ខេត្តព្រៃវែង ៖ យុវជនម្នាក់បានបាត់បង់ជីវិត ដោយសារតែផឹកស្រាស្រវឹង ក្តៅក្នុងខ្លួន ហើយទៅលោតចូលទឹកស្រះ បណ្តាលឲ្យលង់។ ហេតុការណ៍នេះបានកើតឡើង កាលពីវេលាម៉ោង៤ និង៣០នាទី រសៀលថ្ងៃទី៣ ឧសភានេះ នៅចំណុចភូមិអូតាថុក ឃុំកញ្ជ្រៀច ស្រុកកញ្ជ្រៀច ខេត្តព្រៃវែង។ ជនរងគ្រោះក្នុងហេតុការណ៍នេះ ឈ្មោះ ថុន ធា ភេទប្រុស អាយុ១៨ឆ្នាំ មានទីលំនៅក្នុងភូមិកើតហេតុ។
យោងតាមការបំភ្លឺពីយុវតីម្នាក់ឈ្មោះ ពៅ សុខនី អាយុ១៤ឆ្នាំ ជាអ្នកដែលបានឃើញហេតុការណ៍នេះ ផ្ទាល់ បានឲ្យដឹងថា មុនពេលកើតហេតុ នាងបានឃើញជនរងគ្រោះ ក្នុងអាការៈស្រវឹង បានដើរទ្រេតទ្រោតតែម្នាក់ឯងទៅខាងក្រោយផ្ទះ ពេលទៅដល់មាត់ស្រះទឹក ស្រាប់តែជនរងគ្រោះ លោតចូលទឹកស្រះលិចបាត់ ពីដំបូងនាងស្មានថា ជនរងគ្រោះជ្រមុជទឹកលេង ប៉ុន្តែដល់យូរទៅមិនឃើញងើបមកវិញសោះ ទើបនាងសង្ស័យថាលង់ទឹក ហើយក៏ស្រែកហៅឲ្យគេមកជួយ។
ប៉ុន្តែទម្រាំអ្នកស្រុកមកដល់ និងចុះរាវរកឃើញ ជនរងគ្រោះបានស្លាប់បាត់ទៅហើយ។ ប្រភពពត៌មានពីសមត្ថកិច្ច បានឲ្យដឹងថា ផ្អែកតាមការពិនិត្យលើខ្លួនជនរងគ្រោះ និងកន្លែងកើតហេតុ បញ្ជាក់ឲ្យឃើញថា សពពិតជាស្លាប់ដោយសារលង់ទឹកពិតប្រាកដមែន ហើយក៏បានប្រគល់សពជូនក្រុមគ្រួសារ យកទៅធ្វើបុណ្យតាមប្រពៃណីតែម្តង៕
ចែករំលែកព័តមាននេះ