រាជធានីភ្នំពេញ ៖ ថ្វីដ្បិតតែមានការបញ្ជូនកីឡាករកាយវប្បកម្មឱ្យចេញប្រកួតនៅក្រៅស្រុកនាពេលចុងក្រោយ ក៏កីឡាករភាគច្រើននៅតែអះអាងថាមានការជួយជ្រោម
ជ្រែងតិចតួច ទើបធ្វើឱ្យកីឡាមួយនេះហាក់មានសន្ទុះយឺតយ៉ាវ ក្នុងពេលកីឡាករភាគច្រើននៅតែបង្ហាញពីការប្រឹងប្រែងមិនថមថយ។
លោក សុខ មង្គលរស្មី ប្រធានសហព័ន្ធកីឡាកាយវប្បកម្មកម្ពុជាបានអះអាងថា ជារឿងលំបាកខ្លាំងណាស់ពេលមានការតម្រូវឱ្យជ្រើសរើសកីឡាករតំណាងប្រទេសចេញទៅប្រកួតនៅបរទេសម្ដងៗ ជាពិសេសបើការប្រកួតទាំងនោះតម្រូវឱ្យកំណត់អាយុកីឡាករក្មេងៗជាដើម ។ លោកថា មកទល់សព្វថ្ងៃបណ្ដាប្រទេសដែលបើកកម្មវិធីប្រកួតបង្អួតសាច់ដុំ មិនមានការកំណត់អាយុនោះទេ ដោយគេកំណត់ត្រឹមតែគីឡូប៉ុណ្ណោះ ដោយសារតែគេក៏បានដឹងថាកីឡាប្រភេទនេះមិនសំបូរក្មេងៗមកហាត់តម្រូវតាមការប្រកួតនោះទេ ។ យ៉ាងណាមិញ លោកថា នៅបណ្តាប្រទេសផ្សេងសំបូរកីឡាករក្នុងវិស័យនេះជាងកម្ពុជា ដោយសារតែគេមានទីផ្សារឱ្យកីឡាករដែលមានសាច់ដុំត្រូវតាមការប្រកួតមានទីផ្សារមានប្រាក់ចំណូលដែលខុសពីកម្ពុជាកីឡាករបានលុយតែពេលប្រកួតឈ្នះ តែបើអត់ការប្រកួតគឺត្រូវធ្វើការតាមសម្មាអាជីវោផ្ទាល់ខ្លួន ។
លោកបញ្ជាក់ស្ថានភាពចុងក្រោយ គឺនៅតែមិនមានអ្នកណាផ្ដល់ការជួយជ្រោមជ្រែងឱ្យពេញទំហឹងនោះទេ ទើបវិស័យមួយនេះមិនទទួលបានការចាប់អារម្មណ៍ភាគច្រើនដោយអាចនិយាយបានមិនសូវមានអ្នកចង់ក្លាយជាកីឡាករអាជីពក្រោយការហ្វឹកហាត់មួយរយៈ ។ លោកថា កីឡាមួយនេះបើមានការជួយជ្រោមជ្រែងច្បាស់លាស់ ដូចជាមានកញ្ចប់ប្រាក់ខែ ផ្ដល់ការហ្វឹកហាត់មិនគិតថ្លៃ ផ្គត់ផ្គង់ឧបករណ៍គ្រប់គ្រាន់ និងផ្ដល់ឱកាសឱ្យអ្នកមានជំនាញបានចេញទៅប្រកួតក្រៅស្រុកច្រើន គឺមិនខ្វះអ្នកចង់ហាត់យកធ្វើជាអាជីពនោះទេ ប៉ុន្តែមកពីក្នុងពេលខ្លះគឺកីឡាករត្រូវរកស្ពុនស័រចេញប្រកួតក្រៅស្រុកខ្លួនឯង និងត្រូវផ្គង់ផ្គង់លើការហ្វឹកហាត់ខ្លួនឯងផង ទើបអ្នកខ្លះបានត្រឹមតែហ្វឹកហាត់លេងៗយកសាច់ស្អាត មិនហ៊ានវិវត្តខ្លួនឱ្យក្លាយជាអ្នកអាជីពដែលមានសាច់ដុំធំៗនោះឡើយ។
