រាជធានីភ្នំពេញ ៖ រយៈពេល២ខែដំបូងនៃឆ្នាំនេះ ភ្ញៀវទេសចរអន្តរជាតិដែលចូលមកទស្សនាកម្ពុជា មានចំនួន១.១៣៩.១៧៨នាក់ កើនឡើងប្រមាណ១១,១% បើធៀបនឹងរយៈពេលដូចគ្នាឆ្នាំ២០១៧ ។ ក្នុងនោះ ភ្ញៀវទេសចរចិននៅតែឈរលំដាប់ទី១ ក្នុងចំណោមទីផ្សារ ទេសចរណ៍សំខាន់ៗទាំង១០របស់កម្ពុជា ។ នេះបើយោងតាមរបាយការណ៍ក្រសួងទេសចរណ៍ ។
របាយការណ៍បានឲ្យដឹងទៀតថា ភ្ញៀវទេសចរចិនដែលចូលមកទស្សនាកម្ពុជារយៈពេល២ខែដើមឆ្នាំនេះ មានចំនួន៣១៧.៨៨៦នាក់ ស្មើនឹង២៧,៩%នៃចំនួនសរុប កើនឡើង៨៤,៣% បើធៀបនឹងគ្រាដូចគ្នានៃឆ្នាំមុន ។ ចំណែកភ្ញៀវទេសចរវៀតណាម ស្ថិតក្នុងលំដាប់ ថ្នាក់លេខ២ មានចំនួន១២២.១៤៣នាក់ ស្មើនឹង១០,៧%នៃចំនួនសរុប ថយចុះ១០,៧% បើធៀបនឹងរយៈពេលដូចគ្នានៃឆ្នាំមុន ។
របាយការណ៍ដដែលបានបញ្ជាក់ថា ប្រភពទីផ្សារទេសចរណ៍សំខាន់ៗមកកម្ពុជាក្នុងរយៈពេល២ខែដើមឆ្នាំនេះ រួមមាន ភ្ញៀវមកពីតំបន់អាស៊ីប៉ាស៊ីហ្វិក ចំនួន៨៤៨.៣៣៣នាក់ ស្មើនឹង ៧៤,៤%នៃចំនួនសរុប កើនឡើង១៧,៤% ។ ភ្ញៀវមកពីតំបន់អឺរ៉ុប មានចំនួន២០៤.៣២០នាក់ ស្មើនឹង១៧,៩%នៃចំនួនសរុប ថយចុះ ៣% ខណៈភ្ញៀវមកពីតំបន់អាមេរិក មានចំនួន៨៣.២៨៨នាក់ ស្មើនឹង៧,៣%នៃចំនួនសរុប ថយចុះ៦,៦% បើធៀបនឹងរយៈពេលដូចគ្នានៃឆ្នាំមុន ។
ចំពោះភ្ញៀវទេសចរអន្តរជាតិដែលទៅទស្សនាតំបន់អាទិភាពសំខាន់ៗរួមមាន ៖ រាជធានីភ្នំពេញ មានចំនួន៥៤៨.៩៧៦នាក់ ស្មើនឹង៤១,៥%នៃចំនួនសរុប កើនឡើង១២,៨% ។ សៀមរាបអង្គរ ចំនួន៥៩០.២០២នាក់ ស្មើនឹង៤៤,៦%នៃចំនួនសរុប កើនឡើង៩,៥% ។ តំបន់ឆ្នេរសមុទ្រ ចំនួន១៦៩.៣៦១នាក់ ស្មើនឹង១២,៨%នៃចំនួនសរុប កើនឡើង១៤,៤%។ តំបន់អេកូទេសចរណ៍ភូមិភាគឦសាន មានចំនួន១៥.៣៨៤នាក់ ស្មើនឹង១,២%នៃចំនួនសរុប កើនឡើង៤,២% បើធៀបនឹងរយៈពេលដូចគ្នានៃឆ្នាំ២០១៧កន្លងទៅ។ ចំណែកតំបន់ប្រាសាទព្រះវិហារ មានចំនួន១៤.៩០៦នាក់ ថយចុះ១១,៣% ។
ទន្ទឹមនឹងកំណើននៃការមកដល់នៃភ្ញៀវទេសចរអន្តរជាតិនេះ របាយការណ៍បានឲ្យដឹងដែរថា ភ្ញៀវទេសចរជាតិដែលបានចេញទៅក្រៅប្រទេស ក៏មានការកើនឡើងផងដែរ ។
