្មោះ គាំ សាវេត ភេទប្រុស អាយុ៤៨ឆ្នាំ មុខរបរម៉ៅការសំណង់រស់នៅភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។ ស្ត្រីជាប្រពន្ធឈ្មោះ ផន ស្រីឡំ អាយុ៤១ឆ្នាំ មុខរបរនៅផ្ទះ រស់នៅផ្ទះកើតហេតុខាងលើ ។ ក្រុមចោរចូលគាស់យកសម្ភាររួមមាន ម៉ូតូម៉ាកស្កូបពី១គ្រឿង ពាក់ផ្លាកលេខ ភ្នំពេញ១GL-៨៤៤៥, កុំព្យូទ័រ១គ្រឿង, ទូរស័ព្ទដៃម៉ាក IPhone 6 Plus និងទូរស័ព្ទចុចពិលមួយគ្រឿង ។
តាមប្រភពព័ត៌មានពីស្ត្រីជាប្រពន្ធឈ្មោះ ផន ស្រីឡំ បានឱ្យដឹងថា មុនពេលកើតហេតុរូបគាត់ និងប្តីរបស់គាត់ដេកនៅឡៅតឿភ្លោះ ដោយកូនៗដេកនៅឡៅតឿម្ខាងហើយរូបគាត់ និងប្តីដេកនៅឡៅតឿម្ខាងឱ្យបងប្រុសខាងប្តីទើបមកលេងសម្រាន្តនៅខាងក្រោមជិតម៉ូតូនៅពេលនោះជនសង្ស័យបានចូលធ្វើសកម្មភាពគាស់ទ្វារខាងក្រោម ដោយយកម៉ូតូមួយគ្រឿងម៉ាកស្កូបពី និងកុំព្យូទ័រមួយគ្រឿងនៅដែលទុកនៅខាងក្រោមយកទៅបាត់ហើយជនសង្ស័យខាងលើបានធ្វើសកម្មភាពឡើងទៅលើឡៅតឿលួចយកទូរស័ព្ទចំនួន២គ្រឿងទៀតដែលទុកនៅក្បាលដំណេក រួចហើយបានដើរបញ្ចាំងពិលដើម្បីរកសម្ភារផ្សេងៗទៀត ស្រាប់តែ ប្តីរបស់គាត់ស្រែកថា ចោរ នៅពេលនោះចោរខាងលើបានរត់ចុះពីលើឡៅតឿមកក្រោមគេចខ្លួនបាត់ ។ បន្ទាប់មកប្ដីរបស់គាត់បានចុះមកមើលខាងក្រោមឃើញបាត់ម៉ូតូមួយគ្រឿង និងកុំព្យូទ័រមួយគ្រឿង ហើយប្តីគាត់បានបន្តទៀតថា ជនសង្ស័យលើមិនធម្មតាឡើយ គាត់ចាក់សោរពីខាងក្នុងហើយគាស់ទ្វារចូលបានទៀត ។
ប្រភពព័ត៌មានពីជនរងគ្រោះដែលត្រូវជាប្ដីបានបន្តទៀតថា នៅម្ដុំផ្ទះរបស់គាត់តែងឮតគ្នាថា សំបូរទៅដោយចោរគាស់ផ្ទះជាញឹកញាប់ណាស់ពេកហើយ ពុំដែលមានសមត្ថកិច្ចចេញល្បាតនៅពេលយប់ឡើយដូចអសន្តិសុខតែម្តង ។ ក្រោយពេលកើតហេតុ រូបគាត់ និងប្រពន្ធរបស់គាត់បានហៅម៉ូតូកង់បីទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅ ដើម្បីឲ្យសមត្ថកិច្ចជួយអន្តរាគមន៍ ៕
ចែករំលែកព័តមាននេះ