លោក សុខ សុភ័ក្ត្រ ដែលត្រូវគេស្គាល់ថាជាកីឡាករល្អមានកេរ្តិ៍ឈ្មោះបោះសំឡេងមិនធម្មតា ក្រោយពីមានឱកាសបានចេញប្រកួតនៅក្រៅប្រទេសក្នុងព្រឹត្តិការណ៍ដណ្ដើមជើងឯកបុរសដែលមានសាច់ដុំល្អ ក៏បានបញ្ជាក់ថាធនធានកីឡាករក្មេងៗដែលចង់ហាត់យកសាច់ដុំធំៗដើម្បីអាចចូលរួមប្រកួតបានដូចលោកក៏ជារឿងពិបាកផងដែរ។ លោកថា កីឡាករម្នាក់ដើម្បីអាចក្លាយជាធនធានចូលរួមប្រកួតបានលុះត្រាតែហ្វឹកហាត់ដំឡើងសាច់ដុំជារៀងរាល់ថ្ងៃ ហើយហាត់ឱ្យមានសាច់ដុំធំប៉ោង និងស្ងួតមិនមានខ្លាញ់ ។ ជាក់ស្ដែង ទម្រាំទទួលបានលទ្ធផលដូចដែលមហាជនបានឃើញគឺលោកសុខចិត្តអត់បាយ និងអត់ដើរលេង ហើយតមចំណី និងប្រើថ្នាំបំប៉នសាច់ដុំយ៉ាងម៉ត់ចត់នោះទៀតផងទើបមានសាច់ដុំបែបនេះ។
លោកថា មនុស្សជាច្រើនបានសើចចំអកថាលោកបាត់រូបរាងទាក់ទាញ ហើយមិនខុសពីកង្កែប ដោយសារតែលោកចង់បានសាច់ដុំធំណែនឱ្យត្រូវនឹងការប្រកួតដែលបានប្រកាសឡើង ។ ត្រង់ចំណុចនេះហើយដែលមនុស្សប្រុសភាគច្រើនមិនចង់បានរូបរាងដូចលោកនោះទេ ជាពិសេសអ្នកចង់បានមាឌធំស្អាត និងមើលទៅឃើញសង្ហារ ។
លោកបានចំណាយពេលមិនតិចជាង១០ឆ្នាំនោះទេ ទម្រាំទទួលបានលទ្ធផលឱ្យមានសាច់ដុំ និងរាងកាយដូចដែលបានឃើញ ហើយលោកក៏មិនរំពឹងថាអាចបន្តអាជីពមួយនេះបានជារៀងរហូតនោះដែរ ដោយសារការតស៊ូទាំងនោះ សុទ្ធតែជាថវិកាផ្ទាល់ខ្លួនទាំងអស់ ។
លោកថា បើទោះជាបុគ្គលម្នាក់នោះស្រឡាញ់ និងចង់ក្លាយជាអ្នកអាជីពផ្នែកកីឡាលើកសាច់ដុំយ៉ាងណាក៏ដោយ ប៉ុន្តែបើខ្វះលទ្ធភាព និងឆន្ទៈ ក៏មិនអាចទៅរួច បើគ្មានការជួយជ្រោមជ្រែងឱ្យពិតប្រាកដដូចសព្វថ្ងៃ ។ លោកថា រាល់ថ្ងៃអ្នកមានជំនាញដែលត្រូវបានគេជ្រើសឱ្យចេញប្រកួត គឺទទួលយកឱកាសចេញប្រកួតដោយទឹកចិត្ត ដោយម្នាក់ៗសុខចិត្តបោះបង់ការងារនិងលុយកាក់ផ្ទាល់ខ្លួនដើម្បីហ្វឹកហាត់ត្រៀមប្រកួតយកជ័យជម្នះជូនជាតិ៕
ចែករំលែកព័តមាននេះ