របាយការណ៍បានឲ្យដឹងថា រយៈពេល២ខែដើមឆ្នាំនេះ ភ្ញៀវទេសចរជាតិ ចំនួន២៨៩.២៧៩នាក់ បានចេញទៅទស្សនាកម្សាន្ដនៅក្រៅប្រទេស កើនឡើង១៤,១% បើធៀបនឹងរយៈពេលដូចគ្នានៃឆ្នាំ២០១៧ ។
កំណើនភ្ញៀវទេសចរអន្តរជាតិដែលបន្ដកើនឡើងនេះ បើតាមប្រតិបត្តិករទេសចរណ៍ក្នុងវិស័យឯកជនបានលើកឡើងថា ដោយសារតែការភ្ជាប់ជើងហោះហើរតាមគោលដៅសហគមន៍របស់យើងនៅអាស៊ី ជាពិសេសប្រទេសចិន ។
លោក ហូ វណ្ឌី បានថ្លែងប្រាប់កោះសន្ដិភាព កាលពីថ្ងៃទី១ ឧសភា កន្លងមកថា ៖«អំឡុងពេលនេះ ជាពេលដែលមានភ្ញៀវតិច ក៏ប៉ុន្ដែយើងឃើញការមកដល់នៃភ្ញៀវទេសចរបរទេសចូលទស្សនាមានកំណើនខ្ពស់ ។ នេះដោយសារតែកម្ពុជាបានភ្ជាប់ជើងហោះហើរតាមគោលដៅសហគមន៍របស់យើងនៅអាស៊ី ជាពិសេសប្រទេសចិន » ។
ទោះយ៉ាងនេះក្ដី លោកក៏បានសំណូមពរដល់បងប្អូនប្រជាពលរដ្ឋ ក៏ដូចជាអាជ្ញាធរពាក់ព័ន្ធ មេត្តាយកចិត្តទុកដាក់លើការការពារ និងការថែទាំ ពិសេសគឺថែរក្សានូវកេរដំណែលបុព្វបុរសដូនតាយើងឲ្យនៅគង់វង្ស ព្រមទាំងថែរក្សាបរិស្ថាន និងអនាម័យឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ ។
យោងតាមរបាយការណ៍ក្របខ័ណ្ឌគោលនយោបាយម៉ាក្រូសេដ្ឋកិច្ច វិស័យទេសចរណ៍ត្រូវបានរំពឹងថា នឹងបន្តងើបឡើងក្នុងអត្រាកំណើន៤,៥%ក្នុងឆ្នាំ២០១៨ និង៤,៧%ក្នុងឆ្នាំ២០១៩ ដោយសារកំណើនខ្ពស់នៃចំនួនភ្ញៀវទេសចរអន្តរជាតិ ជាពិសេសទេសចរពីតំបន់អាស៊ី គួបផ្សំនឹងការខិតខំប្រឹងប្រែងរបស់រាជរដ្ឋាភិបាលក្នុងការផ្សព្វផ្សាយ, ការលើកទឹកចិត្តឲ្យមានការបើកជើងហោះហើរត្រង់ និងការដាក់ចេញនូវគោលនយោបាយនានា ក្នុងគោលបំណងទាក់ទាញភ្ញៀវទេសចរបន្ថែម ។ ជាមួយគ្នានេះ ការធ្វើពិពិធកម្មផលិតផល និងគោលដៅទេសចរណ៍ ព្រមទាំងការទាក់ទាញភ្ញៀវឲ្យចំណាយខ្ពស់ នៅតែជាប្រការចាំបាច់ និងបន្ទាន់ សំដៅធានាចីរភាពកំណើននៃវិស័យនេះ ដើម្បីបន្តតួនាទីជាជន្ទល់ដ៏សំខាន់មួយសម្រាប់ទ្រទ្រង់សេដ្ឋកិច្ចជាតិ ៕
ចែករំលែកព័តមាននេះ