រាជធានីភ្នំពេញ ៖ បុរសអ្នករត់រ៉ឺម៉កម៉ូតូម្នាក់ទំនងជាមានជាតិស្រវឹងក្នុងខ្លួនបើករ៉ឺម៉កម៉ូតូតែម្នាក់ឯងតាមផ្លូវក្រោមដីស្ពានអាកាសស្ទឹងមានជ័យលឿនពេកដល់ផ្លូវកោងក្រឡាប់រ៉ឺម៉កម៉ូតូសង្កត់លើសន្លប់ស្តូកស្តឹងតែម្នាក់ឯង ហេតុការណ៏នេះបានកើតឡើងកាលពីវេលាម៉ោង៣និង៣០នាទីទាបភ្លឺ ថ្ងៃទី៤ ខែឧសភា ឆ្នាំ២០១៨ នៅផ្លូវក្រោមដីស្ពានអាកាសស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ ។
ប្រភពព័ត៌មានបានប្រាប់ឲ្យដឹងថា មុនពេលកើតហេតុបុរសរត់រ៉ឺម៉កម៉ូតូម្នាក់បានបើករ៉ឺម៉កម៉ូតូលឿនចូលមកផ្លូវក្រោមដីស្ពានអាកាសស្ទឹងមានជ័យក្នុងទិសដៅពីលិចទៅកើតជិះតែម្នាក់ឯង លុះមកដល់ចំណុចផ្លូវកោងស្ពានក្រោមដីទប់ចង្កូតមិនជាប់បណ្តាលក្រឡាប់រ៉ឺម៉កផ្ងារជើងតែម្តង ។
ក្រោយពេលកើតហេតុមានប្រជាពលរដ្ឋរស់នៅក្បែរកន្លែងកើតហេតុប្រទះឃើញបានការណ៏ទៅសមត្ថកិច្ច មូលដ្ឋានដែលកំពុងល្បាតក្នុងមូលដ្ឋានឱ្យមកជួយពេលសមត្ថកិច្ចទៅដល់កន្លែងកើតហេតុបានឃើញបុរសជាអ្នកបើករ៉ឺម៉កម៉ូតូកៀបជាប់ក្រោមម៉ូតូរ៉ឺម៉កបែកក្បាលសន្លប់ស្តូកស្តឹងក៏នាំគ្នាជួយលើកម៉ូតូចេញហើយទាក់ទងហៅរថយន្តសង្គ្រោះដឹកជនរងគ្រោះទៅសង្គ្រោះនៅមន្ទីរពេទ្យភ្លាមៗ ។ នៅលើខ្លួនជនរងគ្រោះសមត្ថកិច្ចរកឃើញមានកាតសម្គាល់ខ្លួនជរងគ្រោះមួយសន្លឹកមានឈ្មោះ ដាង វណ្ណលាប ជាសមាជិកសហគមន៍ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ។
ជនរងគ្រោះត្រូវរថយន្តសង្គ្រោះដឹកយកទៅសង្គ្រោះនៅគ្លីនិកឯកជន ចំណែកម៉ូតូត្រូវបានសមត្ថកិច្ចមូលដ្ឋាន យកទៅរក្សាទុកនៅប៉ុស្តិ៍នគរបាលស្ទឹងមានជ័យ១រង់ចាំជនរងគ្រោះជាសះស្បើយពីរបួសយកឯកសារទៅបញ្ចាក់យកម៉ូតូត្រលប់មកវិញ ៕
ចែករំលែកព័តមាននេះ